Ifyacitilwe 21 - Amashiwi Aba Lesa

¹ Ili twalekene naŵo, nekwimo'lwendo mubwato, twaliluŋgeme nekufika kuKoso; ŋgamailo nakuLodo; pakufumo'ko, nakuPatala.

² Popele, ili twabwene ubwato ŵulukwaŵuka ukulukuya kucalo caŵaPoinike, twaliicile-mo nekuyo'lwendo.

³ Lomba, ili twaficile pakuŵona nikuKupilo, twalikuposele kucipiko, nekwenda ukulukuya kuSilya, nekutuntucila paTulo; pakuti popele apo epo bwalukufwaya ubwato ukutulila ifipe.

⁴ Peŋka, pakuŵona aŵasambile, twalilinsisye popele apo insiku sisanu nasiŵili. Aŵo ŵalilaŵile kuli Paulu muMupasi ati, tekunyanta-mo amakasa muJelusalemi.

⁵ Popele apo, ili twasilisye insiku isyo, twalifumine-ko nekuyo'lwendo lwesu; naŵo ŵonse pamo neŵakasi ŵaŵo neŵana ŵalitusindicisye, ili tatuŋgafuma mumusi; popele twalifukeme pacito, nekutembela;

⁶ nekulayana; eli twaicile namubwato; sombi ŵo ŵalibwelele kwaŵo.

⁷ Pakusilo'lwendo lwakufuma ku'Tulo, twalificile kuTolemayi; popele twaliŵasekelele aŵakwasu, nekulukwikele naŵo akasuŵa kamo.

⁸ Ŋgamailo twalikumbulucile nekufika nakuKaisalia. Popele twaliinjile muŋanda yakwe Filipo uwakutulisya, umbi peŵumbalyaŵaŵo aŵali ŵasanu naŵaŵili, nekulukwikele nakwe.

⁹ Uyo-muntu wali neŵana aŵanakasi ŵane, awatawaŋgopwa, aŵalukusimika.

¹⁰ Lomba, pakwikala fweŵo kopele uko insiku isinji, kwaliisile ukufuma kucalo caŵena-Juda uwakusimika umbi, uwailicilwe ati niAgabo.

¹¹ Uyo aliisile kuli fweŵo, nekuwula umusipi wakwe Paulu, nekulikaka kumolu nakumaŵoko, nekulaŵila ati: Ifi ulukulaŵila Umupasi Uswetelele ati: Fyopele'fyo aŵaJuda aŵakuJelusalemi efi ŵakamukaka umwine wamusipi uyu, nekumuposa muminwe yaŵenafyalo.

¹² Peŋka, ili twaumfwile'fyo-fintu, fweŵo naŵaŵo aŵakoko twalimukombetele Paulu ati: Tekuya kuJelusalemi!

¹³ Peŋka'po Paulu aliasucile ati: Mulukucite'ndo, ukulukulila, nekumfumyo'mutima? Pakuti nasumina, tekukakwa kweŋka, sombi kaŵili nekufwila kuJelusalemi, pakuti pesina lyaŵaSikulu Yesu!

¹⁴ Popele, ili alukukana ukutekenesiwa, twalicilekele, ili tulaŵila ati: Ukufwaya kwaŵaSikulu kucitwe!

¹⁵ Panuma yansiku isyo twaliŵulile ifipinto fyesu; lomba tulukuya kujelusalemi.

¹⁶ Kaŵili ŵaliile nafweŵo ŵambi aŵasambile aŵakuKaisalia, nekupinta naMunasoni uwakuKupilo, umusambile wakale, ati tukekale nakwe kwaŵo.

¹⁷ Lomba, ili twaficile kuJelusalemi, aŵakwasu ŵalitupokelele nekutemwa.

¹⁸ Naŋgamailo Paulu aliinjile pamo nafweŵo kuli Jakobo; kaŵili eko ŵali aŵakulu ŵonse.

¹⁹ Popele, ili aŵasekelele, aliŵulisisye nekufipendulula cimo cimo ifyo-fintu ifyacitile ŵaLesa pakati paŵenafyalo kumilimo yakwe.

²⁰ Naŵo, pakufyumfwa ŵaliŵalemesye ŵaLesa, nekulawila kuli Paulu ati: Wemukwasu, waŵona ati muŵaJuda muli aŵantu amasausande aenji aŵacetekele; naŵaŵo ŵonse ŵali nemuŋkonsya pakuti pamafunde akwe Mose.

²¹ Kaŵili ŵaliumfwile ifyakuli weŵo ati ulukuŵasambisya aŵaJuda ŵonse aŵali pakati paŵenafyalo ati ŋgawaleke Mose, nekuŵaŵula ati: Tekuŵakopola aŵana ŵenu, neli kulukukulonda ukwisiŵila uko.

