Ifyacitilwe 5 - Amashiwi Aba Lesa

¹ Sombi umuntu umbi, isina lyakwe niAnanaya, uwali nemukasi wakwe, Safila, aliulisye uŵuŵoni bwaŵo ŵumbi nendalama;

² simbi nekufisa, ŵoŵilo nekufundana nemukasi wakwe; popele simbi nasyo alitwite nekutula muceni cantanjisi.

³ Sombi Petilo alilaŵile ati: Ananaya, mbanindo Satana aisusisyo' mutima woŵe ukutumpaika Umupasi U swetelele, nekufisa indalama simbi isi waulisye nasyo icalo?

⁴ Lomba tauŋgaculisya, kansi tacali coŵe wemwine? Nakaŵili, pakucula, kansi tawali nemakosa pali co? Mbanindo walaŋgulucile' fi mumutima woŵe? Tautumpaicile aŵantu, sombi waŵepa kuli ŵaLesa!

⁵ Pakumfwa amasiwi ayo, Ananaya aliwilile pansi, nekufwa. Peŋka aŵantu ŵonse aŵaumfwile'fyo ŵaliŵele nemwenso ukwakuti.

⁶ Popele apo aŵasaŋkwa ŵaliimine, nekumupeta, nekumutwala pesonde mukumusika.

⁷ Pakupite'mpindi koti sitatu, umukasi wakwe naye aliinjile, uwakuŵulo' kwisiŵa ifyo ifyacitilwe.

⁸ Popele Petilo alilaŵile kuli ye ati: Umbule kani isindalama esyopele mwaulile necalo ico? Naye nekusumina ati: Inya, esyopele' syo.

⁹ Sombi Petilo alilaŵile kuli ye ati: Mbanindo mwafundanina limo mukwesya Umupasi waŵaSikulu? Ŵona! Amakasa aŵaŵo aŵasika umulume woŵe ali kumulyaŋgo; naweŵo ŵakukutwala pesonde!

¹⁰ lmpindi yopele'yo naye aliwilile pansi muceni cakwe, nekufwa. Naŵo awasaŋkwa ŵaliinjile, nekumusaŋga ufwile, nekumutwala pesonde, nekumusika pamulume wakwe.

¹¹ Popele ikelesya lyonse neŵantu ŵonse aŵaumfwile'fyo ŵaliŵele nemwenso ukwakuti.

¹² Kaŵili kuminwe yantanjisi utwisiŵilo utwinji nefimpelampela fyalicitilwe pakati paŵantu; nasyo syonse syalukuŵuŋgana nemutima umo mumulyaŋgo wakwe Solomoni.

¹³ Sombi aŵasyeleko ŵonse neli umo taŵali nemitima iyakukumaŋkana nasyo; sombi naŋgawe' fyo aŵantu ŵalukusicindika.

¹⁴ Kaŵili aŵacetekele aŵakucila ubwinji ŵalisaŋkanine kuli ŵaSikulu, amaŵumba aŵalalume neŵanakasi.

¹⁵ Fyopele'fyo lomba ŵalukuŵafumya aŵalwele ukuŵatwala mumisewo, nekuŵalalika pamalo napampasa, ati Petilo pakupita palya, neli cinsiŋgwa cakwe ciŵafimbe-po ŵambi.

¹⁶ Nakaŵili lyaliwuŋgene iŵumba lyaŵantu ilyafumine kumisi lyasiŋgulucile kuJelusalemi, nekuleta aŵalwele neŵalukukatasiwa kumipasi iŵipile; naŵo ŵonse nekuŵusiwa.

¹⁷ Sombi umupapatilisi umukulu aliimine, naŵaŵo ŵonse aŵo ali naŵo (ŵopele aŵamukoka waŵaSadukayo), nekuŵa necikani ukwakuti;

¹⁸ nekwikata intanjisi, nekusiŵika mwikati lyaŵantu ŵonse.

¹⁹ Lomba uŵusiku iŋkalamba yaŵaSikulu yaliiswile-po pamilyaŋgo yekati, nekusifumya, nekulaŵila ati:

²⁰ Kamuyeni kwitempuli, mukemakane muŵaŵule aŵantu amasiwi onse aMweo uno.

²¹ Naŵo, ili ŵaumfwile'fyo, ŵaliinjile mwitempuli pakuca ulucelo, nekulukusambisya. Sombi umupapatilisi umukulu aliisile, naŵaŵo aŵo ali naŵo, nekuŵeta awamwiwuŋgano pamo neŵakulu ŵonse ŵaŵaIsilaeli, nekutuma aŵantu kwikati mukusileta intanjisi.

