Ifyacitilwe 10 - Amashiwi Aba Lesa

¹ Eko ali kuKaisalia umbi umuntu, isina lyakwe niKonelyo, icilolo cafita umwanda, iceŵumba ilyailicilwe ati Liŵumba lyaŵalialya;

² umuntu utekenye, uwalukutina ŵaLesa pamo neŵamuŋanda yakwe ŵonse, uwalukupe'fyakupa lukoso ifinji kuŵantu, nekulukutembela kuli ŵaLesa insiku syonse.

³ Uyo alibwene mukuŵoneka apaswetele, pampindi yakuteyama'kasuŵa, Iŋkalamba yaŵaLesa ilukwinjila umwali ye, nekulaŵila kuli ye ati: Konelyo!

⁴ Naye nekwitontomeka, nekuŵa nemwenso, nekulaŵila ati: Nindo, Sikulu? Nayo yalilaŵile kuli ye ati: Ukutembela koŵe nefyakupa fyoŵe fyafika kwiulu mukuŵeŵucisya ŵaLesa.

⁵ Pano lomba utume aŵantu kuJopa, mukuleta umuntu, isina lyakwe niSimoni, limbi nalyo niPetilo.

⁶ Alukwikala pamo naumbi Simoni umunyucisi; iŋanda yakwe ili pambali yacisiŵa.

⁷ Peŋka'po, pakukumbuluka iŋkalambe'vo iyalaŵile nakwe, aliŵetile aŵapyunjisi ŵakwe ŵaŵili nemusilikani utekenye uwapeŵumba lyaŵaŵo aŵalukumutinamina insiku syonse;

⁸ popele, pakuŵaŵulisisya fyonse, aliŵatumine kuJopa.

⁹ Ŋgamailo, ili ŵenda nekupalamina kumusi, Petilo alininine peulu pananda mukutembela, akasuŵa pakati keulu.

¹⁰ Naye aliumfwile insala, nekufwayo' kulya; sombi, ili ŵacansika, alilesucile;

¹¹ peŋka alibwene kwi ulu kwalekana, necintu cimbi cilukuseluka, koti ninsalu ikulu, ilukutulwa pansi mumikoŋko ine.

¹² Mukati kacico mwali imikoka yonse yanama isyenda kumolu ane, nefiloŋgolo fyapansi, nefyuni fyamwiulu.

¹³ Elyo lyaisile kuli ye isiwi ati: Ŵuka, Petilo, wipaye, ulye!

¹⁴ Sombi Petilo ati: Koku mweŵaSikulu, pakuti nsiŋgalyapo neli limo ifintu ifinaŋgwa ifiŵipile.

¹⁵ Nalyo lyaliisile kuli ye liŵili isiwi ati: Ifyo ifi ŵaswesya ŵaLesa, tekufieŵa weŵo ati finaŋgwa.

¹⁶ Kaŵili ifyo fyalicitilwe litatu; popele icintu ico calipokelwe bwaŋgu kwiulu.

¹⁷ Lomba, pakulukukaŋkamana Petilo mumutima wakwe, ati mbokuŵoneka uku naŵona kwasyani; kusaŋga aŵantu aŵo aŵatuminwe kuli Konelyo, pakwipusyansyanya ifyananda yakwe Simoni, ŵaliimakene pamulyaŋgo,

¹⁸ nekwita nekwipusya ati: Kani Simoni uwilicilwe ati niPetilo, emo ekala muno?

¹⁹ Popele, ili acilaŋguluka Petilo ifyakuŵoneka uko, Umupasi walilaŵile kuli ye ati: Ŵona, aŵantu ŵatatu ŵalukukufwaya.

²⁰ Sombi ima, useluke, ulukuya naŵo, wikanaika, pakuti nineŵo naŵatuma!

²¹ Naye Petilo aliselucile kuŵantu aŵo, nekulaŵila ati: Ŵoneni, neŵo enewoyo uyu mulukufwaya: mbanindo mwaisila?

²² Naŵo ati: Konelyo, icilolo cafita umwanda, umuntu uluŋgeme, utonda ŵaLesa, uwampupo isiweme isyakumukoka waŵaJuda ŵonse, walicenjesiwe kuŋkalamba iswetelele ati atume aŵantu mukumwitileni kunanda yakwe, nekumfwa amasiwi kuli mweŵo.

²³ Fyopele'fyo aliŵenjisye, nekuwalaŋga umwakulala. Ŋgamailo aliimine nekuya naŵo; neŵakwaŵo ŵambi aŵakuJopa aliile naŵo.

²⁴ Ka ŵili ŋgamailo ŵaliinjile muKaisalia; naKonelyo naye kale awuŋgenye aŵakwaŵo nefiŵusa fyakwe, nekuŵapembelela.

²⁵ Peŋka, pakwinjila Petilo, Konelyo alimucinsisye, nekuwila pansi muceni cakwe, nekumucindika.

²⁶ Sombi Petilo alimwimicili, nekulaŵila ati: Ima; naneŵo ndi muntunsi!

