Ifyacitilwe 4 - Amashiwi Aba Lesa

¹ Ili ŵacilaŵila kuŵantu, aŵapapatilisi necilolo icamwitempuli pamo neŵaSadukayo ŵaliisile kuli ŵo,

² ili ŵafitilwe pakuti ŵalukusambisya aŵantu nekutulisya ati ukuŵuka pakati paŵafwile kuli muli ŵaYesu.

³ Naŵo ŵaliŵekete, nekuŵaŵika mwikati, ukupembela ŋgamailo, pakuti impindi iyo ciŋgulo.

⁴ Sombi ŵambi aŵenji aŵaumfwile lsiwi ŵalicetekele; popele aŵalalume ŵalikumene koti masausande asanu.

⁵ Paliŵele ati ŋgamailo impemba syaŵo neŵakulu neŵalembesi ŵaliŵuŋgene pamo muJelusalemi;

⁶ kaŵili epwali Anasi, umupapatilisi umukulu, naKayafa naYoane naAlecisanda naŵambi naŵo ŵonse aŵakwaŵo umupapatilisi umukulu.

⁷ Peŋka ŵaliŵatekele pakati, nekuŵepusya ati: Mbaesa-makosa mwacitile-ko, kani nimwisina lyakwe nani?

⁸ Popele Petilo aliiswile Umupasi Uswetelele, nekulaŵila kuli ŵo ati: Mwempemba syaŵantu namweŵakulu,

⁹ kani akasuŵa kalelo mulukutwipusya ifyamilimo iweme iyacitilwe kucilema, ati syani akosele umuntu uyu,

¹⁰ isiŵeni mweŵo mwense, neŵaIsilaeli ŵonse naŵo ŵesiŵe, ati mwisina lyaŵaYesu Klistu aŵakuNasaleti, aŵo mwatalicile, ŵopele aŵo ŵaŵusisye ŵaLesa pakati kaŵafwile, muli ŵo uyu-muntu alukwimakanina pamenso enu ukosele.

¹¹ Aŵo-ŵaYesu ebwe ilyakenwe kuli mweŵo, mweŵeŵacisi, lyopele'lyo elyaŵele nisunsa wamucilulu.

¹² Muŵantu ŵambi ŵonse neli umo tamuli-po ukupuluka; pakuti kaŵili pansi pano tapali-po isina limbi ili ilicilwe kuŵantu ilyelelwe fweŵo ukupulucila-mo.

¹³ Lomba ŵo, pakuŵona ukukoso' mutima kwaŵaPetilo naYoane, nekwisiŵa ati taŵasambile-po, ŵakuŵula'mano, walikaŋkamene lukoso, nekuŵesiŵa ati ŵalukwikala naŵaYesu.

¹⁴ Kaŵili napakuŵona uyo-muntu uwatendulucile aliimakene naŵo, taŵaisiŵile ukuleŋgulula.

¹⁵ Sombi ŵaliŵaŵulile ati ŵafume-mo mwiwuŋgano, ŵaye kumpelo; eli ŵafundene ŵeŋka,

¹⁶ nekulaŵila ati: Mbatuŵacite syani aŵa-ŵantu? Pakuti icimpelampela icikulu calicitilwe kuli ŵo, neŵantu ŵonse aŵekele muJelusalemi ŵalifiisiŵile'fyo, nafweŵo tatwisi uku fikane'fyo.

¹⁷ Sombi fiiŋgesa-kukumana nakuŵantu ŵambi, tuŵapatile ati: Ukufuma kumpindi ino, tekulaŵila kuŵantu ŵonse neli umo mwisine'li!

¹⁸ Popele ŵaliŵetile nekuŵakanya ati: Tekulaŵila neli panini neli kusambisya konse mwisina lyakwe Yesu!

¹⁹ Sombi Petilo naYoane waliwaasucile ati: Kani ukwelelwa pamenso aŵaLesa ukumusumineni mweŵo ukwakucila napali ŵaLesa, salulule ni mweŵo;

²⁰ pakuti tatwisi fweŵo ukuŵulo'kulaŵila ifyafyefyo ifi twabwene nekumfwa.

