Ifyacitilwe 18 - Amashiwi Aba Lesa

¹ Panuma yafintu ifyo alifumine kuAtenai, nekufika nakuKolinto.

² Naye alisanjile umuJuda umbi, uwailicilwe ati niAkwila, umwina-Ponto, uwafumine akale panini kucalo caItalya, pamo nemukasi wakwe, Pilisicila; pakuti Klodyo alifundile aŵaJuda ŵonse ati ŋgaŵafume-mo muLoma. Popele Paulu aliile kuli ŵo.

³ Lomba, pakuti imilimo yaŵo imo, aliikele naŵo, nekulukupyuŋga naŵo pamo; pakuti imilimo yaŵo yakupasila'masema.

⁴ Kaŵili utusuŵa twasabata tonse alukupicisya mwisunagoge, nekulukutekenesya aŵaJuda neŵaEla.

⁵ Sombi ili ŵafumine kucalo caŵaMakedonya Silasi naTimote, Paulu alikakatisiwe kiwiSwi, nekulukusimika kuŵaJuda ati ŵaYesu niŵaKlistu.

⁶ Sombi ili ŵamucicile, nekulukucito'mucobwe, alikuntile icakufwala cakwe, nekulaŵila kuli ŵo ati: Imilopa yenu ŋgaikale pamitwi yenu mweŵene; neŵo ndiswetele. Ukuta tika kumpindi ino, nakulukuya kuŵenafyalo!

⁷ Naye alifumine-ko'ko, nekwinjila muŋanda yamuntu umbi uwailicilwe ati niTito Jusito, uwalukucindika ŵaLesa; nenanda yakwe yaliŵambakene nesunagoge.

⁸ Peŋka Klispo, impemba yamwisunagoge, alicetekele muli ŵaSikulu, pamo newamuŋanda yakwe ŵonse; nakaŵili aŵakuKolinto aŵenji, pakumfwa, ŵalicetekele nekuŵatisiwa.

⁹ Popele ŵaSikulu ŵalilaŵile kuli Paulu uŵusiku mukuŵoneka, ati: Wilukutina, ulukulaŵila, wilukwikele celele;

¹⁰ pakuti neŵo ndi naweŵo; tapali-po muntu uwakukupimpilila mukukusomesya; pakuti ndi neŵantu aŵenji muno-mumusi.

¹¹ Popele aliikele-mo mulya umwaka umo nemyensi isanu naumo peulu, ili asambisya Isiwi lyaŵaLesa pakati pali ŵo.

¹² Sombi pakulukuwekalika aŵaAkaya Galyo, lomba aŵaJuda nemutima umo ŵalimwimine Paulu, nekumutwala kucilye,

¹³ nekulaŵila ati: Uyu-muntu eulukuŵatekenesya aŵantu ati ŵalukuŵacindika ŵaLesa ukwakupulaisya amafunde.

¹⁴ Sombi, ili afwaile Paulu ukwasamuna pakanwa, Galyo alilaŵile kuŵaJuda ati: Umulandu uyu ŋga wakuŵifya neli wafiŵipile ifyaŵupupa, mweŵaJuda, ŋga waelelwa ati musumineni.

¹⁵ Sombi kani pali ukwipusya ukwamasiwi nemasina nemafunde enu mweŵene, milandu yenu; neŵo nsilukufwayo'kwisololola imilandu iyi!

¹⁶ Naye aliŵatamfisye pacilye.

¹⁷ Peŋka aŵantu ŵonse ŵalimwikete Sosiene, impemba yamwisunagoge, nekumupamina pacilye. Sombi Galyo taafilasile ifyofintu.

¹⁸ Popele Paulu, ili apembele nensiku simbi isinji panuma yafyefyo, alilaile awana-ŵaŋkasi, nekufumo'ko, nekwenda mubwato ukuya kucalo caSilya, pamo naPilisicila naAkwila. Lomba aliŵeyele mumutwi kuKencilea, pakuti ali necakulapa.

¹⁹ Naŵo ŵalificile kuEfesa; kopele uko alilekene naŵo. Sombi umwine aliinjile mwisunagoge, nekulukupicisya neŵaJuda.

²⁰ Popele ŵalimukombetele ati ekale nempindi imbi; sombi taasumine-po;

²¹ sombi aliŵalaile, nekulaŵila ati: Ukwelelwa neŵo ukuwuŋgana kucitenje ico icikesa kuJelusalemi; sombi ŋkabwelela kuli mweŵo, kani ŵaLesa ŵakasumina. Eli aimine nelwendo mubwato ukufuma kuEfesa.

²² Popele, ili atuntucile kuKaisalia, aliile nekuŵasekelela aŵekelesya, lomba nekuya kuAntioke.

²³ Ili aikele-ko impindi imbi, alikumbulucile, nekupita pacalo caGalatya necaFiluja ukuluŋgeme, ili akosya aŵasambile ŵonse.

²⁴ Popele umuJuda umbi, uwailicilwe ati niApolo, umwina-Alecisandala, umuntu wamano, aliisile kuEfesa; kaŵili ali nemilaŋgwe yamumalembo.

²⁵ Uyomuntu ewasambisiwe munsila yaŵaSikulu; ali nemuŋkonsya mumutima; alukulaŵila nekulukusambisya bwino ifintu ifyakuli ŵaYesu, ili esiŵile ukuŵatisya kwakwe Yoane kweŋka.

²⁶ Naye alitaticile ukulaŵilisya nemutima ukosele mwisunagoge. Sombi Pilisicila naAkwila, pakumumfwa, ŵalimupokele, nekumuŵulisisya bwino bwino insila yaŵaLesa.

²⁷ Peŋka, ili afwaile ukuya kucalo caAkaya, awana-ŵaŋkasi ŵalimusaŋgalesye, nekulemba iŋkalata kuŵasambile ati ŵakamupoke. Naye, ili aficile, aliŵofwele-ko ukwakuti aŵo aŵacetekele pakuti paluse;

²⁸ pakuti aliŵasinawilile ukwakuti aŵaJuda apaswetele, ili abwenesya kumalembo ati ŵaYesu niŵaKlistu.