Ifyacitilwe 13 - Amashiwi Aba Lesa

¹ Lomba eko ŵali kuAntioke mwikelesya ilyali uko, aŵakusimika neŵasambisi Banaba naSimyoni uwailicilwe ati niNiga, naLuco uwakuKulene, naManaeni uwalelelwe pamo naElode impemba, naSaulu.

² Peŋka ili ŵalukupyunjila ŵaSikulu, nekulukukane'fyakulya, lomba Umupasi Uswetelele walilaŵile kuli ŵo ati: Banaba naSaulu mulekane naŵo pakuti pali neŵo, ŵakacite'milimo iyo iyi naŵasalulwila.

³ Popele apo, pakusilo'kulikanyo'kulya, nekutembela, nekuŵatintila-po iminwe yaŵo, ŵaliŵatumine.

⁴ Fyopele'fyo ŵo, aŵatuminwe kuMupasi Uswetelele, ŵaliile kuSelukea; pakufumo'ko ŵaliile mubwato kuKupilo.

⁵ Peŋka, ili ŵali kuSalami, ŵalitulisye Isiwi lyaŵaLesa mumasunagoge aŵaJuda. Kaŵili ŵali naYoane umuntu waŵo.

⁶ Popele, pakupita pansumbu yonse, nekufika kuPafo, ŵalisanjile umuntu umbi uwabwaŋga, uwakusimika uwakutumpaika, umuJuda, isina lyakwe niBayesu;

⁷ uyo wali nemwikalicisi Sajo Paulu, umuntu wakalaŋgo. Uyo aliitile Banaba naSaulu, nekufwayo'kumfwa Isiwi lyaŵaLesa.

⁸ Sombi Eluma, uyo uwabwaŋga (pakuti isina lyakwe elyelyo pakwaluka), aliŵacicile, alukufwayo'kumulu fya umwikalicisi kukucetekela.

⁹ Sombi Saulu, uwailicilwe limbi ati niPaulu, aliiswile Umupasi Uswetelele, nekumutontomeka,

¹⁰ nekulaŵila ati: Wewiswile ifyakutumpaika newuŋgwa ŵonse, wemwana wamusensesi, wemupate wafiluŋgeme fyonse, tokacileko'kusendeka insila syaŵaSikulu isiluŋgeme?

¹¹ Pano ŵona, ukuŵoko kwaŵaSikulu kuli pali weŵo; ulukuŵa nimpofu, teti uŵone-po akasuŵa impindi imbi! Impindi iyo yopele paliponene pali ye kamfwa nemfinsi; naye alukwenda-enda ili afwaya aŵakumuku lika-ko.

¹² Naye umwikalicisi, pakuŵone'fyo ifyacitilwe, walicetekele, pakuti walukukaŋkamana paŵusambisi bwaŵaSikulu.

¹³ Peŋka Paulu neŵaŵyakwe ŵaliimine mubwato ukufuma kuPafo, nekufika kuPaga mucalo caPamfulya; sombi Yoane alilekene naŵo nekubwelela kuJelusalemi.

¹⁴ Sombi ŵo, pakupitilila kuPaga, ŵalificile kuAntioke uwakuPisilya; naŵo ŵaliinjile mwisunagoge pakasuŵa kasabata, nekwikala.

¹⁵ Popele, pakusilo'kupenda'mafunde nefyaŵakusimika, impemba syamwisunagoge syalitumine amasiwi kuli ŵo ati: Mweŵakwasu, kani muli nemasiwi akufunda aŵantu, kamulaŵila!

¹⁶ Peŋka Paulu aliimakene, nekucilika kukuŵoko nekulaŵila ati: Mweŵantu ŵaŵaIsilaeli, namweŵo mwemulukutonda ŵaLesa, umfweni!

¹⁷ ŴaLesa ŵaŵantu aŵa aŵaIsilaeli ŵalisalulwile ŵawisifwe, nekuŵacindika aŵantu, ili ŵaikele mucalo caIjipiti; popele kucitala ŵaliŵatanjilile ukuŵafumya-mo mulya.