²¹ Popele ŵo, ili ŵaŵapatile liŵili, ŵaliŵalekele; pakuti taŵabwene-po umwakuŵacitila umulandu, pakuti paŵantu; pakuti aŵantu ŵonse ŵalukuŵacindika ŵaLesa pakuti pali fyefyo ifyacitilwe.

²² Pakuti umuntu uyo imyaka yakwe yalicilile napamakumi ane, pali woyo epo cacitilwe icimpelampela ico icakuŵusya.

²³ Popele, pakuŵaleka, ŵaliisile kuŵaŵyaŵo, nekuŵaŵula fyonse'fyo ifi ŵalaŵile aŵapapatilisi aŵakulu neŵakulu kuli ŵo.

²⁴ Lomba ŵo, pakumfwe'fyo, kaŵaŵaŵilicila ŵaLesa ŵonse pamo, nekulaŵila ati: MweŵaSikulu niMwemwaleŋgele iulu necalo necisiŵa nafyonse ifilimo,

²⁵ Mwemwalaŵilile muMupasi Uswetelele pakanwa kakwe wisifwe Dafidi, umuntu wenu, ati: Aŵenafyalo mbanindo ŵalukupuputilwa, Nemikoka yaŵantu nayo nekwalakanya ifyalukoso?

²⁶ Imfumu syamucalo syalukuliŵamba, Nempemba nasyo syaliwuŋganine, Mukuŵaŵucila ŵaSikulu naŵaKlistu ŵaŵo.

²⁷ Pakuti icine mumusi muno, Elode naPontyo Pilati pamo neŵenafyalo neŵantu aŵaIsilaeli ŵaliŵuŋgene mukuŵucila ŵaYesu, Aŵapyunjisi ŵenu aŵaswetelele aŵa mwasutisye,

²⁸ mukucita fyonse'fyo ifi kwaansicile limo mukucitwa ukuŵoko kwenu nekufunda kwenu.

²⁹ Popele ŵukumo, mweŵaSikulu, ŵoneni ukupata kwaŵo; muŵapele aŵantu ŵenu ukulukulaŵila Isiwi lyenu nemitima ikosele;

³⁰ pakutambika ukuŵoko kwenu mukuŵusya; nakaŵili ati utwisiŵilo nefimpelampela fikalukucitwa mwisina lyaŴapyunjisi ŵenu aŵaswetelele, ŵaYesu.

³¹ Popele pakweŵa ati ŵatembela, umuwawuŋgene mwaliteŋkanine; popele ŵonse nekwisula Umupasi Uswetelele, nekulukulaŵila Isiwi lyaŵaLesa nemitima ikosele.

³² Lomba iŵumba lyaŵaŵo aŵacetekele ŵali nemutima umo nemweo umo; kaŵili tapali-po neli umo uwalukulaŵila ifyafintu fyonse ifi ali nafyo ati fyanji nemwine; sombi ifintu fyonse fyali fyaŵo ŵonse.

³³ Popele nemakosa akulu intanjisi syalicitile ŵumboni ubwakuŵuka kwaŵaSikulu Yesu pamfwa; neluse ulukulu lwaliikele pali ŵo ŵonse.

³⁴ Pakuti peŵumba lyaŵo tapali-po neli umo uwakupeŋgele'fintu: pakuti ŵonse aŵali nemaŵala kani mananda ŵaliolisye, nekuleta indalama isyo isi ŵaulile,

³⁵ nekusitula muceni cantanjisi; peŋka ŵonse ŵaliŵaaŵile koti kupeŋga kwaŵo.

³⁶ Lomba Josefi, uwailicilwe kuntanjisi ati niBa naba (ilyakwaluka ati Mwana wakucenjesya), umwina-Lefai, umukoka wakwe wakuKupilo,

³⁷ uyo wali neŵala, lomba nekuliulisya, nekuleta indalama nekusitula muceni cantanjisi.