Ifyacitilwe 14 - Amashiwi Aba Lesa

¹ Lomba muIkonya paliŵele ati ŵaliinjile pamo mwisunagoge lyaŵaJuda, nekulukulaŵila, fyopele'fyo iŵumba ilikulu IlyaŵaJuda neŵaEla ŵalicetekele.

² Sombi aŵaJuda aŵalukuleŋgulula ŵalisuŋgwilile imitima yaŵenafyalo, nekuŵatekenesya ifiŵipile aŵanaŵaŋkasi,

³ Popele apo ŵaliikele impindi ikulu ili ŵalaŵilisya nemitima ikosele iyamuli ŵaSikulu, aŵasimicile ifyakwisiwi lyaluse lwaŵo, nekulukusumina ati utwisiŵilo nefimpelampela filukucitwa kuminwe yaŵo.

⁴ Sombi iŵumba ilyamumusi lyalilekene umupaka; ŵambi ŵalukusaŋkana neŵaJuda; ŵambi naŵo nentanjisi.

⁵ Popele, pakusipimpilila neŵenafyalo neŵaJuda pamo nempemba syaŵo mukusipensya nekusipama amabwe,

⁶ syaliisiŵile, nekufyuka ukuŵutucila kuLusiala nakuDabe imisi yaku Lukaonya, nakumitala iyasiŋgulucile:

⁷ kopele uko syalitulisisye leeŵo leiweme.

⁸ Lomba kuLusiala kwaliikele umbi umuntu, utaakwete-makosa mumakasa, uwafyelwe neŵulema, utaalukwenda neli limo.

⁹ Uyo aliumfwile Paulu alukulaŵila; naye Paulu, pakumutontomeka nekuŵona ati ali nekucetekela ukwakumuŵusya,

¹⁰ alilaŵile nesiwi'likulu ati: Ima, woloke mumakasa oŵe! Naye alisotokele nekwenda.

¹¹ Popele amaŵumba aŵantu, ili ŵabwene ifi acitile Paulu, ŵaliŵilicisye, nekulaŵila mumulaka wakuLukaonya ati: Ŵalesa ŵaselucila kuli fweŵo necipasyo caŵantunsi!

¹² Naŵo ŵalimwilicile Banaba ati niSeu, naPaulu naye ati niElime, pakuti ye wakulaŵila ukwakucila.

¹³ Popele umupapatilisi wakwe Seu, itempuli lyakwe lyali kwisonde lyamusi, aliletele iŋombe nefinsokolwa kumisiko, nekufwayo'kucito'mulambu pamo nemaŵumba aŵantu.

¹⁴ Sombi intanjisi, Banaba naPaulu, pakumfwe'fyo, syalipandawile ifyakufwala fyasisyo, nekucilucila mwiŵumba, nekulukuŵilicisya

¹⁵ ati: Mweŵasikulu, mbanindo mulukucitile'fi? Nafweŵo tuli ŵantunsi, tuli nemekalilo opele aenu; twamuleteleni leeŵo Iciweme, ati mufutatile kufintu ifi'fyalukoso, mwalucile kuli ŵaLesa ŵaMweo, awaleŋgele iulu necalo necisiŵa, nefintu fyonse ifili-mo,

¹⁶ aŵasumine, pafitentekwa fyakale, ati aŵantu aŵamikoka yonse ŵalukwenda munsila syaŵo aŵene.

¹⁷ Naŋgawe'fyo taŵalilekele aŵakuŵule'mboni, pakuti ŵalukucite'fiweme, nekumupeleni imfula syakwiulu, nemyaka iyakumena bwino imbuto, nekwisusya imitima yenu ifyakulya nekutemwa.

¹⁸ Nemasiwi ayo kwalikatesye ukwakanya amaŵumba aŵantu ati ŵeŋgaŵacitilo'mulambu.

¹⁹ Sombi ŵaliisile uko aŵaJuda aŵafumine kuAntioke nakulkonya; naŵo nekwatekenesya amaŵumba aŵantu, nekumupama Paulu kumabwe, nekumukulumwina pesonde lyamusi, ili ŵeŵa ati afwa'kale.

²⁰ Sombi pakwimakana aŵasambile ukumusiŋguluka, aliŵucile nekwinjila mumusi; ŋgamailo alikumbulucile pamo nakwe Banaba, nekuya kuDabe.

²¹ Popele apo, ili ŵatulisye leeŵo Iciweme mumusi uyo, nekuŵaalulula aŵasambile aŵenji, ŵalibwelele kuLusiala nakulkonya nakuAntioke,

²² ili ŵakosya imitima yaŵasambile, nekuŵacenjesya ati ŵakulukwikele muku cetekela, nakaŵili ati ukutwelelwa ukupita pamapensyo aenji, ili tatuŋgenjila muŴufumu bwaŵaLesa.

²³ Naŵo ŵaliŵasalulwilile aŵakulu mumakelesya onse, nekulukutembela, ili ŵakane'fyakulya; eli ŵaŵasisisye kuli ŵaSikulu, muli ŵo emo ŵacetekele.

²⁴ Popele ŵalipitile paPisilya, nekufika kuPamfulya.

²⁵ Lomba ili ŵalaŵile lsiwi muPaga, ŵaliile kuAtalya.

²⁶ Pakufumo'ko ŵaliile mubwato kuAntioke, kopele uko uku ŵatuminwe kuluse lwaŵaLesa, pakuti pamilimo iyo iyi ŵakonsesye.

²⁷ Popele ili ŵaficile nekuwuŋganya aŵekelesya, ŵaliŵulisisye ifintu fyonse ifi ŵacitile naŵo ŵaLesa, nakaŵili ati ŵaliŵeswilile-po aŵenafyalo umulyaŋgo wakucetekela.

²⁸ Peŋka ŵalukwikala impindi ikulu neŵasambile.