Ifyacitilwe 2 - Amashiwi Aba Lesa

¹ Peŋka, pakufika akasuŵa kewuŋgano lyaPentekosite, ŵonse ŵaliŵuŋgene pamo nemutima umo.

² Popele calipulilile ukufuma kwiulu icipupa koti kupupa kwacipupu icikulu, nekwisula muŋanda monse umo umu ŵaikele.

³ Peŋka syalibwenekele kuli ŵo imini isilekenemo koti mulilo, nekwikala pali ŵo ŵonse.

⁴ Naŵo ŵonse ŵaliiswile Umupasi Uswetelele, nekutatiko'kulawila nemini simbi, koti masiwi ayo aya walukuŵapela Umupasi.

⁵ Sombi kwalukwikala kuJelusalemi aŵaJuda ŵambi, aŵantu awaluŋgeme, aŵafumine kumikoka yawantu yonse iyapansi pano.

⁶ Peŋka'po, ili caumfwanicile icipupe'co, iŵumba lyaŵantu lyaliwuŋgene, nekukaŋkamikwe'kwakuti, pakuti aŵantu ŵonse ŵalukumfwa ati ŵalukulaŵila imilaka yesu.

⁷ Naŵo ŵalikaŋkamicilwe nekukaŋkamanc'kwakuti, nekulaŵila ati: Ŵoneni, aŵa-ŵantu aŵa lukulaŵila kansi ŵonse taŵali ŵakuGalili?

⁸ Mbasyani lomba tulukumfwa, fweŵo fweŵantu fwense, mumilaka yesu iyo iyi twafyalilwe-mo?

⁹ AŵaPafya, neŵaMadai, neŵaElami, neŵalukwikala kuMesopotamya, nakucalo caŵena-Juda, nakuKapadoca, nakuPonto, nakuAsya,

¹⁰ nakuFiluja, nakuPamfulya, nakucalo caIjipiti, nakumitala iyakuLibya isiŋgulucile Kulene, neŵalukulinsya awafumine kuLoma, neŵaJuda, neŵaalucile ŵaJuda,

¹¹ neŵakuCilete, neŵaAlabi; tulukumfwa ati ŵalukulaŵila mumilaka yesu ifyamilimo ikulu iyaŵaLesa.

¹² Popele ŵonse ŵalikaŋkamicilwe nekukaŋkamana, nekuŵulansyanya ati: Mbefi findo?

¹³ Sombi ŵambi naŵo ŵalukuseka, nekulaŵila ati: Ŵaikuta imfaina isyaŵukumo.

¹⁴ Sombi Petilo aliimakene pamo neŵaŵyakwe ikumi naumo, nekuŵilicisya kuli ŵo ati: Mweŵantu ŵamucalo caŵena-Juda, namweŵo mwense mwemwikala kuJelusalemi, fiisiŵeni ifi, mumfwisye amasiwi anji,

¹⁵ Pakuti aŵantu aŵa taŵapendelwe, koti nififi ifi mulukweŵa, pakuti ŵukumo akasuŵa katuntumuka lukoso;

¹⁶ sombi ifi nifyefyo ifyalaŵilwe kuli Joeli uwakusimika ati:

¹⁷ ŴaLesa ŵalilaŵile ati: Pansiku syakupela-ko, pakaŵa'ti Ŋketila-po Umupasi wanji paŵamunefu ŵonse; Popele aŵana ŵenu aŵalalume neŵanakasi ŵakalukusimika, Newasaŋkwa ŵenu ŵakalukuŵona ifyakuŵona, Neŵacekulu ŵenu aŵalalume naŵo ŵakalukulota ifiloto;

¹⁸ Icine napaŵapyunjisi ŵanji aŵalalume neŵanakasi Ŋketila-po ifyaMupasi wanji pansiku isyo, naŵo ŵakalukusimika.

¹⁹ Kaŵili ŋkalanjisya ifyakukaŋkamana mwiulu, Netwisiŵilo pacalo capansi, Imilopa nemulilo neŋkumbi yacusi.

²⁰ Akasuŵa kakaaluka nimfinsi, Nemwensi nawo milopa, Ili takaŋgesa akasuŵa kaŵaSikulu, Ako akakulu akabwenekesye.

²¹ Popele fikaŵa kuŵantu ŵonse ukalilila isina lyaŵaSikulu ati akapuluka.

²² Mweŵantu, mweŵaIsilaeli, umfweni amasiwi aya: ŴaYesu ŵakuNasaleti, aŵantu aŵasuminwe kuli ŵaLesa pakuti pali mweŵo, nemilimo ikulu nefyakukaŋkamana netwisiŵilo, utu ŵacitile ŵaLesa naŵo pakati pali mweŵo; koti nifyopele'fyo ifi mŵisi mweŵene;

²³ aŵo ŵopele, ili ŵaposelwe kukufwaya ukwansicilwe nekwisiŵila limo kwaŵaLesa, mweŵo muminwe yaŵapupa mwaliŵatalicile, nekuŵepaya.

