Lufi 2 - Amashiwi Aba Lesa

¹ Lomba Naomi wali nemukwaŵo umulume wakwe, umuntu umusambasi ukwakuti, uwamucikoto cakwe Elimeleci; isina lyakwe niBoasi.

² Popele Lufi umuMoabi walilaŵile kuli Naomi ati: Ŋgandukuya ŵukumo kumaŵala, ndukupupwila-mo mumitwi yamabali, ili mulondo'yo uŋkabwena-mo muli uluse pamenso pakwe. Naye Naomi walilaŵile kuli ye ati: Koya, wemwana wanji.

³ Naye waliile, nekufika, nekulukupupula mwiŵala panuma yaŵakuteŵula; lomba wali nesyuko lyakufika peŵala apo apakwe Boasi, uwali mucikoto cakwe Elimeleci.

⁴ Peŋka, ŵoneni, Boasi walifumine kuBetelemi nekwisa nekulaŵila kuŵakuteŵula ati: ŴaYawe ŵekale nenu. Naŵo kaŵamwasuka ati: ŴaYawe ŵamusyucisyeni.

⁵ Popele apo Boasi walilaŵile kumuntu wakwe, icilolo cakwe icalukuŵekalika aŵakuteŵula, ati: Uyumwanakasi mwana wakwe nani?

⁶ Lombo'yo-mupyunjisi, uwalukuŵekalika aŵakuteŵula, waliasucile ati: Niwoyomwanakasi umuMoabi uwabwelele pamo naNaomi, pakufuma mucalo caMoabi;

⁷ walaŵila ati, Ndukumukombeteleni ati ŋgandukupupula, ndukolela panuma yaŵakuteŵula pakati pamipo yamabali; fyopele'fyo kaesa, kaalukucite'fyo ukutatiko'lucelo ukufika nakuli ŵuŵunoŵukumo, sombi wali watusya panini muŋanda.

⁸ Popele apo Boasi walilaŵile kuli Lufi ati: Tolukumfwa, wemwana wanji? Tekuya kumbi mukupupula, kaŵili tekupita ukufuma-po napapano, sombi kolukusyala pano apepi-pepi napaŵantu ŵanji aŵanakasi.

⁹ Amenso oŵe ŋgaalukuceta iŵala ilyo ŵalukutebwila-mo, ulukuŵalonda; kansi nsiliŵaŵulile aŵasaŋkwa ati ŵekucita neli kantu? Kaŵili pakumfwe'cilaka, ukaye kumanoŋgo, ukanwine-mo muli ayo aŵatapile aŵasaŋkwa.

¹⁰ Popele Lufi waliwilile ubwifuneme, nekwinamisya pansi, nekulaŵila kuli ye ati: Mbanindo mbwene uluse pamenso enu, ati mulukundaŋguluka, kamubwene ndi mwensu?

¹¹ Lomba Boasi walimwasucile ati: Kale ŵandanjisisye bwino fyonse'fyo ifi waŵacitile ŵanoko-fyala ukufuma kumpindi yamfwa yamulume woŵe; nafyefyo ifi waŵasile ŵawiso naŵanoko necalo ico wafyalilwe-mo, nekwisa nakuŵantu aŵamukoka umbi aŵa tawaisiŵile nekale.

¹² ŴaYawe ŵakulambule pakuti pamilimo yoŵe, kaŵili ukulambula ukwakukumana ŵakupele ŵaYawe, Lesa wakwe Isilaeli, aŵo wisile mukuyuŵila mumapindo aŵo.

¹³ Popele Lufi ati: Ŋgansaŋgane uluse pamenso enu, sikulu wanji; pakuti mwansaŋgalasya, napakuti mwalaŵila neŋkumbu kumusya wenu, naŋgawa ati nsipalene nemuntu wenu umbi umwanakasi.

¹⁴ Lomba pampindi yakulya, Boasi walilaŵile kuli ye ati: Isa kuno, ulukulye'filyo, ulukutanta-mo muli finega umukusu. Popele waliikele pamo neŵakuteŵula; naŵo ŵalimufisisye tiligu uwakoca, naye walilile, nekwikuta, nekusya-po.

¹⁵ Popele pakwima Lufi mukupupula, Boasi waliŵaŵulile awasaŋkwa ŵakwe ati: Ŋgaalukupupula napakati pamipo, tekumukanya,

¹⁶ Kaŵili mukamufumisye-mo ambi amabali mumipo, mukaasye; ŋgaalukupupula, tekumukanya.

¹⁷ Fyopele'fyo alipupwile mwiŵala ukuficile'ciŋgulo; lomba nekupume'fyo ifi apupwile, nafyo kafikumana ukwesya efa umo uwamabali,

¹⁸ Naye waliaŵulile, nekuya kumusi; popele ŵanyinafyala ŵalifibwene ifyo apupwile; naye waliletele nekuŵapele'fyo wasile-po pakwikuta.

¹⁹ Peŋka ŵanyinafyala ŵalilaŵile kuli ye ati: Mbawapupwila-pi lelo? Mbawacitila kwisa imilimo? Ŋgaalukusyuko'yo uwakulaŋguluka weŵo! Lomba waliŵaŵulisisye ŵanyinafyala ifyawoyo uyu acitile nakwe imilimo, nekulaŵila ati: Isina lyawoyo-muntu unacita nakwe imilimo lelo niBoasi.

²⁰ Popele Naomi walilaŵile kumulokasi wakwe ati: Ŋgaalukusyucila kuli ŵaYawe awatawaŋgaleke'ŋkumbu syaŵo isyakuŵalaŵi nesyakuŵafwile. Kaŵili Naomi walilaŵile kuli ye ati: Uyo-muntu wamucikoto cesu, umbi umukwasu ukwakuti.

²¹ Lufi naye umuMoabi ati: Icine, alilaŵile kuli neŵo ati: Wakulukusyala apepi-pepi napaŵantu ŵanji awasaŋkwa, ili taŵaŋgasilisyo'kuteŵula kwanji konse.

²² Popele Naomi walilaŵile kuli Lufi umulokasi wakwe ati: Fiweme, wemwana wanji, ati ulukwenda neŵantu ŵakwe aŵanakasi, ati ŵo tekukusaŋga mwiŵala limbi.

²³ Fyopele'fyo walisyele apepipepi napaŵantu ŵakwe Boasi aŵanakasi ukulukupupula ukuficilo'kusila kwakuteŵula kwamabali nekwatiligu; naye waliikele pamo naŵanyinafyala.