Joeli 2 - Amashiwi Aba Lesa

¹ Kamulisyo'lupeŋga muSayoni, muwele iŋgwele palupili lwanji uluswetelele; injikale syonse isyamucalo ŋgasitutume; pakuti akasuŵa kaŵaYawe kalukwisa, pakuti kali apepipepi;

² kasuŵa kamfinsi nematesi; kasuŵa kamakumbi nemfinsi itikeme, koti kuca ukutandaŵele pamapili; aŵantu ŵakulu, ŵalikosele; tapaŵele nekale konse aŵakuŵe'fyo, kaŵili tapakaŵa-po liŵili aŵakupalana naŵo, ukufika imyaka yafitentekwa ifinji.

³ Umulilo ulukulya pamenso aŵo; kaŵili panuma yaŵo icaka cilukwaka. Pamenso aŵo icalo cilipalene neŵala lyaEdeni, lomba panuma paŵo pali impanta iyonawilwe; icine, tapali-po icakupuluka kuli ŵo.

⁴ Ukuŵoneka kwaŵo kuli koti kuŵoneka kwaŵakafwalo; kaŵili ŵalaŵutuka koti ŵapali ŵakafwalo.

⁵ Ŵalasotoka koti cipupa caŋgolofwana peulu pamapili, koti cipupa cacaka camulilo icilukoca icani icumine, koti ŵantu aŵakosele aŵaansicilwe limo ukulwa.

⁶ Pakufika ŵo aŵantu ŵalomfwe'nsoni isikulu; pamenso paŵo ŵonse nekuŵa necenswa.

⁷ Ŵalaŵutuka koti ŵalalume ŵaŋkosa; ŵalanina paciŵumba koti ŵalalume ŵaŋkondo; ŵonse ŵalenda pantanjile pansila syaŵo aŵene; taŵafuma-po pamiloŋgo yaŵo.

⁸ Kaŵili taŵasindikansyanya, ŵaŵa; ŵonse ŵalenda pantanjile umo umo pansila yakwe umwine; lomba ŵalapusya-mo mufyakulifuna-ko; taŵafuma-mo munsila yaŵo.

⁹ Ŵalasotoka napamusi, nekuŵutuka peulu paciŵumba, nekuninina nakumaŋanda, nekwinjila napatumbeluka koti nisilumfundi.

¹⁰ Icalo cilateŋkana pamenso aŵo; amaulu nao nekututuma; nekasuŵa nemwensi kaŵili nekuŵa bwii, netuŵaŋgaŵaŋga nato nekuleka ukutuŵa kwatuko;

¹¹ omba ŵaYawe kaŵalaŵila nesiwi lyaŵo pamenso eŵumba lyafita fyaŵo; pakuti icisasa caŵo cikulu ukwakuti; pakuti ŵalikosele ŵo aŵacita koti lisiwi lyaŵo; pakuti akasuŵa kaŵaYawe kakulu, kakutinisyo'kwakuti; lomba ninani uŋgakakutika?

¹² Naŋgaŵe'fyo naŵukumo, efilukulaŵila ŵaYawe, kamwalulucila kuli neŵo nemutima wenu wonse, ili mulukulifina, muli neminsosi nekuŵombomana;

¹³ kamupanduka umutima wenu, ifyakufwala fyenu fyefi; mwalulucile kuli ŵaYawe Lesa wenu; pakuti ŵo ŵaluse, ŵaliiswile iŋkumbu, ŵalakokolo'kufitwa, ŵali nebwinji bwacifuto; kaŵili ŵalomfwile'nsoni ifyakuŵifya.

¹⁴ Ninani uwisi ati cipale ŵakaaluluka, nekusasa, nekusya munuma yaŵo ukusyucisya, emulambu wawuŋga nemulambu wakunwa mukuŵacindika ŵaYawe Lesa wenu?

¹⁵ Kamulisyo'lupeŋga muSayoni, muswesye ukulifina, mwite iwuŋgano lyansoni;

¹⁶ muwawuŋganye aŵantu, muŵaswesye awewuŋgamo, muwaloŋganye aŵalalume aŵacekulu, muwawuŋganye aŵanice newakoŋka'mawele, Uwakuupa ŋgaafume mucipinda cakwe, newakuufiwa nave ŋgaafume mukapinda kakwe.