²⁷ Lomba, ili acambala nakwe, aliinjile nekuŵona aŵantu aŵenji ŵaŵuŋgana;

²⁸ nekulaŵila kuli ŵo ati: Mweŵo mweŵene muliisi ati tafyelelwe umuJuda ukukumaŋkana neli kwinjila mumuntu wamukoka umbi; sombi ŵaLesa ŵalimbwenesye ati tekwelelwa neŵo ukwilika aŵantu ŵonse neli umo ati ŵalukoso neli ati ŵaŵipile.

²⁹ Pakuti pali fyefyo ndiisile uwakuwulo'kuleŋgulula, pakwitwa. Popele ndukwipusya ati: Nindo mwanjitile?

³⁰ Naye Konelyo ati: Syapita insiku sitatu, ukupendela kumpindi ino, ati nalukutembela muŋanda yanji, pampindi yakuteyama'kasuŵa; lomba kusaŋga nikumuntu uwafwite ifyakufwala ifisasamucile aliimakene pamenso anji,

³¹ nekulaŵila ati: Konelyo, ukutembela koŵe kwaumfwanika, nefyakupa fyoŵe fyalaŋgulukwa pamenso aŵaLesa.

³² Lomba utume aŵantu kujopa, mukumwita Simoni, uwilicilwe ati niPetilo; alukwikala muŋanda yakwe Simoni umunyu cisi, pambali yacisiŵa.

³³ Pakuti pali fyefyo kampulilila ukutuma aŵantu kuli mweŵo; lomba mwacita bwino, pakuti mwaisa. Fwense lomba tuli pano pamenso a ŵaLesa, mukumfwa fyonse'fyo ifi ŵamuŵulileni ŵaSikulu.

³⁴ Telyo Petilo aŋgaasuka, nekulaŵila ati: Icinenene naŵona ati ŵaLesa taŵali nemusalululo paŵantu;

³⁵ sombi mumikoka yaŵantu yonse, uyo ulukuŵatonda, nekulukucite'filuŋgeme, nimpokelo kuli ŵo.

³⁶ Isiwi ilyo ili ŵatumine kuŵaIsilaeli, ilyakutulisya leeŵo leiweme icaŵutende icakuli ŵaYesu Klistu (aŵo eŵaSikulu ŵafintu fyonse),

³⁷ isiwi ilyo mweŵo mweŵene muliliisi, ilyatulicile monse mucalo caŵena-Juda, ukutatika kuGalili, ili atulisisye Yoane ukuŵatisya kwakwe;

³⁸ ifyaŵaYesu ŵakuNasaleti, ati ŵaLesa ŵaliŵasufisye neMupasi Uswetelele nemakosa; aŵalukupitana ili ŵacite'fiweme, nekulukuŵusya ŵonse aŵakululucile kumusensesi, pakuti ŵaLesa ŵali naŵo.

³⁹ Nafweŵo tuli nimboni syafintu fyonse ifi ŵacitile mucalo caŵaJuda namuJelusalemi; aŵo aŵa ŵaipeye kaŵili, ili ŵaŵatalicile pamuti.

⁴⁰ Aŵo ŵaLesa eŵaŵaŵusisye pansiku sitatu, nekusumina ati ŵaŵoneke,

⁴¹ tekuŵantu ŵonse, sombi kumboni isyo isyasalulwilwe akale kuli ŵaLesa, ekuli fweŵo, fwetwalile nekunwa naŵo, pakuŵuka ŵo paŵafwile.

⁴² Popele ŵalitufundile ati tutulisye kuŵantu, nekusimika ati aŵa eŵaŵo aŵasalulwilwe kuli ŵaLesa ukwikala ŵakusololwela-mo aŵalaŵi neŵafwile.

⁴³ Aŵo aŵakusimika ŵonse ŵalisimicile ati mwisina lyaŵo aŵantu ŵonse ulukupema-mo muli ŵo akapoka ukulekelela kwakuŵifya.

⁴⁴ Lomba, ili acilaŵila amasiwi ayo Petilo, Umupasi Uswetelele waliponene pali ŵaŵo ŵonse aŵaumfwile lsiwi.

⁴⁵ Naŵaŵo aŵakopwelwe aŵalukucetekela, ŵonse aŵaisile nakwe Petilo, ŵalikaŋkamene, pakuti impese yaMupasi Uswetelele yaliitilwe napaŵenafyalo.

⁴⁶ Pakuti ŵaliŵomfwile ŵalukulaŵila nemini, nekulukulemya ŵaLesa. Kumfwa Petilo kaasuka ati:

⁴⁷ Kani kuli uwakukanya amenda ati aŵa tekuŵatisiwa, aŵapokele Umupasi Uswetelele pamo nafweŵo?

⁴⁸ Naye aliŵaŵulile ati ŵaŵatisiwe mwisina lyaŵaYesu Klistu. Popele apo ŵalimukombetele ati ekale nasimbi insiku.