Lufi 3 - Amashiwi Aba Lesa

¹ Popele apo ŵaNaomi ŵanyinafyala ŵalilaŵile kuli ye ati: Wemwana wanji, kansi tesi ŋkufwaile-po ukutusya ati fikaŵe kuli wewo?

² Kani ŵukumo takuli-po Boasi umukwasu, uyo aŵantu ŵakwe aŵanakasi wali naŵo weŵo? Ŵona, ŵuno-ŵusiku akwelela amabali umwakupumina.

³ Kosamba lomba, usuŵe amafuta, ukafwale, lomba ukayeko ukwakupumina amabali; sombi tekulilanjisya kumuntu uyo, ili taaŋgasile'kulya nekunwa.

⁴ Popele apo, pakulala ye, wakuŵona bwino apalukulala ye, eli wakwinjila, wakufimbula-po pamakasa akwe, wakulala nawe; popele apo akukuŵule'fyo ifi uŋgacita.

⁵ Naye walilaŵile kuli ŵo ati: Fyonse'fyo ifi ulukulaŵila nakulukuficita.

⁶ Naye waliselucile ukuya umwakupumina'mabali, nekucita fyonse koti nifyefyo ifi ŵamuŵulile ŵanyinafyala.

⁷ Popele ili alile nekunwa Boasi, nekusaŋgalala mumutima wakwe, eli aile mukulala apapelele umupili wamabali; naye Lufi waliisile bwino bwino, nekufimbula-po pamakasa akwe, nekulala.

⁸ Popele apo, pakati kaŵusiku, uyomuntu walitinine, nekwaluka; lomba nikumwanakasi alilele kumakasa akwe,

⁹ Naye Boasi ati: Weŵo niwenani? Naye nekwasuka ati: NineLufi, nemusya wenu; mfimbeni-po lomba, nemusya wenu, iŋguŵo yenu, pakuti mweŵo muli ŵalamu ŵesu ukwakuti.

¹⁰ Naye ati: Ŋgolukusyucile kuli ŵaYawe, wemwana wanji; ulibwenesye apapelele iŋkumbu isyakucilo'bwinji napakutaŋga, pakuti tawakoŋkele awasaŋkwa neli ŵapeŋgele neli ŵaŵile.

¹¹ Lomba ŵukumo, wemwana wanji, witina; nakukucita koti nifyefyo fyonse ifi ulaŵila; pakuti umusi wonse uwaŵakwaŵesu uliisiŵile ati weŵo uli mwanakasi uluŋgeme.

¹² Lomba ŵukumo fyacine ati ninemulamu woŵe; naŋgawe'fyo epwali naumbi umulamu woŵe ukwakuti.

¹³ Usyale ŵuno-ŵusiku, lombo'lucelo kani akakuŵela ŵumulamu, fikawama; ŋgaakacite ifyaŵumulamu; sombi kani tesi akakuŵele ŵumulamu, lomba neŵo eli ŋkakuŵele ŵumulamu, koti nifyefyo ifi ŵali nemweo ŵaYawe; ulukulala ukufiko'lucelo.

¹⁴ Naye walilele kumakasa akwe ukuficilo'lucelo; nekuŵuka pacifitile lomba tapaŋgawa nembonanino. Pakuti Boasi walilaŵile ati: Fiiŋgatulika ati umwanakasi waliisile kuciŵansa icakupumina-po.

¹⁵ Kaŵili alilaŵile ati: Lete'nsalu iyi ulifimbile-po, wikate; naye Lufi waliikete-ko; popele Boasi aliesesye ifyakwesya fisanu nacimo ifyamabali, nekumutwika; eli aŋgaya Boasi kumusi.

¹⁶ Popele, pakufika Lufi kuli ŵanyinafyala, ŵalilaŵile ati: Niwenani, wemwana wanji? Popele aliŵaŵulile fyonse'fyo ifi amucitile uyo-muntu.

¹⁷ Kaŵili alilaŵile ati: Ali ampele'fyakwesya fyamabali ifi fisanu nacimo; pakuti ali alaŵila ati: Tekuya minwe lukoso kuli ŵanokofyala.

¹⁸ Popele naŵo ati: Ikala lukoso, wemwana wanji, ili tauŋgesiwa umu cakuŵela iceŵo; pakuti uyo-muntu teti atusye, ili taaŋgacisilisye' ceŵo aka-kasuŵa' ceŵo aka-kasuŵa.