Ifyacitilwe 19 - Amashiwi Aba Lesa

¹ Paliŵele ati, ili aciikele Apolo kuKolinto, Paulu, pakupita pacalo icakuntulo, alificile kuEfesa, nekusaŋgana neŵasambile ŵambi:

² nekuŵepusya ati: Mwalipokele Umupasi Uswetelele ili mwacetekele? Naŵo ŵalilaŵile kuli ye ati: Koku, tatwaumfwile neli panini ati epo uli Umupasi Uswetelele.

³ Naye ati: Kansi nimundo mwaŵatisisiwe? Naŵo ati: Mukuŵatisya kwakwe Yoane.

⁴ Kumfwa Paulu ati: Yoane alukuŵatisya nekuŵatisya ukwakulapila, ili alaŵila kuŵantu ati: Ukwelelwa ukucetekela muli woyo ukesa munuma yanji: wopele eŵa Yesu.

⁵ Peŋka, ili ŵafyumfwile'fyo, ŵaliŵatisiwe mwisina lyaŵaSikulu Yesu.

⁶ Lomba, ili aŵatintile-po Paulu iminwe yakwe, Umupasi Uswetelele waliisile pali ŵo; naŵo ŵalukulaŵila nemini, nekulukusimika.

⁷ A ŵo ŵonse pamo ŵali aŵantu ikumi naŵaŵili.

⁸ Naye aliinjile mwisunagoge, nekulukulaŵilisya nemutima ukosele imyensi itatu, ili apicisya nekulukuŵatekenesya ifyafintu fyaŴufumu bwaŵaLesa.

⁹ Sombi, pakukosa mumitima nekulukupulaisya ŵambi aŵantu, nekulukutoŋgala lnsila pamenso amaŵumba aŵantu, alifumine kuli ŵo, nekuŵalekanya aŵasambile, nekulukupicisya insiku nansiku mwisukulu lyakwe Tulano.

¹⁰ Ifyo fyalicitilwe imyaka iŵili; fyopele'fyo ŵonse aŵalukwikala mucalo caAsya, aŵaJuda neŵaEla, ŵaliumfwile lsiwi lyaŵaSikulu.

¹¹ Kaŵili ŵaLesa ŵalicitile ifimpelampela ifyakucila, muminwe yakwe Paulu;

¹² fyopele'fyo ŵalitwite kuŵalwasi ifitambala netwakufwalila utwafulile kumuŵili wakwe; nao amalwasi nekuŵaleka, nemipasi iŵipile nekufuma-mo.

¹³ Sombi ŵambi aŵaJuda aŵakwenda-enda, aŵalaye, ŵaliikete imilimo iyakusimbula isina lyaŵaSikulu Yesu pali ŵaŵo aŵali nemipasi iŵipile, nekulaŵila ati: Ndukukufunda kuli ŵaYesu, aŵo aŵa atulisya Paulu!

¹⁴ Kaŵili eko ŵali aŵana ŵasanu naŵaŵili aŵalalume ŵamuntu umbi Sikefa, umuJuda, umupapatilisi umukulu, aŵacitile'fyo.

¹⁵ Popele umupasi uŵipile waliŵaasucile ati: WaYesu ndiŵesi, naPaulu naye ndimwisi! Sombi mbamweŵo nimweŵani?

¹⁶ Popele umuntu uyo uwali nemupasi uŵipile, alifukucile pali ŵambi ŵaŵili, nekuŵacila ŵoŵilo amakosa, nekuŵanasya, fyopele'fyo ŵaliŵutucile kunanda iyo ubwalondwa, nefiweŋga.

¹⁷ Lomba ifyo fyalisiŵilwe kuŵantu ŵonse, aŵaJuda neŵaEla, aŵalukwikala muEfesa; naŵo ŵonse ŵaliŵele nemwenso, nesina lyaŵaSikulu Yesu nalyo lyalikusiwe.

¹⁸ Nakaŵili ŵambi naŵo aŵenji, aŵacetekele, ŵaliisile ili ŵafisulula nekuŵulisisya ukucita kwaŵo.

¹⁹ Naŵambi aŵenji aŵakuŵuka ŵaliloŋganisye amabuku aŵo, nekuoca pamenso aŵantu ŵonse; popele ŵalipendele umuulo wao, nekuŵona ati nindalama syesilifa amasausande amakumi asanu.

²⁰ Fyopele'fyo lsiwi lya ŵaSikulu lyalikulile makosa nekucila.

²¹ Pakusile'fyo-fintu, Paulu alifwaile mumutima ati, pakupita pafyalo fyaMakedonya naAkaya, ŋkaye kuJelusalemi; nekulaŵila ati: Ili ŋkapito'ko, fikelelwa neŵo ukuŵona naLoma.

