Joeli 1 - Amashiwi Aba Lesa

¹ Ndi isiwi lyaŵaYawe ilyaficile kuli Joeli umwana wakwe Petuyeli.

² Kamumfwe'fi, mweŵacekulu; mulukukutika, mwense mwenjikale syamucalo. Kani ifi fyaŵa pansiku syenu, kani nipansiku syaŵawisinwe?

³ Muŵaŵule aŵana ŵenu ifyakuli fyo, neŵana ŵenu naŵo ŋgaŵaŵule aŵana ŵaŵo, neŵana ŵaŵo kaŵili ŋgaŵaŵule aŵacitentekwa cimbi.

⁴ Ifyo ifi casya iciloŋgolo, ulusye lwafilya; nafyefyo nafyo ifi lwasya ulusye, inteŋgute yafilya; nafyefyo kaŵili ifi yasya inteŋgute icisimu cafilya.

⁵ Ŵukeni mweŵapendwesi, mulukulila; kamusowakana mwense mwemulukunwa imfaina, pakuti pamfaina yanse; pakuti yapinikwa namukanwa kenu.

⁶ Pakuti umukoka waŵantu waninina napacalo canji, uwamakosa, uwabwinji ubwakuŵulo'kupendeka. Ameno auo meno aŋkalamu; uli nemeno amumucendwa aŋkalamu ikulu.

⁷ Waŋgonawila umufaina wanji nekumfundila umukuyu wanji icipapwa; walifuŵula lukoso fuŵu nekuuposa; imitano yauo yaŵa tuu.

⁸ Kamulila koti nimoye ufwite ifikundulu pakuti pawakumwambisya.

⁹ Umulambu waŵuŋga nemulambu wakunwa wapinikwa kuŋanda yaŵaYawe; lomba aŵapapatilisi, eŵapyunjisi ŵaŵaYawe, ŵalukulila.

¹⁰ Iŵala lilionawilwe, necalo nekulila; pakuti amasaka aliposaicile, nemfaina yaŵukumo nayo nekupwa, nemafuta nao nekunaka.

¹¹ Muŵe nensoni, mweŵalimi; kamusowakana mweŵalimi ŵamifaina, pakuti pali ŵatiligu namabali; pakuti ukuloŋgela ukwakwiŵala kwaonaika.

¹² Umufaina wauma, nemukuyu nawo nekunaka; kaŵili limono pamo nelala nemusuku, emiti yonse iyamumpaŋga yauma; pakuti ukusemba kuliuminine ukufuma muŵana ŵaŵantu.

¹³ Kamufwala ifikundulu, mulukulila, mweŵapapatilisi; kamusowakana, mweŵakucipyunjila iconto; iseni, mulale uŵusiku ŵonse ili mufwite ifikundulu, mweŵapyunjisi ŵaŵaLesa ŵanji; pakuti umulambu waŵuŋga nemulambu wakunwa ulikenwe muŋanda yaŵaLesa ŵenu.

¹⁴ Kamuswesya ukulifina, mwite iŵuŋgano lyansoni, muŵuŋganye aŵacekulu nenjikale syonse syamucalo kuŋanda yaŵaYawe Lesa wenu, mulukuŵalilila ŵaYawe.

¹⁵ Lisyamo kukasuŵa ako! Pakuti akasuŵa kaŵaYawe kali apepi; kakafika koti konalwa ukufuma kuWamakosa onse.

¹⁶ Kansi ifyakulya tafilipinicilwe pamenso esu, icine, ukusemba nekusaŋgalala ukufuma kuŋanda yaŵaLesa ŵesu?

¹⁷ Imbuto silukuŵola pansi pamasime asiko, nefipuŋgu nafyo nekonalwa, nematala nao nekutoŵalwa; pakuti amasaka aliuminine.

¹⁸ Mbokutoŋgela kwanama! Amataŋga aŋombe alukukaŋkamana, pakuti taakwete neli cembelelo; icine, amataŋga ambelele nekonalwa.

¹⁹ Mweŵa Yawe ndukumulilileni mweŵo; pakuti umulilo walya ifyembelelo ifyamumpanta, necaka naco caoca imiti yonse iyamumpaŋga.

²⁰ Icine, inama isyamumpaŋga silukumupemasicileni; pakuti imiloŋga yamenda yapwa; kaŵili umulilo walya ifyembelelo ifyamumpanta.