Lufi 4 - Amashiwi Aba Lesa

¹ Lomba Boasi waliile kumusiko wakumusi, nekwikala pansi apo; lomba kansi nikuli woyo-mukwaŵo, ualaŵile Boasi, alukupita; popele alilaŵile kuli ye ati: Wo, ŵaliŵe! Syolokeni, mwikale pano! Naye walisyolokele, nekwikala pansi.

² Peŋka aliŵetile aŵakulu aŵakumusi ikumi, nekulaŵila ati: Namweŵo kamwikale pano. Naŵo ŵaliikele.

³ Popele alilaŵile kumukwaŵo uyo ati: Naomi, uwabwelele uwafumine mucalo caMoabi alukuula iŵala ilyo ilyali lyakwe Elimeleci umukwasu;

⁴ popele nalaŋguluka ati ndukumuŵuleni ifyafyefyo ati: Mukalyule pamenso aŵaŵa aŵekele apa, napamenso aŵakulu ŵaŵantu ŵanji. Kani mukaliluŵula, kamuliluŵula: sombi kani teti mukaliluŵule, mumbule ati njisiŵe: pakuti apakuŵula mweŵo tapali-po uwakuliluŵula; kaŵili neŵo ndi panuma penu. Naye ati: Ŋkaliluŵula.

⁵ Popele Boasi ati: Akasuŵa ako mukole'ŵala kuminwe yakwe Naomi, mukamuule kaŵili naLufi umuMoabi, umukasi waufwile, mukwimicila isina lyaufwile paŵupyani bwakwe.

⁶ Popele uyo-mukwaŵo ati: Nsiisi ukuliluŵula pakuti pali neŵo nemwine, niiŋgesa kufuluŋganye'wupyani bwanji nemwine: mupoke mweŵo uŵukulu bwanji ubwakuluŵula; pakuti tesi ndiluŵule.

⁷ Lomba akale ukwisiŵila muIsilaeli ukwakuluŵula nekwakusitula, mukulunduŵika ifintu fyonse, kwali nikuku: umuntu aŋgafule'nsapato yakwe nekumupelo'muŵyakwe; uko ekwisiŵila kwakusuminina muIsilaeli.

⁸ Popele apo uyo-mukwaŵo walilaŵile kuli Boasi ati: Muliulile mweŵene. Naye kaafule'nsapato yakwe.

⁹ Peŋka Boasi walilaŵile kuŵakulu nakuŵantu ŵonse, ati: Mweŵo nimwemboni akasuŵa kalelo, ati ndifyulile ifyali fyakwe Elimeleci fyonse, nafyonse ifyali fyakwe Cilyoni naMaloni, kuminwe yakwe Naomi.

¹⁰ Nakaŵili naLufi umuMoabi, muka-Maloni, ndimuulile ati akaŵe mukasi wanji, mukwimicila isina lyaufwile paŵupyani bwakwe, ati isina lyaufwile liiŋgesa kupinikwa pakati kaŵakwaŵo, napamusiko pakwe: mweŵo nimwemboni akasuŵa kalelo.

¹¹ Popele aŵantu ŵonse aŵali kumusiko pamo neŵakulu ŵalilaŵile ati: Nifwemboni. ŴaYawe ŋgawamwalule uyu-mwanakasi uwainjila muŋanda yoŵe ati akaŵe koti niLaceli naLea, aŵo ŵoŵilo aŵeŵeke iŋanda yakwe Isilaeli; namweŵo ŋgamulukucite'fyelelwe muEfilata, ŋgamuŵe nempupo muBetelemi;

¹² iŋanda yenu ŋgaiwe koti niŋanda yakwe Pelesi, uyo Tama amufyalile Juda, kuŵana aŵo aŵa ŵakakupela ŵaYawemumwanakasi uyu.

¹³ Fyopele'fyo Boasi walimupokele Lufi, naye waliŵele mukasi wakwe; naye waliinjile muli ye, lomba ŵaYawe walimupele ukwimita, naye walifyele umwana umwalalume.

¹⁴ Popele apo aŵanakasi ŵalilaŵile kuli Naomi ati: Ŋgaŵalukucindeme ŵaYawe, aŵataŵamusileni nalelo mweŵakuŵulo'mukwanu ukwakuti, isina lyakwe ŋgaliŵe nempupo muIsilaeli.

¹⁵ Lomba akamuŵeleni wakubwesesyo'mweo, wakumuleleni ili mucekwile: pakuti umulokasi wenu umutemenweni ucilile ukumuwamineni napaŵana aŵalalume ŵasanu naŵaŵili, ewamufyala.

¹⁶ Peŋka Naomi walipokele umwana, nekumuŵika pantiŵi yakwe, nekuŵa mulelesi wakwe.

¹⁷ Lomba aŵanakasi aŵaŵyakwe ŵalimwilicile isina, nekulaŵila ati: Kwaŵafyalilwa ŵaNaomi umwana umwalalume; naŵo ŵalimwilicile isina lyakwe ati niObedi: Obedi ewisi Jese, wisiŵo ŵaDafidi.

¹⁸ Lombe'fitentekwa fyakwe Pelesi nififi: Pelesi walimufyele Esiloni;

¹⁹ Esiloni naye walimufyele Lama, naLama naye walifyele Aminadabi;

²⁰ Aminadabi naye walifyele Nakasyoni, naNakasyoni naye walifyele Salimoni;

²¹ Salamoni naye walifyele Boasi, naBoasi naye walifyele Obedi;

²² Obedi naye walifyele Jese, naJese naye walimufyele Dafidi.