Ifyacitilwe 3 - Amashiwi Aba Lesa

¹ Popele apo Petilo na Yoane ŵaliile kwitempuli pampindi yakutembela, pakuteyama'kasuŵa.

² Popele aŵantu ŵalimupintile umbi umuntu icilema, icafyelwe neŵulema, wopele ŵalukumulalika insiku syonse kumulyaŋgo wetempuli, isina lyauo Mulyaŋgo Uweme, mukulomba-lomba ifyalukoso kuli ŵaŵo aŵalukwinjila mwitempuli.

³ Uyo, pakuŵona Petilo naYoane ŵalukwinjila mwitempuli, aliŵalombele ifyalukoso.

⁴ Popele Petilo, ili amutontomekesye pamo naYoane, alilaŵile ati: Ŋgotutontomeke.

⁵ Popele aliŵomfwile, pakuti pakucetekela ati naku poka akantu kuli ŵo.

⁶ Sombi Petilo alilaŵile ati: Neli lisilifa neli ligolide nsikwete-po neli panini; sombi ico ici ndi naco ndukukupela. Mwisina lyaŵaYesu Klistu, aŵakuNasaleti, ulukwenda!

⁷ Peŋka alimwikete kukuŵoko ukwalwine, nekumwimya; popele amakasa akwe nemafupa amutupokoso twakwe nekupulililo'kukosa.

⁸ Naye alicilucile, nekwimakana, nekutatiko'kwenda; popele aliinjile naŵo mwitempuli, ili enda nekusotoka nekuŵalemya ŵaLesa.

⁹ Popele aŵantu ŵonse ŵalimubwene alukwenda nekulukuwacindika ŵaLesa.

¹⁰ Naŵo ŵalimwisiŵile ati niwoyo wopele uwalukwikala ukulukulomba-lomba ifyalukoso kuMulyaŋgo Uweme uwamwitempuli. Lomba ŵalikaŋkamene lukoso ukwakuti pakuti pali fyefyo ifyacitilwe kuli ye.

¹¹ Peŋka'po, ili aŵekatisye Petilo naYoane uyo-muntu, aŵantu ŵonse ŵaliŵutucile ukuwuŋgana pamo kuli ŵo mumulyaŋgo uwailicilwe ati wakwe Solomoni, nekulukukaŋkamana ukwakuti.

¹² Naye Petilo, pakuŵone'fyo, aliŵaasucile aŵantu ati: Mwewantu, mweŵaIsilaeli, mbanindo mulukukaŋkamanina pali wuyu-muntu? Kaŵili mbanindo mulukututontomekela fweŵo, koti kweŵa ati amakosa esu neli kupala-ŵaLesakwesu ekwamupelo'kwenda?

¹³ ŴaLesa ŵaŵaAblaamu naIsaci naYakobi, ŵaLesa ŵaŵawisifwe, eŵaŵalemesye ŵa Yesu Aŵapyunjisi ŵaŵo, aŵo aŵa mwaloŵele nekukana pamenso akwe Pilati, ili ati akaŵakakulule.

¹⁴ Sombi mweŵo mwaliŵakene Aŵo Aŵaswetelele Awaluŋgeme, nekulomba ati tupoke akapondo.

¹⁵ Eli mwaipeye Imfumu yaMweo, iyo ŵaŵusisye ŵaLesa pakati kaŵafwile; fwewo tuli nimboni syafyefyo.

¹⁶ Popele, pakuti pakucetekela ukwamwisina lyaŵo, isina lyaŵo elyakosya uyu-muntu, uyu mwaŵona nekwisiŵa. Icine ukucetekela uko ukwamuli ŵo ekwamupelo'kukosa uku ukuweme pamenso enu mwense.

¹⁷ Pano mweŵame, ndiisi ati mwalicitile'fyo, mweŵakuŵulo'kwisiŵa, nempemba syenu nasyo fyopele'fyo.

¹⁸ Sombi ifintu ifyo ifi ŵasimicile ŵaLesa patunwa twaŵakusimika ŵonse, ati ŵaKlistu ŵaŵo ŵakasomenwa, fyopele'fyo efi ŵacitile.

¹⁹ Pakuti pali fyefyo, lapileni, mwaluluke, ati ifyakuŵifya fyenu fisimaŋgane; fyopele'fyo sikese impindi syakukosa isyakufuma kuli ŵaSikulu;

²⁰ naŵo nekutuma ŵaKlistu, aŵo aŵasalulwilwe pakuti pali mweŵo, eŵaYesu:

²¹ ŵopele ukwelelwa ati Iulu lipoke ili tasiŋgesa impindi syakubwesya ifintu fyonse, fyopele'fyo ifi ŵaLesa ŵalaŵile patunwa twaŵakusimika ŵaŵo aŵaswetelele aŵali-ko ukufuma nakumpindi yakuleŋgwa kwacalo.

²² Mose icine alilaŵile ati: ŴaSikulu Lesa ŵakamupyanicileni uwakusimika uwakwiŵumba lyaŵakwaŵenu, upalene naneŵo; popele ifintu fyonse ifi akalukulaŵila kuli mweŵo, mukalukufiumfwa.

²³ Pakaŵa ati aŵantu ŵonse utakomfwa uwakusimika uyo akonalwa ono ono ukumufumya pakati kaŵantu.

²⁴ Icine neŵakusimika ŵonse ukutaticila kuli Samweli, naŵaŵo aŵakunuma yakwe, ŵonse aŵalaŵile, aŵo naŵo ŵalisimicile ifyansiku sino.

²⁵ Mweŵo muli ŵana ŵaŵakusimika, kaŵili muli ŵana ŵakulaya uko ukwalayene ŵaLesa naŵawisinwe, ili ŵalaŵile kuli Ablaamu ati: Muŵana ŵoŵe aŵantu aŵamisyoŵo yonse iya pansi pano emo ŵakasyucila.

²⁶ Kuli mweŵo tanje, ŵaLesa, ili ŵaŵaŵusisye Aŵapyunjisi ŵaŵo, eko ŵaŵatumine, mukumusyucisyeni, pakumwalululeni mweŵo mwense ukuleke'fyakuŵifya fyenu.