Ifyacitilwe 23 - Amashiwi Aba Lesa

¹ Naye Paulu alitontomekele peŵuŋgano, nekulaŵila ati: Mweŵakwasu, nalukwikala pamenso aŵaLesa nacimaŋga wonse uweme ukufika nakukasuŵa kalelo!

² Popele umupapatilisi umukulu, Ananaya, aliŵaŵulile aŵo aŵaimakene pali ye, ati mupameni pakanwa.

³ Peŋka Paulu alilaŵile kuli ye ati: ŴaLesa ŵakakupama weŵo, weciŵumba icitufisiwe; uliikele mukusololola naneŵo koti kesiŵilo kamafunde, nawe nekuŵaŵula ukumpama ukwakupulaisya amafunde?

⁴ Lomba aŵo aŵaimakenepo ŵalilaŵile ati: Ulukutoŋgala umupapatilisi umukulu waŵaLesa?

⁵ Kumfwa Paulu ati: Nsiisiŵile, mweŵakwasu, ati uyu mupapatilisi umukulu; pakuti palilembelwe ati: Tekumwefya umwikalicisi waŵantu ŵenu!

⁶ Sombi Paulu, ili aisiŵile ati aŵantu aŵo ŵambi ŵaSadukayo, ŵambi naŵo ŵaFalisi, aliŵilicisye mwiwuŋgano ati: Mweŵakwasu, neŵo ndi muFalisi, mwana waŵaFalisi; nipakuti paceŵo icakucetekela necakuŵuka kwaŵafwile, epo naitilwa-mo kuno!

⁷ Ili alaŵile'fyo, kwaliŵucile nekupicisya aŵaFalisi neŵaSadukayo; neŵumba nalyo lyalilekene umupaka.

⁸ Pakuti aŵaSadukayo ŵalalaŵila ati: Takuli-po ukuŵuka-po pamfwa, neli niŋkalamba yakwiulu, neli mupasi wonse, koku; sombi aŵaFalisi eŵafisumina fyonse'fyo.

⁹ Popele paliŵucile nekuyoŵela ukukulu; naŵo ŵambi aŵalembesi ŵaŵaFalisi ŵaliimakene, nekulukulwa, nekulaŵila ati: Tatufibwene-po ifyakuŵifya neli cimo mumuntu uyu! Mbanindo kani mupasi walawila nakwe, neli niŋkalamba yakwiulu?

¹⁰ Popele kwaliŵucile ukupikansyanya ukukulu; naco icilolo icikulu, pakuti calukutina ati ŵeŋgamusaŵala Paulu, califiŵulile ifita ati selukeni, mumupokolole kuli ŵo, mumwinjisye mwiliŋga.

¹¹ Popele paŵusiku ŵaSikulu ŵaliimakene pali ye, nekulaŵila ati: Saŋgalala; pakuti koti nifyopele'fyo ifi wansimicila kuJelusalemi, fyopele'fyo ukukwelelwe ukunsimicila naku Loma.

¹² Peŋka'po, pakuca, aŵaJuda ŵalifundene, nekupikana icipikwa ati tatukalya-po neli kunwa-po, ili tatuŋgamwipaya Paulu,

¹³ Kaŵili aŵo aŵafundene ukwalika uko ŵali ŵantu aŵakucila napamakumi ane.

¹⁴ Popele ŵaliile kuŵapapatilisi aŵakulu, nakuŵakulu, nekulaŵila ati: Fweŵo twapikana icipikwa icikulu ati tatukomfwa-po akakulya neli panini, ili tatuŋgamwipaya Paulu.

¹⁵ Popele namweŵo pamo newewuŋgano muciŵule icilolo icikulu, ati ŋgacikamuselusisye kuli mweŵo, mweŵe ati tulukufwayo'kusololola bwino umulandu wakwe; peŋka fweŵo, iyo-mpindi yopele akapalamina, tukalukupembelele ukumwipaya.

¹⁶ Sombi umwana ŵaŋkasi yakwe Paulu alifyumfwile ifyakuŵelama kwaŵo, nekuya-kwinjila mwiliŋga, nekumuŵula Paulu.