²⁴ Aŵo ŵaLesa eŵaŵaŵusisye, ili ŵakakulwile ukusomena kwamfwa; pakuti imfwa tayaisiŵile ukuŵekatisya.

²⁵ Pakuti Dafidi alilaŵile ifyaŵo ati: Nalukuŵaŵona ŵaSikulu pamenso anji insiku syonse, Pakuti ŵali kulwine lwanji, niiŋgesakutesiwa neŵo.

²⁶ Pakuti pali fyefyo umutima wanji walitemenwe, Nelumini lwanji nalo nekulukusemba; Nakaŵili umunefu wanji ukalukwikala nekucetekela:

²⁷ Pakuti tamukasya-po umupasi wanji muSyeoli, Neli ku sumina ati Umuntu wenu Uswetelele aŵone ukuwola.

²⁸ Mwalinjisiŵisye insila syaMweo; Mukanjisusya ukutemwa nemenso enu.

²⁹ Mweŵakwasu, ndiisi ukulaŵila bwino kuli mweŵo ifyakwe wisi fwe wakale Dafidi, ati alifwile, nekusikwa, necilende cakwe tucili naco naŵukumo.

³⁰ Pakuti ye wakusimika, nekwisiŵa ati ŵaLesa ŵalilayene nakwe necilapo ati: Paŵana aŵakufyalwa kuli weŵo, ŋkapyanika-po umbi mukwikala peteŵe lyoŵe.

³¹ Popele ye, pakubwene'fyo limo, alilawile ifyakuŵuka kwaŵaKlistu, ati ukusiwa muSyeoli ŵawa, neli munefu waŵo ukuŵona ukuŵola, woyu.

³² Aŵo-ŵaYesu ŵaLesa eŵaŵaŵusisye, nefyafyefyo fwense tuli nimboni.

³³ Peŋka ili ŵasuntwilwe peulu kukuŵoko kwaŵaLesa ukwalwine, nekupoka kuli ŵaWisiŵo ukulayo'kwaMupasi Uswetelele, ŵaitile'fi ifi mulukuŵona nekumfwa.

³⁴ Pakuti Dafidi taemine kwiulu, sombi umwine alilaŵile ati: ŴaYawe ŵalilaŵile kuli ŵaSikulu ŵanji ati: Ulukwikala kulwine lwanji,

³⁵ Ili nsiŋgatwalula utupondo toŵe cipuna icakusamina-po amakasa oŵe.

³⁶ Pakuti pali fyefyo, icikoto icaŵaIsilaeli conse ciisiŵe icine ati ŵaLesa ŵaliŵekalicile aŵo-ŵaYesu, aŵa mwatalicile, niŵaSikulu nakaŵili niŵaKlistu.

³⁷ Popele apo, pakumfwe'fyo, ŵalilasilwe mumitima yaŵo, nekulaŵila kuli Petilo nakutanjisi isyo simbi ati: Mweŵakwasu, mbatucite syani?

³⁸ Petilo naye alilaŵile kuli ŵo ati: Lapileni, muŵatisiwe mweŵo mwense mwisina lyaŵaYesu Klistu, ukwakulekelela ifyakuŵifya fyenu; eli mukapoka impese yaMupasi Uswetelele.

³⁹ Pakuti ukulaya kuli kuli mweŵo, nakuŵana ŵenu, nakuli ŵo ŵonse aŵacili ukutali; aŵo ŵonse aŵa ŵaketa ŵaSikulu Lesa wesu.

⁴⁰ Nakaŵili nemasiwi ambi aenji alisimicile, nekuŵacenjesya, nekulaŵila ati: Ŋgamulipulusye kucitentekwa ici icisendeme!

⁴¹ Lomba aŵo aŵasumine amasiwi akwe, ŵaliŵatisiwe; popele akasuŵa ako ŵalilundilwe-po aŵantu koti masausande atatu.

⁴² Naŵo ŵaliikele nemuŋkonsya muŵusambisi nekwambala kwantanjisi, nekulukukumala siŋkwa, nekulukutembela.

⁴³ Nekutina nekwisa pali ŵo ŵonse: nefimpelampela netwisiŵilo utwinji twalicitilwe kuntanjisi.

⁴⁴ Peŋka ŵonse aŵalukucetekela ŵaliikele pamo; nefintu fyaŵo fyonse fyali fimo;

⁴⁵ kaŵili ŵaliulile ifintu fyaŵo nemaŵoni aŵo, nekwaŵana ŵonse koti kupeŋga kwaŵo.

⁴⁶ Popele apo insiku nansiku ŵalukwikala nemuŋkonsya mwitempuli, nemutima umo, nekulukukumala siŋkwa kwaŵo, nekulukulya ifyakulya fyaŵo nekutemwa nekutekanya ukwamumitima,

⁴⁷ ili ŵaŵalemya ŵaLesa, nekulukutemiwa kuŵantu ŵonse. Popele ŵaSikulu ŵalukulunda-po pewuŋgano lyaŵo insiku nansiku aŵo aŵalukupuluka.