Ifyacitilwe 9 - Amashiwi Aba Lesa

¹ Sombi Saulu ili acipemasika ifyakuŵapatila nekuŵepaya aŵasambile ŵaŵaSikulu, aliile kumupapatilisi umukulu,

² nekulomba kuli ye iŋkalata isyakuya kuDamasiko kumasunagoge, ati kani ŋkasaŋge-ko ŵambi aŵali ŵaNsila iyi, kani ŵalalume kani ŵanakasi, ŋkawakake, mbalete kuJelusalemi,

³ Popele, pakuya ili enda, paliŵele ati alipalamine kuDamasiko; peŋka ukutuŵa ukwafumine kwiulu kwalipulilile ukumuŵyatila.

⁴ Naye aliwilile pansi, nekumfwa nesiwi lilukulaŵila kuli ye ati: Saulu, Saulu, mbanindo ulukuŋkululusisya?

⁵ Naye ati: Mbanimweŵanani, mweŵaSikulu? Kumfwa ati: NineŵaYesu aŵa ulukupensya: ukusaŵula iciŵambala coŵe kufyakusosala kulikatesye!

⁶ Naye alitutumine, nekukaŋkamana, nekulaŵila ati: MweŵaSikulu, mulukufwaya ati ncite' ndo? Naŵo ŵaSikulu ŵalilaŵile kuli ye ati: Ima, winjile mumusi, lomba fikalaŵilwa kuli weŵo ifyo ifyelelwe weŵo ukucita.

⁷ Kaŵili aŵantu aŵo, aŵo alukwenda naŵo, ŵaliimakene lukoso celele, pakuti ŵalukumfwe'siwi, sombi taŵabwene-po muntu.

⁸ Fyopele'fyo Saulu nekupatamuka; peŋka pakutapuka, taabwene-po neli kantu; naŵo ŵalimukulicile, nekumwinjisya muDamasiko.

⁹ Naye aliikele uwakuŵulo'kulaŵa insiku sitatu; taalile-po neli kunwa konse koku.

¹⁰ Ekwali umbi umusambile kuDamasiko, isina lyakwe niAnanaya; popele ŵaSikulu ŵalilaŵile kuli ye mukulota ati: Ananaya! Naye ati: Nineŵo, Sikulu!

¹¹ Kumfwa ŵaSikulu ŵalilaŵile kuli ye ati: Ima, uye kumuseŵo uwilicilwe ati Uluŋgeme, ukepusye muŋanda yakwe Juda, mukufwaya umuntu isina lyakwe niSaulu, umuntu wakuTaso; pakuti, ŵona, alukutembela.

¹² Lomba aŵona umuntu, isina lyakwe niAnanaya, alukwinjila nekumutintila iminwe yakwe, ati apoke ukulaŵa kwakwe.

¹³ Sombi Ananaya aliasucile ati: MweŵaSikulu, naliumfwile kuŵantu aŵenji ifyamuntu uyu, ifyakuŵifya ukukulu acitile kuwaluŋgeme ŵenu kuJelusalemi:

¹⁴ nakaŵili pano ali neŵukulu kuŵapapatilisi aŵakulu, ubwakuŵakaka ŵonse aŵalukulilila isina lyenu.

¹⁵ Sombi ŵaSikulu ŵalilaŵile kuli ye ati: Koya lukoso, pakuti uyu ninoŋgo isalulwilwe kuli neŵo, iyakupinta isina lyanji pamenso aŵenafyalo nemfumu neŵaIsilaeli naŵo;

¹⁶ pakuti ŋkamulanjisya ati ukumwelelwa ukusomenwa kufintu ifinji pakuti pesina lyanji.

¹⁷ Popele Ananaya alikumbulucile, nekwinjila namuŋanda iyo, nekumutintila neminwe, nekulaŵila ati: Wemukwasu Saulu, ŵaSikulu Yesu, aŵabwenekele kuli weŵo munsila umu waisile, eŵantuma neŵo, ati upoke ukulaŵa koŵe, wisule Umupasi Uswetelele.

¹⁸ Impindi iyo yopele, fyaliponene ifintu mumenso akwe koti mamba; naye alipokele nekulaŵa kwakwe; nekwima, nekuŵatisiwa;

¹⁹ kaŵili nekupoka ifyakulya, nekukosa. Popele apo aliikele insiku simbi pamo neŵasambile aŵali kuDamasiko;

²⁰ naye walipulilile ukulukutulisya mumasunagoge ati ŵaYesu Ŵana ŵaŵaLesa.

²¹ Peŋka ŵonse aŵamumfwile ŵalikaŋkamene, nekulaŵila ati: Kansi uyu teye ulya uwalukonala aŵo aŵalukulilila isina ili kujelusalemi? Kaŵili aliisile kuno ati ŋkawakake aŵantu mbatwale kuŵapapatilisi aŵakulu.