²² Lomba, ili atumine kuMakedonya ŵambi ŵaŵili aŵalukumupyunjila, Timote naElasito, ye umwine alisyele impindi mucalo caAsya.

²³ Impindi iyo caliŵucile necipupa icikulu icapaNsila.

²⁴ Pakuti umbi umuntu uwailicilwe ati niDemetilo, umufusi wesilifa, uwalukufula utuluŵi utupalene Atemi, aliletele imilimo iinji kuli ŵamasili:

²⁵ aŵo aliwawuŋgenye pamo neŵantu aŵamilimo yopele'yo, nekulaŵila ati: Mweŵame, muliisi ati fweŵo tulaŵa nemaŵoni esu pakuti pamilimo iyi.

²⁶ Kaŵili mulukuŵona nekumfwa ati takuli kweŋka kuEfesa, sombi monse mucalo caAsya ukusyala-ko panini, uyuPaulu atekenesya nekwalucila aŵantu aŵenji, ili alaŵila ati aŵo aŵacitilwe kuminwe taŵali niŵalesa.

²⁷ Lomba taili milimo yesu veŋka ilukupalamina ukupufiwa; sombi netempuli lyakwe lesa umwanakasi umukulu Atemi likaŵa lyalukoso; nakaŵili umwine akasulwa kuŵuleme bwakwe, uyo ŵonse aŵamucalo caAsya neŵamucalo conse icapansi eŵacindika.

²⁸ Popele, ili ŵafyumfwile'fyo, ŵalikalipile ukwakuti, nekuŵilicisya ati: Atemi waŵaEfesa emukulu!

²⁹ Popele nemusi wonse waliŵele nekupiliŋgana; neŵantu ŵaliŵutucile nemutima umo kuluŵansa, ili ŵaŵekete Gayo naAlisitako, aŵaMakedonya, aŵalwendo aŵaŵyakwe Paulu.

³⁰ Popele, ili alukufwaya Paulu ukwinjila kuŵantu, aŵasambile taŵamusumine.

³¹ Nakaŵili naŵambi, ifilolo ifikulu ifyamucalo caAsya, ifiŵusa fyakwe, fyalitumine aŵantu kuli ye, nekumukombetela ati tekulukulitakatila muluŵansa.

³² Pakuti pali fyefyo ŵambi ŵalukuŵilicisya fimbi, ŵambi naŵo fimbi nafyo: pakuti iŵumba ilyo lyalipiliŋgene; naŵo aŵenji aŵakucila taŵaciisiŵile-po iceŵo iciŵaŵuŋganine-po.

³³ Peŋka ŵalimufumisye Alecisanda mwiŵumba, aŵaJuda eŵamusindicile-ko. Popele Alecisanda alicilicile kukuŵoko ati ndilaŵilile kuŵantu.

³⁴ Sombi ili ŵabwene ati ye muJuda, ŵonse ŵalukuŵilicisya nesiwi limo ukupisya impindi siŵili ati: Atemi waŵaEfesa emukulu!

³⁵ Peŋka, ili alikalicile icisinsi iŵumba, umulembesi wamumusi alilaŵile ati: Mweŵantu ŵakuEfesa, mbawisamuntu utesi ati umusi waŵaEfesa eulame'tempuli lyakwe Atemi uyo umukulu, nacikaluŵi ico icaponene kuli Seu?

³⁶ Pakuti ifi-fintu tafiisi ukuleŋgululwa, ukumwelelweni ukulukwikele celele, nekuŵulo'kucito'ŵuluya neli panini!

³⁷ Pakuti mwaleta aŵantu aŵa, aŵataŵali ŵaŋo ŵamumatempuli, neli ŵakucoŵola lesa wesu umwanakasi.

³⁸ Pakuti pali fyefyo, kani Demetilo naŵamasili aŵo ali naŵo ŵali nemulandu pamuntu umbi, lomba kufilye kuliiswilwe, neŵakusololola naŵo eko ŵali; ŋgawasininansyanye!

³⁹ Sombi kani mulukufwaya akantu akafyeŵo fimbi nafyo, kakasolololwa mwiwuŋgano lyansiku syonse.

⁴⁰ Pakuti icine tulukulikulika mukusininwa pakuti pacipupa calelo, pakuti tapali iceŵo icakucicitila-po; nakaŵili ifyacici tatukesiŵa ukuŵulisisya bwino iŵumbe'li.

⁴¹ Popele, ili alaŵile'fyo, alipalaŋgenye iŵumba.