¹⁸ Popele apo imyaka koti makumi ane ŵalukwalelesa amekalilo aŵo akatesye mumpaŋga,

¹⁹ Peŋka pakusilo'konala imikoka yaŵantu isanu naiŵili mucalo caKanani, ŵaliŵapyanicile icalo caŵo imyaka koti myanda ine nemakumi asanu.

²⁰ Panuma yafintu ifyo, ŵaliŵapele neŵakusololola ukufika nakuli Samweli uwakusimika.

²¹ Pantanjile ŵalilombele imfumu; naŵo ŵaLesa ŵaliŵapele Saulu, umwana wakwe Cisi, umuntu wamukoka wakwe Benjamini, imyaka amakumi ane.

²² Peŋka, pakumufumya uyo, ŵalimupyanicile-po Dafidi ati aŵe nimfumu yaŵo; ifyakwe naye ŵalisimicile nekulaŵila ati: Naŵona Dafidi, umwana wakwe Jese, umuntu uli koti mutima wanji, ukacito'kufwaya kwanji konse.

²³ Peŵumba lyaŵakamufyalwa ŵamuntu uyo, ŵaLesa ŵaliletele kuŵaIsilaeli aŵakupulusya, ŵaYesu, koti kulaya kwaŵo;

²⁴ pakweŵa'ti Yoane alitanjile ukutulisya ukuŵatisya ukwakwaluluka kuŵantu ŵonse aŵaIsilaeli, lomba tawaŋgesa ŵa Yesu.

²⁵ Popele Yoane, pakupalamina ukusila kwalwendo lwakwe, alilaŵile ati: Mbamulukweŵa ati ninenani? Nsili niwoyo. Sombi ŵoneni, ulukwisa panuma panji umbi, iŋkwawilo isyamumakasa akwe nsielelwe neŵo ukusikakulula.

²⁶ Mweŵakwasu, mweŵana ŵacikoto cakwe Ablaamu, namweŵo, peŵumba lyenu, mwemulukutonda ŵaLesa, kuli fweŵo isiwi lyakupulusya uku eko lyatumwa.

²⁷ Pakuti aŵo aŵalukwikala kuJelusalemi, nempemba syaŵo, pakuti taŵaŵesiŵile, neli kwisiŵa'masiwi aŵakusimika, ayo alukupendwa utusuŵa twasabata tonse, ŵaliapelenye pamo pakuŵasinina.

²⁸ Kaŵili, naŋgawa ati taŵabwene-po umulandu wakuŵepaila-po, ŵalikombetele Pilati ati ŵepaiwe.

²⁹ Peŋka, pakusilo'kupelanya pamo fyonse ifyalembelwe ifyakuli ŵo, ŵaliŵapatwile pamuti, nekuwawika mucilende,

³⁰ Sombi ŵaLcsa ŵaliŵaŵusisye pakati kaŵafwile.

³¹ Popele ŵalibwenwe insiku isinji kuli ŵaŵo aŵafumine naŵo kuGalili, nekuya kuJelusalemi: aŵo ŵopele nimboni syaŵo kuŵantu Wukumo.

³² Nafweŵo tulukumuleteleni ifyeŵo ifiweme, ifyakulaya uko ukwalailwe ŵawisifwe,

³³ ati ŵaLesa ŵaliŵacitile koti nifyopele' fyo aŵana ŵesu, pakuŵaŵusya ŵaYesu; koti nifyopele'fyo kaŵili ifyalembelwe mwisamo lyaŵuaŵili, ati: Uli mwana wanji; lelo nakufyala.

³⁴ Nakaŵili ifyakuŵaŵusya kwapaŵafwile, aŵakuŵulo'kubwelela liŵili mukuŵola, ŵalilaŵile ifyakuŵe'fi ati: Ŋkamupeleni ifiswetelele ifyacine, ifyakuli Dafidi.

