Jobo 1 - Amashiwi Aba Lesa

¹ Ekwali umuntu uwamucalo caUse, isina lyakwe niJobo; uyo-muntu wali uwaminine, uluŋgeme, uwakutina ŵaLesa nekukanamina ifiŵipile.

² Nakaŵili ŵalifyelwe kuli ye aŵana aŵalalume ŵasanu naŵaŵili, neŵanakasi ŵatatu.

³ Amaŵoni akwe kaŵili alikumene imbelele imyanda amakumi asanu naaŵili, neŋgamela imyanda amakumi atatu, neŵasiŵe ŵaŋombe siŵili siŵili imyanda isanu isikacilwe kufikoŋkoli, nemboŋgolo isyanakasi imyanda isanu, pamo neŵantu aŵamuŋanda aŵakuti ubwinji; fyopele' fyo uyo-muntu alicilile uŵuleme neŵukulu paŵantu ŵonse aŵakumutulesuŵa.

⁴ Peŋka aŵana ŵakwe aŵalalume ŵalukulya icitenje mwaŵo mwaŵo, ŵonse umo umo koti kasuŵa kakwe; naŵo ŵalisiitile iŋkasi syaŵo syotatu ati siise silye sinwe pamo naŵo.

⁵ Lomba paliŵele ifi, pakusila insiku syafitenje fyaŵo, ati Jobo walukutuma nekuŵaswesya, nekwimo' lucelocelo, nekuposa imilambu yakoca koti kupenda ŵo ŵonse umo umo; pakuti Jobo alieŵele ati: Cipale neli aŵana ŵanji ŵaliŵifisye, nekukana ŵaLesa mumitima yaŵo. Lombe'fyo alukucita Jobo impindi yonse.

⁶ Peŋka paliŵele akasuŵa kambi ati aŵana ŵaŵaLesa ŵaliisile mukulilanjisya pamenso aŵaYawe; naSatana naye nekwisa mwiŵumba lyaŵo.

⁷ Kumfwa ŵa Yawe ŵalilaŵile kuli Satana ati: Mbawafuma kulipi? Eli Satana aŵaasucile ŵaYawe nekulaŵila ati: Uko nalukupitana-pitana pacalo capansi, uko nalukwenda-enda muli co.

⁸ Naŵo ŵaYawe nekulaŵila kuli Satana ati: Kani walukwalakanya ifyakumuntu wanji Jobo? Pakuti tapali-po umbi upalene nakwe pacalo capansi, umuntu uwaminine, uluŋgeme, ulukutina ŵaLesa nekukanamina ifiŵipile.

⁹ Popele Satana nekuŵaasuka ŵaYawe nekulaŵila ati: Kani Jobo alukuŵatina ŵaLesa apakuŵula'kantu?

¹⁰ Kansi tamumusiŋgulwisye neluŵao ponse ponse pali ye, napananda yakwe, napali fyo fyonse ifi ali nafyo? Kaŵili mwaisyucisya imilimo iyakuminwe yakwe, nemaŵoni akwe nao alukufunuka mucalo.

¹¹ Sombi ŋgamutambike ukuŵoko kwenu ŵukumo, mutintile-po pali fyo fyonse ifi akwete, peŋka akamukaneni pamenso enu.

¹² Lomba ŵaYawe ŵalilaŵile kuli Satana ati: Ŵona! fyonse'fyo ifi akwete fili muŵukulu ŵoŵe; sombi pali ye umwine tekutambika-po iminwe yoŵe. Peŋka Satana kaafuma pamenso aŵaYawe.

¹³ Popele akasuŵa kambi lomba aŵana ŵakwe aŵalalume neŵanakasi ŵalukulya nekunwa imfaina muŋanda yamukulu-ŵantu umwalalume,

¹⁴ paliŵele ati yaliisile iŋkalamba kuli Jobo, nekulawila ati: Iŋombe syalukulima, nemboŋgolo nekulukulya apepi pali syo:

¹⁵ lomba aŵaSabayimi nekusisakamucila nekusitapa; icine, neŵapyunjisi naŵo nekuŵepaya kukutwa kwampoko; peŋka nineŵo neŋka enenapuluka-ko mukumuŵuleni.

¹⁶ Lomba ili icilaŵila iyo, paliisile naimbi kaŵili, nekulaŵila ati: Umulilo waŵaLesa wapona mwiulu, waocelela imbelele pamo neŵapyunjisi, ŵapililila: peŋka nineŵo neŋka enenapuluka-ko mukumuŵuleni.

¹⁷ Kaŵili ili icilaŵila iyo, paliisile naimbi nayo, nekulaŵila ati: AŵaKalidaya ŵalicitile ifikoto fitatu, nekusakamucila iŋgamela, nekusitwala; icine, neŵapyunjisi naŵo ŵaŵepaya kukutwa kwampoko; peŋka nineŵo neŋka enenapuluka-ko mukumuŵuleni.

¹⁸ Lomba ili icilaŵila yo, naimbi nayo kaŵili kaifika, kailaŵila ati: Aŵana ŵenu aŵalalume neŵanakasi cŵalukulya nekunwa imfaina muŋanda yamukulu-ŵantu umwalalume;

¹⁹ peŋka cali caisa icipupu icikulu icatulila kwiwesa, naco nekulikuŋka kumikoŋko yonane yananda, fyopele'fyo yali yawila pawasaŋkwa, naŵo ŵafwa; peŋka nineŵo neŋka enenapulukako mukumuŵuleni.

²⁰ Elyo Jobo aimine, nekukwamuna kaminsa wakwe, nekuŵeyo'mukunyu, nekuwila pansi pamusili, nekucindika;

²¹ nekulaŵila ati: Uwalondwa lukoso nafumine munda yaŵamama, kaŵili uwalondwa lukoso eko ŋkabwelela. ŴaYawe ŵalipele, niŵaYawe kaŵili eŵapokolola; isina lyaŵaYawe licindikwe!

²² Muli fyefyo fyonse Jobo taaŵifisye tau, neli kuŵeŵa ŵaLesa ati ŵali nekutumpa, ii.