Ifyacitilwe 22 - Amashiwi Aba Lesa

¹ Mweŵakwasu namweŵawisifwe, mumfwe ifyakulilaŵilila ifi ndukumuŵuleni!

² Popele, ili ŵaumfwile ati alukulaŵila kuli ŵo mumulaka waŵaEbeya, ŵalikutumene lukoso popo; naye ati:

³ Neŵo ndi muJuda, uwafyalilwe muTaso uwamucalo caCilica, sombi nalisambile muno mumusi muceni cakwe Gamalyeli, nekufundwa koti mitondo ikatesye iyamafunde aŵawisifwe, nekwikala nemuŋkonsya kuli ŵaLesa, koti nifyopele'fyo ifi muli namweŵo mwense lelo.

⁴ Nalukuŵapensya aŵaNsila iyi ukufika nakukuŵepaya, ili mbakaka nekuŵaloŵela mumakati neŵalalume neŵanakasi.

⁵ Nefintu ifi kaŵili alansimicila umupapatilisi umukulu, pamo neŵakulu ŵonse. Kaŵili kuli ŵo nalipokele iŋkalata isyakuŵakwasu, nekwenda ukulukuya kuDamasiko, ati ŋkawakake aŵo aŵali-ko, mbalete kuJelusalemi, mukuŵacite'milandu.

⁶ Paliŵele ati, pakulukwenda nekupalamina nakuDamasiko, akasuŵa pakati, lomba nekutuŵa ukukulu ukwafumine kwiulu kwalipulilile ukumbyatila.

⁷ Nane naliwilile pansi, nekumfwa nesiwi lilukulaŵila kuli neŵo ati: Saulu, Saulu, mbanindo ulukuŋkululusisya?

⁸ Nane naliasucile ati: Mbanimweŵanani, mweŵaSikulu? Naŵo ŵalilaŵile kuli neŵo ati: NineŵaYesu ŵakuNasaleti, aŵo ulukupensya.

⁹ Kansi aŵo aŵo nali naŵo ŵalibwene icine ukutuŵa, sombi tawaumtwile-po isiwi lyaŵaŵo aŵalukulawila kuli neŵo.

¹⁰ Neŵo ati: Ncite syani, mweŵaSikulu? Naŵo ŵaSikulu ŵalilaŵile kuli neŵo ati: Ima, ukenjile muDamasiko; mopele umo fikalaŵilwa kuli weŵo ifintu fyonse ifyansicilwe ati ukacite!

¹¹ Popele, pakuŵulo'kwisiŵo' kulaŵa pakuti paŵuleme bwakutuŵa uko, nalikulicilwe kuli ŵaŵo aŵo nali naŵo, nekwinjila muDamasiko.

¹² Peŋka umuntu umbi, Ananaya, utekenye koti mafunde, uwali nempupo isiweme kuŵaJuda ŵonse aŵalukwikalo'ko,

¹³ aliisile kuli neŵo, nekwimakana pali neŵo, nekulaŵila kuli neŵo ati: Wemukwasu Saulu, upoke ukulaŵa koŵe! Impindi iyo yopele nalimubwene.

¹⁴ Naye ati: WaLesa ŵaŵawisifwe eŵakusalulwile weŵo ati wisiŵe ukufwaya kwaŵo, uŵone Aŵo Awaluŋgeme, umfwe nesiwi lyakufuma mukanwa kaŵo.

¹⁵ Pakuti ukaŵa nimboni yaŵo iyakuŵantu ŵonse ifyafyefyo ifi wabwene nekumfwa.

¹⁶ Ŵukumo mbanindo ulukukokwela? Ima, uŵatisiwe, ufisambe ifyakuŵifya fyoŵe, ili ulilile'sina lyaŵo.

¹⁷ Peŋka'po, ili nabwelele kuJelusalemi, pakulukutembela mwitempuli, nalilesucile,

¹⁸ nekuŵaŵona ŵalukulaŵila kuli neŵo ati: Aŋgufya, ufume-mo bwaŋgu mujelusalemi, pakuti ŵakano'kupoka kuli weŵo ŵumboni ubwakuli neŵo.

¹⁹ Kumfwa neŵo ati: MweŵaSikulu, aŵene ŵaliisi ati nalukuŵaposa mwikati, nekuŵapama mumasunagoge onse aŵo aŵacetekele kuli mweŵo.

²⁰ Kaŵili, pakupokomoka imilopa yakwe Stefano imboni yenu, naneŵo naliimakene-po nekusumina, nekulama nefyakufwala fyaŵaŵo aŵamwipeye!

²¹ Naŵo ŵalilaŵile kuli neŵo ati: Koya, pakuti ŋkakutuma ukutali kuŵenafyalo!

²² Naŵo aŵantu ŵalimumfwile ukufika nakwisiwi ilyo; eli ŵaŵilicisye, nekulaŵila ati: Mufumyeni mucalo uyumuntu, muŋgwa! telelwe ukwikala nemweo!

²³ Popele, pakuti ŵalukuŵilicisya, nekufula nefyakufwala fyaŵo, nekulukutukwila nekuŋgu mwiulu,

²⁴ icilolo icikulu califiŵulile ifita ati mwinjisyeni mwiliŋga, mulukumwipusisya pakulukumupama; ati njisiŵe iceŵo ici ŵalukumuŵilicisisya.

²⁵ Peŋka, ili ŵamukacile kunsiŋga, Paulu alilaŵile kucilolo cafito'mwanda icaimakene apo, ati: Kani ukumwelelweni mweŵo ukumupumoʼmuntu umuLoma, utaaŋgasininwa?

²⁶ Popele icilolo ico, ili caumfwile'fyo, caliile kucilolo icikulu, nekuciŵula ati: Mbamulukufwayo'kucite'ndo? Pakuti uyu-muntu muLoma!

²⁷ Peŋka necilolo icikulu caliisile nekulaŵila kuli ye ati: Umbule, kani uli muLoma? Naye ati: Inya!

²⁸ Popele icilolo icikulu caliasucile ati: Neŵo, pakwinjila mumukoka uyu, naliposele indalama isinji! Sombi Paulu ati: Sombi neŵo nalifyelwe ndi muLoma.

²⁹ Popele apo aŵo aŵalukufwayo'kumwipusisya ŵalifumine-ko kuli ye; kaŵili necilolo icikulu naco calitinine, ili caisiŵile ati ye muLoma, pakuti calimukacile.

³⁰ Sombi ŋgamailo, pakuti pakufwayo'kwisiŵa icine iceŵo ici ŵamupindile aŵaJuda, calimukakulwile, nekuŵaŵula aŵapapatilisi aŵakulu newewuŋgano ŵonse ati ŵaŵuŋgane; lomba calimuselusisye Paulu, nekumwikalika pamenso aŵo.