Ifyacitilwe 7 - Amashiwi Aba Lesa

¹ Peŋka'po umupapatilisi umukulu alilaŵile ati: Kani ifi fyacine?

² Naye Stefano nekwasuka ati: Mweŵakwasu, namweŵawisifwe, umfweni! ŴaLesa ŵaŵuleme ŵalibwenekele kuli wisifwe Ablaamu, ili aikele mucalo caMesopotamya, lomba taaŋgekala mucalo caKalani;

³ nekulaŵila kuli ye ati: Fuma-mo muno mwenu, namuŵakwanu, ukenjile mucalo ico ici ŋkakulaŋgal

⁴ Peŋka'po alifumine mucalo caŵaKalidaya, nekwikala mucalo caKalani; pantanjile, pakufwa ŵawisi, ŵaLesa ŵalimufumisye, nekumwinjisya mucalo cino, ici mwikele-mo mweŵo ŵukumo.

⁵ Sombi taŵamupele uŵupyani muno, neli panini apakukumana ukunyanta-po ulukasa lwakwe. Sombi ŵalilayene nakwe ati ŵakamupyanika icalo, nekuŵapyanika neŵana ŵakwe aŵamunuma yakwe, naŋgawa ati impindi iyo taakwetemwana.

⁶ Nakaŵili ŵaLesa ŵalilaŵile amasiwi akuŵe'fi, ati: Aŵana ŵoŵe ŵakalukwikala mucalo cimbi ubwensu, ŵakaŵateka muli ŵukalume, nekuŵakatasya imyaka imyanda ine.

⁷ Kaŵili ŵaLesa ati: Aŵantu aŵo aŵakaŵateka, neŵo ŋkasololola naŵo; lomba, pakusile'fyo, ŵakafuma-mo mucalo ico, nekwisa mukulukumpyunjila muno.

⁸ Naŵo ŵalimupele ukulayana kwakukopolwa; po pele Ablaamu alifyele Isaci, nekumukopola pansiku yaŵusisanu nasitatu. Isaci alifyele Yakobi; naye Yakobi alifyele ŵawisikulufwe ikumi naŵaŵili.

⁹ Peŋka ŵawisikulufwe aŵo ŵaliŵele necikani kuli Josefi, nekumuposa kucalo caIjipiti; sombi ŵaLesa ŵali nakwe,

¹⁰ nekumupulusya kukupeŋga kwakwe konse, nekumupela uluse nemano pamenso akwe Falo, imfumu yakuIjipiti; iyo nekumupela ŵucilolo ubwapacalo caIjipiti napananda yaiyo yonse.

¹¹ Popele yalikolele insala iyakawumbo monse mufyalo fyaIjipiti naKanani, nekupeŋgo' kwakuti; popele ŵawisifwe taŵabwenepo ifyakulya.

¹² Sombi Yakobi, pakumfwa ati kuIjipiti ekwali amasaka, alitumine ŵawisifwe palwendo lwakutaŋga.

¹³ Popele, pampindi iyi ŵaile-ko liŵili, Josefi aliisiŵilwe kuŵakwaŵo, nemukoka wakwe Josefi nekwisiŵikwa kuli Falo.

¹⁴ Peŋka Josefi alitumineaŵantu, mukwita Yakobi wisi, pamo neŵakwaŵaŵo ŵonse, aŵantu amakumi asanu naa ŵili naŵasanu.

¹⁵ Popele Yakobi aliile ku Ijipiti; nekufwa, ye naŵawisifwe.

¹⁶ Popele ŵaliŵatwite kuSyekemi, nekuŵasika mucilende, ici aulile Ablaamu umuulo wesilifa kuŵana ŵakwe Emoli kuSyekemi.

¹⁷ Sombi, pakupalamina impindi yakulaya uko uku ŵalayene ŵaLesa nakwe Ablaamu, aŵantu ŵalifyalulucile nekufunuka muIjipiti;

¹⁸ ukufika nakumpindi yakupyana imfumu imbi iyakuIjipiti, itayamwisiŵile Josefi.

¹⁹ Iyo yopele yaliŵacenjelele aŵamukoka wesu, nekuŵapensya ŵawisifwe, ati ŵapose utwana twaŵo utucece, ati twiŋgekala nemweo.

²⁰ Pampindi iyo naMose eli afyelwe, umuntu uwaŵulombe ukwakuti; nekulukumulelela muŋanda yaŵawisi imyensi itatu.