²² Sombi ifita ifyaile tafyasibwene mwikati; nafyo fyalibwelele nekulaŵila

²³ ati: Mwikati twasaŋgana muliiselwe ukukosele, neŵalukulama ŵaliimakene pamilyaŋgo; sombi pakwisula-mo fweŵo, tatusanjile-mo aŵantu neli umo.

²⁴ Peŋka, pakumfwa amasiwi ayo, icilolo icamwitempuli neŵapapatilisi aŵakulu ŵalikaŋkamene lukoso ati: Mbakwisa fikapela?

²⁵ Peŋka nekwisa umuntu umbi, nekuŵaŵula ati: Ŵoneni, aŵantu aŵo mwaŵicile mwikati ŵaliimakene mwitempuli, ŵalukusambisya aŵantu.

²⁶ Popele icilolo ico caliile pamo nefita, nekuŵaleta bwino ukwakuŵula'makosa; pakuti fyalitinine aŵantu ati twiŋgafwa kumabwe.

²⁷ Popele pakuŵaleta, fyaliŵekalicile pacilye; naye umupapatilisi umukulu aliŵepwisye

²⁸ ati: Twalimukenyeni icine ati tekusambisya mwisine' li! Lomba ŵoneni, mwakumanya Jelusalemi uŵusambisi bwenu, nekufwaya ukutusumwina imilopa yamuntu uyu!

²⁹ Sombi Petilo nentanjisi syaliasucile ati: Ukutwelelwa ukumfwa ŵaLesa ukwakucila napakumfwa aŵantu.

³⁰ ŴaLesa ŵaŵawisifwe ŵaliŵaŵusisye ŵaYesu, aŵo mwaipeye ukuŵatalika pamuti.

³¹ Ŵopele ŵaLesa eŵalemesye kukuŵoko kwaŵo ukwalwine ati ŵekale niMfumu, Ŵakupulusya, mukuŵapela aŵaIsilaeli ukwaluluka mumitima, nekufilekelela ifyakuŵifya fyaŵo.

³² Kaŵili fweŵo tuli nimboni syafintu ifyo, neMupasi Uswetelele nawo fyopele'fyo, uyu ŵaLesa ŵaŵapele aŵo aŵalukuŵomfwa.

³³ Sombi aŵo, pakumfwe'fyo, ŵalisomenwe mumitima, ŵati ŵakaŵepaye.

³⁴ Popele umbi aliimine mucilye, umuFalisi, isina lyakwe niGamalyeli, uwamano amumafunde, uwali neŵuleme kuŵantu ŵonse, nekuŵafunda ati ŵafumisyeni pesonde impindi ice.

³⁵ Naye alilaŵile kuŵaŵyakwe ati: Mweŵantu ŵakuIsilaeli, cenjeleni kuŵantu aŵa ifi mwakucita;

³⁶ pakuti akale aliimine Tyuda, umuntu uwakulicindika ati enemwine; kuli ye aŵantu ŵambi eko ŵaloŋganine, ŵali koti myanda ine. Uyo ŵalimwipeye; naŵaŵo ŵonse aŵalukumumfwa ŵalipalaŋganisiwe, nekwaluka ŵalukoso.

³⁷ Popele panuma yamuntu uyo, nekwima Juda uwakuGalili, pansiku syakulembesya aŵantu, nekutwala aŵantu ukumulonda: uyo naye alifwile, naŵaŵo ŵonse aŵalukumumfwa ŵalipalaŋganisiwe.

³⁸ Lomba ŵukumo ndukulaŵila kuli mweŵo ati: Tekuŵacita'kantu aŵa-ŵantu, muŵaleke lukoso; pakuti kani ukufundo'ku nemilimo iyi yaŵantu, ikawa;

³⁹ sombi kani yaŵaLesa, mweŵo tamukesiŵa ukuŵawisya, mwikesa-kuŵoneka ati mulukulwa naŵaLesa.

⁴⁰ Peŋka ŵalimusuminine; nekusiita intanjisi, nekusipama, nekusicenjesya ati: Tekulawila amasiwi mwisina lyakwe Yesu! Eli ŵasilekele.

⁴¹ Nasyo lomba syalifumine mucilye, ili sisaŋgalala pakuti syalieŵelwe ati tulielelwe ukumfwo'kupufiwa pakuti peSina.

⁴² Popele insiku syonse tasyalekele ukulukusambisya nekutulisya mwitempuli nakwaŵo ati ŵaYesu niŵaKlistu.