Ifyacitilwe 16 - Amashiwi Aba Lesa

¹ Kaŵili alificile nakuDabe nakuLusiala; lomba kopele uko kwali umusambile umbi, isina lyakwe niTimote, umwana wamwanakasi umuJuda uwalukucetekela, sombi ŵawisi ŵaEla;

² uyo wali nempupo isiweme kuŵanaŵaŋkasi aŵakuLusiala nakulkonya.

³ Uyo-ye Paulu walukufwayo'kulukwenda nakwe. Popele alimupokele, nekumukopola, pakuti paŵaJuda aŵali kopele uko; pakuti ŵonse aŵo ŵaliisiŵile, ati ŵawisi ŵaEla.

⁴ Pakulukupitana ili ŵenda pamisi, ŵaliŵafundile aŵantu nemafunde ayo asalulwilwe kuntanjisi neŵakulu aŵakuJelusalemi, ati ŵalukwalonda.

⁵ Fyopele'fyo amakelesya alikosiwe mukucetekela, nekufula aŵantu aŵenji insiku nansiku.

⁶ Popele apo ŵalipitile ponse pacalo caFiluja necaGalatya, pakuti pakukanisiwa kuMupasi Uswetelele, ati: Tekulaŵile'Siwi mucalo caAsya.

⁷ Peŋka pakufika ukusiŋkamene kucalo caMisya, ŵaliesesye ukuya kucalo caBitunya; sombi Umupasi waŵaYesu tawaŵasuminisye.

⁸ Popele ŵalipitile paMisya, nekufika kuTilowa.

⁹ Peŋka ukuŵoneka kwalibwenekele kuli Paulu uŵusiku: Paliimakene umuntu uwakucalo caMakedonya alukumukombetela ati: Kamwisa kuMakedonya, mukatofwe-ko!

¹⁰ Lomba, ili abwene uku ŵoneka, twalipulilile ukwesyo'kuya kucalo caMakedonya, pakuti pakucetekela ati ŵaLesa ŵatwita ati tukatulisye leeŵo Iciweme kuli ŵo.

¹¹ Peŋka'po, pakufuma kuTilowa, katuya mubwato munsila iluŋgeme, nekufika kuSamotilake; popele ŋgamailo nakuNeapoli.

¹² Ukufumo'ko katuya nakuFilipoi, umusi wakuMakedonya uwakucila uŵukulu napali yo yonse iyapamitala iyo, uwatusucile ukufuma kucalo caŵaLoma; popele twaliikele mumusi mulya simbi insiku.

¹³ Lomba pakasuŵa kasabata twalifumine-mo mumusi nekuya pambali yanika, apo twacetekele ati epo pali apakutembelela; peŋka twaliikele pansi, nekwambala neŵanakasi aŵaŵuŋgene.

¹⁴ Popele nemwanakasi umbi, isina lyakwe niLudya, uwalukuulisya ifikasicile, uwakumusi waTuatelya, umuntu uwalukucindika ŵaLesa, wali tumfwile; lomba ŵaSikulu ŵalimwiswilepo pamutima wakwe, ati alukukutika ifintu ifyo ifyalaŵilwe kuli Paulu.

¹⁵ Peŋka, pakuŵatisiwa ye newamuŋanda yakwe, alitukombetele ati: Kani mwaŋgesya ati nditekenye kuli ŵaSikulu, mwinjile muŋanda yanji, mulukwikele. Naye alitukakatisye.

¹⁶ Pakulukuya fweŵo uko ukwakutembelela, paliŵele ati moye umbi, uwali nemupasi uwakusimika, alitukumenye; uyo alukunoŋkela ŵaŵisikulu amaŵoni aenji, pakuti pakusimika;

¹⁷ wopele alukutulonda fweŵo naPaulu, ili aŵilicisya ati: Awantu aŵa ŵapyunjisi ŵaŵaLesa Aŵo Aŵacilile, ŵalukumutulisisyeni insila yakupulusya.

¹⁸ Kaŵili alukucite' fyo insiku isinji. Sombi Paulu aliŵele nensoni ukwakuti, nekwaluka, nekulaŵila kumupasi uyo ati: Ndukukufunda, mwisina lyaŵaYesu Klistu, ati ufumemo muli ye! Nawo walifumine-mo impindi iyo yopele.

¹⁹ Sombi ŵawisikulu, pakuŵona ati icakutunoŋkela amaŵoni casila, ŵaliŵekete Paulu naSilasi, nekuŵakulila kumupunda uwakuulila-po kumpemba.