²¹ Popele, pakumuposa, umwana wakwe Falo umwanakasi alimutolele, nekumulela koti mwana wakwe umwine.

²² Kaŵili Mose ŵalimufundile amano onse aŵaIjipiti, nekuŵa nemakosa amasiwi neamilimo.

²³ Sombi, pakukumana imyaka yakwe apepi pamakumi ane, caliinjile mumutima wakwe ukulukwambala neŵakwaŵo, aŵaIsilaeli.

²⁴ Peŋka, pakuŵona umbi umuIsilaeli walukupensiwa, alimulamwinine, nekumulwila, nekumwipaya umuIjipiti uyo.

²⁵ Mose alukulaŋguluka ati lino aŵakwasu ŵaliisi ati ŵaLesa ŵalukuŵapulusisya kukuŵoko kwanji; sombi ŵo taŵaisiŵile'fyo.

²⁶ Popele ŋgamailo aliŵasanjile ŵambi ŵalukulwa, nekufwayo'kuŵalamwina, nekulaŵila ati: Mweŵantu muli ŵana-ŵaŋkasi, mbanindo mulukuŵifisyansyanya?

²⁷ Peŋka uyo uwataticile umuŵyakwe, alimusindicile Mose, nekulaŵila ati: Mbaninani uwakwikalicile weŵo uŵufumu ubwakusololole'milandu yesu?

²⁸ Naneŵo ulukufwayo'kunjipaya ifi waipeye umuIjipiti mailo?

²⁹ Naye Mose, pakumfwe'fyo, aliŵutucile, nekuya kwikala mucalo caŵaMidyani, uko eko afyalile aŵana aŵalalume ŵaŵili.

³⁰ Pakukumana imyaka amakumi ane, iŋkalamba yaŵaLesa yalibwenekele kuli ye mumpaŋga kulupili lwaSinai, mukati kamulilo mucinsokela.

³¹ Naye Mose, pakuŵone'fyo, alikaŋkamene lukoso; popele, ili apalamine mukufiŵona, lyaliumfwanicile isiwi lyaŵaSikulu ati:

³² Neŵo nineŵaLesa ŵaŵawisinwe, ŵaLesa ŵaŵaAblaamu nalsaci naYakobi! Popele Mose alitutumine, taakwete umutima uwakutontomeka-ko.

³³ Naŵo ŵaSikulu ŵalilaŵile kuli ye ati: Fule' ŋkwawilo syoŵe kumakasa, pakuti apo apa wimakene pali uŵuleme.

³⁴ Naŵona icine ukupeŋga kwaŵantu ŵanji, aŵali muIjipiti, nekumfwa ukutoŋgela kwaŵo; eli naseluka mukuŵapulusya. Pano isa; nakukutuma kuIjipiti.

³⁵ Uyo-Mose uyu ŵakene ati: Mbaninani akwikalika wewo uwufumu bwakusololole'milandu? wopele uyo ŵaLesa eŵatumine kuminwe yaŋkalamba, iyabwenekele kuli ye mucinsokela, ati ekale ŵufumu bwakupulusya.

³⁶ Uyo-muntu aliŵafumisye, pakucite'fimpelampela netwisiŵilo mucalo caIjipiti, namuCisiŵa Icikasicile, namumpaŋga imyaka amakumi ane.

³⁷ Uyo-Mose ewopele uyo uwalaŵile kuŵaIsilaeli ati: ŴaLesa ŵakamupyanicileni uwakusimika uwamwiŵumba lyaŵakwaŵenu, upalene naneŵo.

³⁸ Uyo wopele ewalukwikala neŵumba mumpaŋga lukoso, pamo neŋkalamba iyalaŵile nakwe palupili lwa Sinai, naŵawisifwe; uyo alipokele ifyeŵo fyamweo ifyakutupela fweŵo.

³⁹ Sombi ŵawisifwe ŵalukukano'kumusuminina, nekumusindika ati afume; nemitima yaŵo nekusyololoka ukulola kuIjipiti,

⁴⁰ ili ŵalaŵila kuli Aloni ati: Mutuŵumbile ŵalesa aŵakututanjilila, pakuti uyo-Mose uwatufumisye mucalo caIjipiti tatwisi uko ele.