²² Mbanindo lomba? A ŵo ŵakomfwa icine ati waisa.

²³ Pakuti pali fyefyo ucite'fi ifi tulukukuŵula. Tuli neŵalalume ŵane aŵali necakulapa.

²⁴ Uŵapoke aŵa, ukaliswesye pamo naŵo, uŵalambule ati ŵaŵeye namumitwi yaŵo; popele ŵonse ŵakesiŵa ati tafili-po fyacine ifyeŵo ifyo ifi ŵaumfwile ifyakuli weŵo; sombi ati weŵo wemwine ulenda bwino, ili ulama'mafunde.

²⁵ Sombi ifyakuŵenafyalo aŵacetekele, twalilembele, ili twafundile ati ŋgaŵaleke ifintu ifyamilambu iyakufiŵumbwaŵumbwa, nemilopa, nefinani ififwile pakufipoto'mukosi, neŵucencemesi.

²⁶ Peŋka'po Paulu aliŵapokele aŵalalume aŵo; lomba ŋgamailo, ili aliswesesye pamo naŵo, aliinjile mwitempuli, nekusimika ukusilisya kwansiku syakuswesya, ukufike'li yaposelwe imilambu pakuti pali ŵo ŵonse.

²⁷ Peŋka ili syapalamine ukukumana insiku isyo sisanu nasiŵili, aŵaJuda aŵafumine kucalo caAsya, pakumuŵona Paulu mwitempuli, ŵalilisuŋgwilile iŵumba lyonse, nekumwikata,

²⁸ ili ŵaŵilicisya ati: Mweŵantu ŵakuIsilaeli, mutofwe-ko! Uyu-muntu ewoyo usambisya aŵantu ŵonse ponse ponse ukuŵasensa aŵantu, nemafunde, nenanda ino! Nakaŵili aliletele neŵaEla mwitempuli, nekupaŵifya pantu apa apaswetelele!

²⁹ Pakuti ŵalimubwene nakwe akale Tilofimo umuEfesa mumusi, popele ŵalukulaŋguluka ati Paulu alimwinjisye namwitempuli.

³⁰ Popele nemusi wonse waliŵele necipupa; neŵantu naŵo ŵaliŵutucile nekukumaŋkana: naŵo nekumwikata Paulu, nekumukulumuna ukumufumya mwitempuli; peŋka'po napamilyaŋgo nekwisalwa.

³¹ Popele, ili ŵalukwesya ukumwipaya, ifyeŵo fyalificile nakucilolo icikulu icakucila peŵumba lyafita, ati monse mu Jelusalemi aŵantu walukupyuŋgana.

³² Naco caliŵulile ifita nefilolo fyapamyanda, nekuŵutucila kuli ŵo; naŵo, ili ŵabwene icilolo icikulu nefita, ŵalicilekele ukumupama Paulu.

³³ Peŋka icilolo ico icikulu calipalamine, nekumwikata, nekufiŵula ati mukakeni neminyololo iŵili; eli ciŋgepusya ati: Mboyu ninani? Wacite'ndo?

³⁴ Popele ŵambi ŵaliŵilicisye fimbi, ŵambi naŵo fimbi nafyo, aŵapakati keŵumba. Lomba, pakuti tacaisiŵile ifyacine pakuti pacipupa, calififundile ati mutwaleni kwiliŋga.

³⁵ Peŋka, ili aficile Paulu pacitantilo, lomba alipapilwe kufita, pakuti paŵumpuwa bweŵumba;

³⁶ pakuti iŵumba lyaŵantu lyalimulondele, ili liŵilicisya ati: Mufumyeni-po!

³⁷ NaPaulu, pakufwayo'kumwinjisya mwiliŋga, alilaŵile kucilolo ico icikulu ati: Ndaŵile nenu? Naco ati: Uliisi uŵuEla?

³⁸ Kansi toli muIjipiti uyo, uwasuŋgwilile aŵantu akale mukucite' fyakwalucila, nekuŵatanjilila mumpaŋga aŵakali amasausande ane?

³⁹ Sombi Paulu ati: Ndi muJuda, uwakuTaso wamucalo caCilica, uwamumusi utauli unini; ndukumukombeteleni ati munsuminine ati ndaŵile kuŵantu.

⁴⁰ Popele, ili camusuminine, Paulu, lomba aciimakene pacitantilo, alicilicile kukuŵoko kuŵantu. Lomba, ili caŵele celele ukwakuti, alilaŵile kuli ŵo mumulaka waŵaEbeya ati: