Esiceli 48 - Amashiwi Aba Lesa

¹ Amasina afikoto niaya: Ukufuma ukupelele kunofu, muceni cansila yakuYetiloni, ukufika nakukwinjilila kwakuAmati, kuKasali-enani, kumupaka wakuDamasiko, nekuya kunofu muceni caAmati; kukaficilila kuciŵafu cakumutulesuŵa nakuciŵafu cakumbonsi; nikuli Dani, icakwaŵa cimo.

² Peŋka kumupaka wakuDani, ukufuma kuciŵafu cakumutulesuŵa ukufika kuciŵafu cakumbonsi, nikuli Asyali, icakwaŵa cimo.

³ Peŋka kumupaka wakuAsyali, ukufuma kuciŵafu cakumutulesuŵa ukufika kuciŵafu cakumbonsi, nikuli Nafitali, icakwaŵa cimo.

⁴ Peŋka kumupaka wakuNafitali, ukufuma kuciŵafu cakumutulesuŵa ukufika kuciŵafu cakumbonsi, nikuli Manase, icakwaŵa cimo.

⁵ Peŋka kumupaka wakuManase, ukufuma kuciŵafu cakumutulesuwa ukufika kuciŵafu cakumbonsi, nikuli Efilayimi, icakwaŵa cimo.

⁶ Peŋka kumupaka wakuEfilayimi, ukufuma kuciŵafu cakumutulesuŵa ukufika kuciŵafu cakumbonsi, nikuli Lubeni, icakwaŵa cimo.

⁷ Peŋka kumupaka wakuLubeni, ukufuma kuciŵafu cakumutulesuŵa ukufika kuciŵafu cakumbonsi, nikuli Juda, icakwaŵa cimo.

⁸ Popele apo kumupaka wakuJuda, ukufuma kuciŵafu cakumutulesuŵa ukufika kuciŵafu cakumbonsi, kukalukuli-po umulambu uyo mukaposa; ubwipi bwakuko ŵukakumana amatete amasausande amakumi aŵili naasanu, neŵutali ubwakupalana nebwafyakwaŵa fimbi, ukufuma kuciŵafu cakumutulesuŵa ukufika kuciŵafu cakumbonsi; lomba umulenda uswetelele ukalukuli pakati pali wo.

⁹ Umulambu uyo mukaŵaposela ŵaYawe ukakumana uŵutali bwamatete amasausande amakumi aŵili naasanu, nebwipi bwamasausande ikumi.

¹⁰ Lomba kuli ŵaŵa, ekuŵapapatilisi, kukalukuli umulambu uswetelele; umusinso wakunofu uwakukumana amasausande amakumi aŵili naasanu, newakumbonsi ubwipi bwamasausande ikumi, newakumutulesuŵa ubwipi bwamasausande ikumi, newakusaufu uŵutali bwamasausande amakumi aŵili naasanu; lomba umulenda waŵaYawe uswetelele ukalukuli pakati lukoso pali ko'ko.

¹¹ Ukalukuli wakuŵapapatilisi aŵaswesesiwe aŵapaŵana ŵakwe Sadoko, aŵalamine ukufunda kwanji, aŵataŵapasucile pakupasuka aŵana ŵakwe Isilaeli, koti nifyefyo ifi ŵapasucile aŵena-Lefai.

¹² Lomba pakaŵaŵela mulambu uwapamulambu wacalo, icintu iciswetelele lukoso swete, mumupaka wakuŵena-Lefai.

¹³ Kaŵili apasiŋkamene nemupaka waŵapapatilisi, aŵena-Lefai ŵakalukuli neŵutali bwamasausande amakumi aŵili naasanu, nebwipi bwamasausande ikumi; uŵutali wonse ŵukakumana amasausande amakumi aŵili naasanu, nebwipi naŵo masausande ikumi.

¹⁴ Lomba tekuti ŵakaculisye neli kucisitula; kaŵili ifyamutulu ifyakucalo tekuti fisekalwe koku; pakuti ciswetelele kuli ŵaYawe.

¹⁵ Popele ayo-masausande asanu asyele-po pabwipi, pamenso amasausande ayo amakumi aŵili naasanu, akalukuli amilimo yaŵantu lukoso, akumusi, akwikala-mo neamitala; lomba umusi ukalukuli pakati lukoso pali ko'ko.

¹⁶ Ifyakwesya fyakuko nififi: kunofu masausande ane nemyanda isanu; nakusaufu masausande ane nemyanda isanu; nakuciŵafu cakumutulesuŵa masausande ane nemyanda isanu; nakuciŵafu cakumbonsi masausande ane nemyanda isanu.

¹⁷ Kaŵili umusi ukalukuli nemitala: kunofu kukakumana amatete imyanda iŵili nemakumi asanu, nakusaufu myanda iŵili nemakumi asanu, nakumutulesuŵa myanda iŵili nemakumi asanu, nakumbonsi nako myanda iŵili nemakumi asanu.