⁴¹ Peŋka insiku isyo ŵaliŵumbile icipalile umwana waŋombe, nekuciletele'milambu iciŵumbwaŵumbwa, nekulukusemba pakuti pamilimo iyakuminwe yaŵo.

⁴² Sombi ŵaLesa ŵalialucile nekuŵaleka ati ŵacindike amaŵumba amwiulu, koti nifyopele' fyo ifyalembelwe mwibuku lyaŵakusimika ati: Mwecikoto caŵaIsilaeli, mwalintambicile inama isiipailwe Nemilambu imyaka amakumi ane mumpaŋga?

⁴³ Mwalipintile isema lyakwe Moleci, Nekawaŋgawaŋga kakwe lesa Lemfani, Ifyo-fiŵumbwaŵumbwa ifi mwaŵumbile mukucindika; Lomba ŋkamutwaleni bwisilya lyaBabiloni.

⁴⁴ Ŵawisifwe ŵali nesema mumpaŋga ilyakulayana, koti nifyopele'fyo ifi ŵaansicile aŵalaŵile kuli Mose ati, Ukaliiŵake koti kesiŵilo ako waŵona.

⁴⁵ Ilyo lyopele ŵawisifwe mukukoŋkana kwaŵo ŵalifisisye pamo nakwe Josyua, ili ŵapokele icalo caŵenafyalo, aŵo ŵatamfisye-mo ŵaLesa pamenso aŵawisifwe, ukuficila napansiku syakwe Dafidi,

⁴⁶ uyo uwabwene uluse pamenso aŵaLesa, nekulomba ati afwaye umwakwikala ŵaLesa ŵakwe Yakobi,

⁴⁷ Sombi Solomoni ewaŵeŵacile iŋanda.

⁴⁸ Naŋgawe' fyo Aŵo Aŵacilile taŵekala mumananda eŵakwa kuminwe yaŵantu, tau; koti nifyopele'fyo ifilaŵile uwakusimika ati:

⁴⁹ Iulu liteŵe lyanji, Necalo capansi cipuna icakunyantapo amakasa anji. ŴaSikulu ati: Mbaisa-nanda mwakunjiŵacila neŵo? Apakutusisya neŵo pesa?

⁵⁰ Iminwe yanji kansi teyo yaleŋgele fyonse'fi?

⁵¹ Mweŵacikaka, mweŵakuŵulo'kukopolwa mumitima namumatwi, insiku syonse mulacicila Umupasi Uswetelele; koti nifyopele'fyo ifi ŵalukucita ŵawisinwe, namweŵo efi mulukucita.

⁵² Mbawisa-wakusimika utaŵapensesye-po ŵawisinwe? Nakaŵili ŵaliŵepeye aŵo, aŵasimicile ukwisa kwaŴaŵo Aŵaluŋgeme. Aŵo namweŵo ŵukumo mwaliŵaloŵele nekuŵepaya;

⁵³ mwemwapokele amafunde opele aansicilwe limo kuŋkalamba syaŵaLesa, nekuŵulo'kwalonda.

⁵⁴ Lomba, pakumfwe'fyo, ŵalisomenwe mu mitima, nekusumanya'meno ukumufitilwa.

⁵⁵ Sombi naye uwiswile Umupasi Uswetelele, nekutontomekesya kwiulu, nekuŵona uŵuleme bwaŵaLesa naŵaYesu ŵaliimakene palwine lwaŵaLesa:

⁵⁶ nekulaŵila ati: Ŵoneni, ndukuwena iulu lyalekana, neMwana ŵaMuntunsi aliimakene palwine lwaŵaLesa.

⁵⁷ Sombi ŵo ŵaliŵilicisye nesiwi'likulu, nekusiŋka namumatwi, nekumuŵutucila ŵonse pamo.

⁵⁸ Naŵo ŵalimuposele pesonde lyamusi, nekumupamaʼmabwe. Peŋka imboni syaliŵicile ifyakufwala fyasisyo muceni camusaŋkwa umbi, uwailicilwe ati nisaulu.

⁵⁹ Fyopele'fyo walimupamine Stefano amabwe, ili aŵalilila ŵaSikulu ati: MweŵaSikulu Yesu, pokeni umupasi wanji!

⁶⁰ Naye alifukeme, nekuŵilicisya nesiwi' likulu ati: MweŵaSikulu, tekuŵasinina pafyakuŵifya ifi! Ili alaŵile'fyo, aliile mutulo.