³⁵ Pakuti mwisamo limbi alilaŵile ati: Tamukasumina ati umuntu wenu uswetelele aŵono'kuŵola.

³⁶ Pakuti Dafidi, pakusilo'kucito'kufwaya kwaŵaLesa mucitentekwa cakwe, aliile mutulo nekuŵikwa pamo naŵawisi, nekuŵono'kuŵola.

³⁷ Sombi aŵo aŵa ŵaŵusisye ŵaLesa, taŵabwene-po ukuŵola.

³⁸ Pakuti pali fyefyo, mweŵakwasu, isiŵeni ati muŵantu aŵa, ukulekelela kwafyakuŵifya kulitulicile,

³⁹ nakaŵili pakuti pali ŵo aŵantu ŵonse ulukucetekela aliluŋgeme kufintu fyonse, kuli fyefyo ifi tamwaisiŵile ukuluŋgama mumafunde akwe Mose.

⁴⁰ Pakuti pali fyefyo cenjeleni, fiiŋgesakwisa kuli mweŵo, ifyo ifyalaŵilwe kuŵakusimika, ati:

⁴¹ Ŵoneni mweŵakupufya, mukaŋkamane musimine, Pakuti ndukucito'mulimo pansiku syenu, Umulimo utamukalukucetekela neli panini, Naŋgawa ati umbi akamutulileni.

⁴² Popele, pakufuma-mo, ŵaliŵakombetele ati mukatuŵule amasiwi aya pakasuŵa kasabata akamailo.

⁴³ Peŋka, pakutoŵoloka aŵantu aŵamwisunagoge, aŵaJuda aŵenji neŵaalucile ŵaJuda aŵatekenye ŵalilondele Paulu naBanaba; naŵo, pakwambala naŵo, ŵaliŵakosesye amasiwi ati mulukwikala muluse lwaŵaLesa.

⁴⁴ Ŋgamuluŋgu wamailo pakasuŵa kasabata, ŵaliŵuŋgene koti niŵo ŵonse aŵamumusi mukumfwa Isiwi lyaŵaLesa.

⁴⁵ Sombi aŵaJuda, pakuŵona amaŵumba, ŵaliŵele necikani, nekulukuleŋgulula ifintu ifyo ifi alaŵile Paulu, nekulukucoŵola.

⁴⁶ Peŋka Paulu naBanaba ŵalilaŵilisye nemitima ikosele ati: Kwalielelwe ati lsiwi lyaŵaLesa litaŋge ukulaŵilwa kuli mweŵo. Sombi, pakuti mulukulisukata, nekulisinina mweŵene ati tatwelelwe umweo uwamuyayaya, ŵoneni, tulukwalulucila kuŵenafyalo.

⁴⁷ Pakuti ŵaSikulu ŵalituŵulile ati: Nakuŵika weŵo koti ninyale iyakuŵenafyalo, Ati uŵe wakuŵapulusya aŵo aŵamufyalo ifipelele-ko lukoso.

⁴⁸ Nawo aŵenafyalo, pakumfwe'fyo, ŵalukutemwa nekulicindika lsiwi lyaŵaLesa. Popele ŵonse aŵo aŵasalulwilwe kumweo uwamuyayaya ŵalicetekele.

⁴⁹ Peŋka isiwi lyaŵaSikulu lyalipalaŋganisi we monse mumitala iyo.

⁵⁰ Sombi aŵaJuda ŵalisuŋgwilile aŵanakasi aŵatekenye aŵacindeme, neŵakulu aŵamumusi, nekuŵusya ifyakuŵapensya Paulu naBanaba, nekuŵatamfya ukuŵacisya imipaka yaŵo.

⁵¹ Sombi ŵo ŵaliŵakuntile nekuŋgu lyamumakasa aŵo, nekufika kulkonya. Naŵo aŵasambile ŵaliiswile ukutemwa neMupasi Uswetelele.