²⁰ Popele, pakuŵatwala kuŵakusololola, ŵalilaŵile ati: Aŵantu aŵa, aŵaJuda, ŵalukukatasyo'kwakuti umusi wesu,

²¹ nekulanjisya ukwisiŵila uko takwelelwe fweŵo ukupoka, neli kukulonda, fweŵaLoma.

²² Popele neŵumba lyaŵantu lyaliŵemine; neŵakusololola naŵo ŵaliŵakwamawilile nefyakufwala fyaŵo ukuŵafula, nekuŵula aŵantu ati ŵapameni kundondo.

²³ Peŋka, ili ŵaŵapamine ifinji, ŵaliŵaposele mwikati, nekumuŵula kalama wamwikati ati aŵalamisye.

²⁴ Naye, pakumfwa ukuŵulo'ko, aliŵaposele mucipinda icamukati kekati; nekuŵakacisya amolu aŵo mumakusu.

²⁵ Sombi, pakati kaŵusiku, Paulu naSilasi ŵalukutembela nekwimbe'nyimbo kuli ŵaLesa; naŵakaili naŵo ŵalukuŵakutika.

²⁶ Lomba necitulika icikulu calipulilile ukwisa, fyopele'fyo ifyapansi ifyakwikati fyailieŋkene. Impindi iyo yopele, napamilyaŋgo yonse paliiswilwepo, nefyakuŵakaka aŵo ŵonse fyalikakulucile.

²⁷ Peŋka kalama, ili aŵucite mutulo, nekuŵona ati pamilyaŋgo yakwikati paliisucile, alisomwene impoko yakwe, ati ndiipaye, pakuti pakweŵa ati ŵakaili ŵafyuka.

²⁸ Sombi Paulu aliŵilicisye nesiwi'likulu ati: Wilisomesya, pakuti epo tuli fwense.

²⁹ Popele aliŵaŵulile ati leteni inyale, nekusotokelamo nekuwila pansi pamenso aŵaPaulu naSilasi, ili atutuma pakuti pamwenso;

³⁰ nekuŵafumya-mo, nekulaŵila ati: Mweŵasikulu, ncite syani ati mpuluke?

³¹ Naŵo ati: Ulukupema-mo muli ŵaSikulu Yesu, eli ukapuluka, weŵo neŵamuŋanda yoŵe.

³² Naŵo ŵalilaŵile lsiwi lyaŵaSikulu kuli ye nakuli ŵaŵo ŵonse awamuŋanda yakwe.

³³ Naye impindi iyo yopele iyaŵusiku aliŵapokele, nekuŵasamfya nemikakambo yaŵo; nekuŵatisiwa, ye umwine neŵantu ŵakwe ŵonse, impindi iyo yopele.

³⁴ Naye aliŵenjisye muŋanda yakwe, nekuŵatekela nefyakulya, nekulukusembo'kwakuti, pamo newamuŋanda yakwe ŵonse, ili ŵacetekele muli ŵaLesa.

³⁵ Sombi, pakuco'ŵusiku, aŵakusololola ŵalifitumine ifilolo, nekulaŵila ati: Muŵakakulule aŵantu aŵo!

³⁶ Peŋka kalama alimuŵulile Paulu amasiwi ayo, nekulaŵila ati: Aŵakusololola ŵatuma aŵantu mukumukakululeni; fumeni-mo lomba, mulukuya neŵutende.

³⁷ Sombi Paulu alilaŵile kuli ŵo ati: Ŵalitupamine apaswetele, nekutufumbucila lukoso, fweŵaLoma, nekutuposa mwikati: kansi ŵukumo ŵalukutufumya kumpelo? Fwewaswe! Sombi ŋgawese aŵene, ŵatufumye!

³⁸ Popele ifilolo fyaliŵaŵulile aŵakusololola amasiwi ayo: naŵo ŵalitinine pakumfwa ati ŵaLoma.

³⁹ Naŵo ŵaliisile, nekuŵakombetela: lomba, pakuŵafumya, ŵaliŵakombetele ati fumeni-mo mumusi muno.

⁴⁰ Ŵo ŵalifumine-mo mwikati, nekwinjila mwa Ludya; popele, ili ŵaŵabwene aŵana-ŵaŋkasi, ŵaliŵasaŋgalesye, nekukumbuluka.