Ifyacitilwe 11 - Amashiwi Aba Lesa

¹ Kansi intanjisi newana-ŵaŋkasi aŵali mucalo caŵena-Juda ŵaliumfwile ati neŵenafyalo ŵalipokele lsiwi lyaŵaLesa.

² Popele, ili aficile Petilo kuJelusalemi, aŵo aŵali ŵakopwelwe ŵalipicisye nakwe icikaka,

³ ati: Weŵo waliinjile muŵantu aŵakuŵulo'kukopolwa, nekulukulya naŵo!

⁴ Sombi Petilo alitaticile ukuŵaŵulisisya nemasiwi akupendulula ati:

⁵ Nali kumusi wajopa, nalukutembela; peŋka nalilesucile nekuŵona ukuŵoneka: icintu cimbi cilukuseluka, koti ninsalu ikulu, ilukutulwa kwiulu mumikoŋko ine; popele calificile nakuli neŵo.

⁶ Lomba, pakucitontomeka, nalialakenye nekuŵona inama syapansi pano isyenda kumolu ane nefilwani nefiloŋgolo nefyuni fyamwiulu.

⁷ Kaŵili naliumfwile isiwi lilukulaŵila kuli neŵo ati! Ima, Petilo, wipaye, ulye!

⁸ Sombi neŵo ati: Koku mweŵaSikulu, pakuti ifintu ifinaŋgwa ifiŵipile tafiŋgenjila mukanwa kanji neli limo.

⁹ Sombi lya liasucile liŵili isiŵi ilyakufuma kwiulu ati: Ifyo ifi ŵaswesya ŵaLesa, tekufieŵa weŵo ati finaŋgwa!

¹⁰ Kaŵili ifyo fyalicitilwe litatu; popele fyonse fyalisunsilwe kwiulu.

¹¹ Kusaŋga impindi iyo yopele nikuŵantu ŵatatu ŵaliimakene pesonde pananda iyi twali-mo fweŵo, aŵatuminwe kuli neŵo ukufuma kuKaisalia.

¹² Popele Umupasi walimbulile ati: Koya naŵo; tekusalulula. Nakaŵili aŵaŵakwasu ŵosanu naumo naliile naŵo; popele twaliinjile muŋanda yamuntu uyo.

¹³ Naye alituŵulile ati alibwene iŋkalamba iliimakene muŋanda yakwe, nekulaŵila ati: Tuma aŵantu ku Iopa, mukuleta Simoni, uwilicilwe ati niPetilo;

¹⁴ akalaŵila amasiwi kuli weŵo, akukupulusya weŵo newamuŋanda yoŵe ŵonse.

¹⁵ Peŋka ili nataticile ukulaŵila, Umupasi Uswetelele waliponene pali ŵo, koti nifyopele'fyo napali fweŵo pakutaŋga,

¹⁶ Eli nalaŋgulucile ilyo-siwi lyaŵaSikulu ili ŵalaŵile ati: Yoane icine alukuŵatisya mumenda; sombi mweŵo mukaŵatisiwa muMupasi Uswetelele.

¹⁷ Lomba kani ŵaLesa ŵaliŵapele impese, koti nifyopele'fyo ifi ŵapele fweŵo, ili twacetekele muli ŵaSikulu Yesu Klistu, mbaneŵo ninenani niŋgacicila-po ŵaLesa?

¹⁸ Naŵo, ili ŵaumfwile'fyo-fintu, ŵaliikele celele, nekulukuŵalemya ŵaLesa, nekulaŵila ati: Kansi neŵenafyalo naŵo, ŵaLesa ŵaliŵapele ukwalulucila kuMweo.

¹⁹ Popele apo aŵo awapalaŋgene ponse ponse pakuti pakuŵapensya uko ukwataticile pali Stefano, ŵalificile ili ŵenda nakuPoinike naKupilo naAntioke, nekulukulaŵila lsiwi kuŵaJuda ŵeŋka.

²⁰ Sombi peŵumba lyaŵo epo ŵali ŵambi aŵakuKupilo naKulene; aŵo ŵopele, pakufika kuAntioke, ŵalukulaŵila nakuŵaEla, ukulukutulisya ŵaSikulu Yesu.

²¹ Popele ukuŵoko kwaŵaSikulu kwali naŵo; lomba aŵenji aŵacetekele ŵalialucile kuli ŵaSikulu.

²² Peŋka impupo syaŵo syalificile mumatwi aŵekelesya ilyali kujelusalemi; naŵo ŵalitumine Banaba ati afike kuAntioke.

²³ Naye, ili aficile, nekuŵona uluse lwaŵaLesa, alisaŋgalele; nekuŵacenjesya ŵonse, ati mulukuŵakoŵamina ŵaSikulu nemitima ikosele.

²⁴ Pakuti ye muntu uweme uwiswile Umupasi Uswetelele nekucetekela; naŵo aŵantu aŵenji ŵalisaŋkanine kuli ŵaSikulu.

²⁵ Popele apo Banaba aliile kuTaso mukumufwaya-fwaya Saulu;

²⁶ pakumuŵona, alimuletele kuAntioke. Paliŵele ati umwaka umo wonse ŵaliŵuŋgene pamo neŵekelesya, nekulukuŵasambisya aŵantu aŵenji; kaŵili kuAntioke aŵasambile ŵalitanjile ukwilikwa ati ŵena-Klistu.

²⁷ Lomba insiku isyo ŵalifumine kuJelusalemi aŵakusimika, nekufika kuAntioke.

²⁸ Eli waimakene umbi, isina lyakwe niAgabo, nekusimika neMupasi ati insala iyakuti ikesa pacalo conse icapansi; iyo yaliisile pansiku syakwe Klodyo.

²⁹ Popele aŵasambile ŵonse koti makosa aŵo ŵati ŵakatume ifyakuŵofwa-ko awana-ŵaŋkasi aŵaikele mucalo caŵena-Juda.

³⁰ Ifyo ŵalificitile icine, nekufituma kuŵakulu muminwe yaŵaBanaba naSaulu.