¹⁷ Naye Paulu aliitile icilolo cimbi icafito'mwanda, nekulaŵila ati: Mumutwale umusaŋkwa uyu kucilolo icikulu, pakuti ali neceŵo icakuciŵula.

¹⁸ Naco calimutwite, nekumufisya kucilolo icikulu, nekulaŵila ati: Paulu uyo-kaili wanjita, nekuŋgewa ukuleta umusaŋkwa uyu kuli mweŵo; ali neceŵo icakumuŵuleni.

¹⁹ Naco icilolo icikulu calimwikete kuminwe, nekuya kumpelo mukumwipusya kumfiso ati: Mbacisa-ceŵo uli naco icakumbula?

²⁰ Naye ati: AŵaJuda ŵasuminina ukumulombeni ati mukamuselusisye Paulu kwiwuŋgano mailo ukweŵa ati tulukufwayo'kwipusya bwino ifyakwe.

²¹ Sombi mwewo tekuŵasumina; pakuti ŵalukumuŵelamina aŵantu aŵakucila napamakumi ane, aŵapikene icipikwa icakuwulo'kulya-po neli kunwa-po, ili taŵaŋgamwipaya: lomba ŵukumo ŵalukupembelela nekucetekela ukusumina kwenu.

²² Naco icilolo icikulu calimutumine umusaŋkwa uyo, ili camufundile ati: Tekuŵula aŵantu ŵonse neli umo ati wambula ifi-fintu.

²³ Peŋka califiitile ifilolo fiŵili ifyafito'mwanda, nekulaŵila ati: Loŋgeni ifita imyanda iŵili ukuyakufika kuKaisalia, nefyapali ŵakafwalo amakumi asanu naaŵili, nefyamafumo imyanda iŵili, pampindi yasitatu iyaŵusiku!

²⁴ Nekufiŵula ati filete nenama mukumwikalika-po Paulu, nekumufisya uŵutende kuli Felisi impemba.

²⁵ Kaŵili calilembele neŋkalata iyakuŵe'fi ati:

²⁶ Klodyo Lusya kumpemba Felisi iyo iweme makosa, mitende!

²⁷ Umuntu uyu aliiketwe kuŵaJuda; ŵalukufwayo'kumwipaya, ili naficile pamo nefita kuli ŵo, nekumupulusya; pakuti naliumfwile ati ye muLoma.

²⁸ Peŋka pakuti pakufwayo'kwisiŵa iceŵo ico ici ŵalukumupinjila, nalimuselusisye kwiŵuŋgano lyaŵo.

²⁹ Popele naliisiŵile ati alukusininwa ifyeŵo fyamafunde aŵo, sombi ati taasininwe ifyelelwe imfwa neli minyololo.

³⁰ Lomba, ili ŵambulile ati eko kuli ukwalika ukwakumuntu uyu, eli napulilila ukumutuma kuli mweŵo; nakaŵili nekuŵaŵula aŵakumusinina ati ŵakalaŵilile umulandu kuli mweŵo.

³¹ Nafyo ifita fyalimupintile Paulu, nekumufisya uŵusiku kuAntipatilo, koti nifyopele'fyo ifi fyafundilwe,

³² Sombi ŋgamailo fyaliŵalekele aŵapali ŵakafwalo ati ŵaye nakwe, ifine nekubwelela kwiliŋga.

³³ Naŵaŵo, ili ŵaficile kuKaisalia, nekwipela neŋkalata impemba, ŵalimufisisye naPaulu pamenso aiyo.

³⁴ Nayo, ili yaipendele, yalimwipwisye Paulu ati cisa-calo wafumine-ko. Lomba, pakwisiŵa ati ali wakucalo caCilica,

³⁵ yalilaŵile ati: Ŋkaumfwa umulandu woŵe, pakufika naŵaŵo aŵalukukusinina. Nayo yaliŵaŵulile aŵantu ati ŋgaalukulamwa mwilawililo lyakwe Elode.