¹⁸ Popele ifyakusyala-po paŵutali, apasiŋkamene nemulambu uswetelele, fikakumana amasausande ikumi kumutulesuŵa nemasausande ikumi kumbonsi; ifyo fikasiŋkamana lukoso nemulambu uswetelele. Lomba ifyakubwena-po pali fyefyo fikalukuli fyakulya fyaŵaŵo aŵalukucite'milimo mumusi.

¹⁹ Lomba aŵakucite'milimo mumusi, aŵapafikoto fyonse fyaŵaIsilaeli, ŵo eŵakafilima.

²⁰ Umulambu wonse ukakumana uŵutali bwamasausande amakumi aŵili naasanu nebwipi bwamasausande amakumi aŵili naasanu. Mukapose umulambu uswetelele ati ulole pane, pamo necaŵuŵoni icakumusi.

²¹ Popele ifyakusyala-po fikalukuli fyacileme, pambali syoŵilo isyamulambu uswetelele nesyacaŵuŵoni icakumusi, pamenso amasausande amakumi aŵili naasanu amulambu kumpaka wakumutulesuŵa, nakumbonsi pamenso amasausande amakumi aŵili naasanu kumupaka wakumbonsi, apasiŋkamene nefyakwaŵa; ifyo fikalukuli fyacileme; kaŵili umulambu uswetelele nemulenda uswetelele uwakunanda fikalukuli pakati apo.

²² Kaŵili ukufuma kucaŵuŵoni caŵena-Lefai, nekufuma kucaŵuŵoni cakumusi, mukati muli ceco icakucileme, pakati pamupaka wakuJuda nemupaka wakuBenjamini, pakalukuli pacileme.

²³ Popele ifyakufikoto ifyakusyalapo; ukufuma kuciŵafu cakumutulesuŵa ukufika kuciŵafu cakumbonsi, nikuli Benjamini, icakwaŵa cimo.

²⁴ Peŋka kumupaka wakuBenjamini, ukufuma kuciŵafu cakumutulesuŵa ukufika kuciŵafu cakumbonsi, nikuli Simyoni, icakwaŵa cimo.

²⁵ Peŋka kumupaka wakuSimyoni, ukufuma kuciŵafu cakumutulesuŵa ukufika kuciŵafu cakumbonsi, nikuli Isaka, icakwaŵa cimo.

²⁶ Peŋka kumupaka wakulsaka, ukufuma kuciŵafu cakumutulesuŵa ukufika kuciŵafu cakumbonsi, nikuli Sebuluni, icakwaŵa cimo.

²⁷ Peŋka kumupaka wakuSebuluni, ukufuma kuciŵafu cakumutulesuŵa ukufika kuciŵafu cakumbonsi, nikuli Gadi, icakwaŵa cimo.

²⁸ Peŋka kumupaka wakuGadi, kusaufu nekuya-ko'ko, umupaka ukafuma nakuTama ukufika kumenda akuMelibati-kadesi, kukanika akalukuya kucisiŵa icikulu.

²⁹ Ico ecalo ici mukafyaŵila ifikoto fyaŵaIsilaeli kufipa ati ŵupyani; kaŵili ifyo efyakwaŵa fyakuko cimo cimo, efilukulaŵila ŵaSikulu Yawe.

³⁰ Kaŵili imifumino yakumusi niyiyi: kunofu matete amasausande ane nemyanda isanu pakwesya;

³¹ lomba imilyaŋgo yakumusi ikelikwa koti masina afikoto fyaŵaIsilaeli; imilyaŋgo itatu kunofu: umulyaŋgo wakwe Lubeni, umo; nemulyaŋgo wakwe Juda, umo; nemulyaŋgo wakwe Lefai, umo.

³² Kaŵili kuciŵafu cakumutulesuŵa matete amasausande ane nemyanda isanu; nemilyaŋgo itatu: umulyaŋgo wakwe Josefi, umo; nemulyaŋgo wakwe Benjamini, umo; nemulyaŋgo wakwe Dani, umo.

³³ Kaŵili kusaufu matete amasausande ane nemyanda isanu pakwesya; nemilyaŋgo itatu: umulyaŋgo wakwe Simyoni, umo; nemulyaŋgo wakwe Isaka, umo; nemulyaŋgo wakwe Sebuluni, umo.

³⁴ Kaŵili kuciŵafu cakumbonsi matete amasausande ane nemyanda isanu, pamo nemilyaŋgo yakuko yotatu: umulyaŋgo wakwe Gadi, umo; nemulyaŋgo wakwe Asyali, umo; nemulyaŋgo wakwe Nafitali, umo.

³⁵ Apasiŋgulucile pakakumana amatete amasausande ikumi naasanu naatatu. Lomba, ukufuma kukasuŵa ako, isina lyamusi likelikwa ati ŴaYawe epo ŵali.