²² Sombi Saulu alikulile nemakosa ukwakucila, nekuŵakaŋkamika aŵaJuda aŵaikele kuDamasiko, nekulanjisya ati aŵa niŵaKlistu.

²³ Lomba, pakukumana insiku isinji, aŵaJuda ŵalifundene ati tumwipaye.

²⁴ Sombi ukwalika kwaŵo kwaliisiŵilwe kuli Saulu. Ŵalukuceta pamisiko yeliŋga pakasuŵa napaŵusiku, ati ŋgatumwipaye.

²⁵ Sombi aŵasambile ŵakwe ŵalimutwite uŵusiku, nekumupusya mwiliŋga, ukumuselusisya mucitundu.

²⁶ Popele, pakufika kuJelusalemi, aliesesye ukukumaŋkana neŵasambile; sombi ŵonse ŵalimutinine, pakuti taŵacetekele ati naye musambile.

²⁷ Sombi Banaba alimupintile, nekumutwala kuntanjisi, nekusiŵulisisya ifi abwene ŵaSikulu munsila, ati ŵalilaŵile kuli ye; nefi alukuŵulisisya mwisina lyaŵaYesu nemutima ukosele kuDamasiko.

²⁸ Popele apo ali nasyo pakulukufuma napakulukwinjila mu Jelusalemi,

²⁹ ili asimika nemutima ukosele mwisina lyaŵaSikulu; kaŵili alukulaŵila nekuŵapicisisya aŵaEla aŵaalucile ŵaJuda. Sombi aŵo ŵalukwesyo'kumwipaya.

³⁰ Popele awana-ŵaŋkasi, pakwisiŵe'fyo, ŵalimutwite kuKaisalia, nekumutuma kuTaso.

³¹ Nalyo ikelesya ilyali monse mucalo caŵena-Juda namuGalili namuSamalya, lyaliikele neŵutende, nekwiŵakwa; lomba, pakulukwenda ili litonda ŵaSikulu nekusaŋgalala kuMupasi Uswetelele, lyalifulile.

³² Paliŵele ati Petilo, pakulukupitana ponse, alificile nakuwaluŋgeme aŵaikele kuLida.

³³ Kopele uko alisanjile umbi umuntu isina lyakwe niAinea, uwalukulala paŵulo bwakwe imyaka isanu naitatu, pakuti alikonaicile.

³⁴ Naye Petilo alilaŵile kuli ye ati: WeAinea, ŵaYesu Klistu ŵalukukuŵusya; ima, wansike uŵulo ŵoŵe! Naye nekupulutiokwima.

³⁵ Lomba ŵonse aŵalukwikala kuLida nakuSyaloni ŵalimubwene, nekwalulucila kuli ŵaSikulu.

³⁶ Sombi ekwali kujopa umusambile umbi, isina lyakwe niTabita, ilyakwaluka ati niDokasi; umwanakasi uyu alifulile imilimo iweme nefyaluse ifi alukupa.

³⁷ Paliŵele ati insiku isyo alilwele, nekufwa; popele aŵantu, pakumusamfya, ŵalimulalicile munande'yapeulu.

³⁸ Peŋka, pakuti umusi waLida wali apepi nakuJopa, aŵasambile, pakumfwa ati Petilo ekwali, ŵalitumine aŵantu ŵaŵili kuli ye mukumukombetela ati: Mwikokola ukwisa kuli fweŵo.

³⁹ Peŋka Petilo aliimine, nekuya naŵo. Ili aficile, ŵalimwinjisye munande'yo iyapeulu; neŵanakasi ŵamukamfwilwe naŵo ŵonse ŵaliimakene pali ye, ukulukulila, nekulanjisya iminjila nefyakufwala, ifyo ifi apasile Dokasi, ili alukwikala naŵo.

⁴⁰ Sombi Petilo aliŵafumisye-mo ŵonse, nekufukama pansi, nekutembela; naye nekwalucila kumufu uyo, nekulaŵila ati: Tabita, ŵuka! Naye nekusinsimuka; peŋka, pakumuŵona Petilo, alianducile.

⁴¹ Naye alitambicile ukuŵoko kwakwe, nekumwimya; popele aliŵetile aŵaluŋgeme naŵamukamfwilwe, nekuŵapela lomba mulaŵi.

⁴² Lomba ifyo fyaliumfwanicile monse muJopa; neŵantu aŵenji naŵo ŵalicetekele kuli ŵaSikulu.

⁴³ Popele apo Petilo aliikele insiku isinji kujopa, pamo naSimoni umunyucisi.