¹⁷ Aŵapapatilisi, aŵapyunjisi ŵaŵaYawe, ŋgaŵalile pakati pacilyaŋgwa neconto, ŋgawalawile ati, Muŵapulusye aŵantu ŵenu, mweŵaYawe, tekuposa uŵupyani bwenu mukutoŋgalwa, ati aŵenafyalo ŵaŵekalike. Mbanindo ŵaŋgalawilila pakati paŵantu ati, MbaŵaLesa ŵaŵo ŵali kulipi?

¹⁸ Popele apo ŵaYawe waliŵele neŵukwa pakuti pacalo caŵo, nekuŵomfwile'nsoni aŵantu ŵilŵo.

¹⁹ Naŵo ŵaYawe ŵaliasucile nekulaŵila kuŵantu ŵaŵo ati, Ŵoneni, ŋkamutumineni amasaka nemfaina nemafuta, eli mukekuta kuli fyo; tekuti muleŋgesyeni cakutoŋgalwa pakati pamikoka yaŵantu;

²⁰ sombi ŋkafumya ukutali kuli mweŵo iŵumba lyafita ilyakunofu, nekulitamfya ati liye kucalo campanta iconawilwe; necapantanjile calilyo nekuya kucisiŵa icakumutulesuŵa, nacapanuma calilyo nekuya kucisiŵa icakumbonsi; peŋka ukunuŋka kwalilyo kukafutuma, nebwema bwalilyo uŵuŵipile nekufutuma; pakuti lyacita ifintu ifikulu.

²¹ Witina, wecalo, ulukusemba nekulukusaŋgalala; pakuti ŵaYawe ŵacita ifintu ifikulu.

²² Mwitina, mwenama syamumpaŋga; pakuti ifyembelelo ifyapampanta filukumena; pakuti umuti ulukwikata nefisepo, nemukuyu nemufaina nayo nekusaŋguka nemakosa aiyo.

²³ Kamusaŋgalala lomba, mweŵana ŵakuSayoni, musembele muli ŵaYawe, Lesa wenu; pakuti ŵalamupeleni imfula yakutaŋga ukwesya ukuluŋgeme, nekumulokesyeni imfula, emfula yakutaŋga nemfula yakupela-ko, pamwensi wakutaŋga,

²⁴ Lomba ifiŵansa fikesula tiligu, nematala nao nekupokomoka imfaina nemafuta.

²⁵ Kaŵili ŋkamubwesesyeni imyaka iyo ulusye lwalya, neluteŋgute, necisimu, neciloŋgolo, iŵumbe'lyo ilikulu ilyo natumine pakati pali mweŵo.

²⁶ Popele mukalukulya ifinji nekwikuta, nekulukucindika isina lyaŵaYawe Lesa wenu, aŵalukumucitileni ifyakukaŋkamana; lomba aŵantu ŵanji tekuti ŵaŵe nensoni insiku syonse lukoso.

²⁷ Peŋka mukesiŵa ati neŵo ndi pakati pali Isilaeli, nakaŵili ati neŵo nineŵaYawe Lesa wenu; tapali-po naumbi; lomba aŵantu ŵanji tekuti ŵaŵe nensoni insiku syonse lukoso.

²⁸ Popele pakaŵa pantanjile ati ŋketila-po umupasi wanji paŵamunefu ŵonse; popele aŵana ŵenu aŵalalume neŵanakasi ŵakalukusimika, neŵacekulu ŵenu aŵalalume ŵakalukulote'filoto, newasaŋkwa ŵenu naŵo ŵakalukuŵona ifyakuŵona;

²⁹ icine napaŵapyunjisi aŵalalume neŵanakasi ŋketila-po ifyamupasi wanji pansiku isyo.

³⁰ Kaŵili ŋkalanjisya ifyakukaŋkamana mwiulu napacalo capansi, imilopa nemulilo neŋkumbi syacusi.

³¹ Akasuŵa kakaaluka nimfinsi, nemwensi nawo milopa, ili takaŋgesa akasuŵa kaŵaYawe ako akakulu akakutinisya.

³² Popele fikaŵa kuŵantu ŵonse ukalilila isina lyaŵaYawe ati akapuluka; pakuti palupili lwaSayoni namuJelusalemi pakaŵa aŵakapuluka-po, koti nifyefyo ifyalaŵile ŵaYawe; nakaŵili pakati paŵakusyala-po pakaŵa aŵakwitwa kuli ŵaYawe.