2Samweli 9 - Amashiwi Aba Lesa

¹ Peŋka Dafidi ati, Kani pacisyala umbi uwapananda yakwe Saulu, ati mucitile iŋkumbu pakuti pali Jonafani?

² Lomba pananda yakwe Saulu pali nemupyunjisi, isina lyakwe niSiba, naŵo kaŵamwita ati ese kuli Dafidi; nayo imfumu yalilaŵile kuli ye ati, Weŵo niweSiba? Naye ati, Nemupyunjisi wenu ninewoyo!

³ Nayo imfumu ati, Kansi tapasyele umbi uwapananda yakwe Saulu ati mucitile iŋkumbu syaŵaLesa? Kumfwa Siba walaŵila kumfumu ati, Jonafani acili nemwana umwalalume ukonokele amakasa.

⁴ Nayo imfumu yalilaŵile kuli ye ati, Ali kulipi? Naye Siba walilaŵile kumfumu ati, Woneni, ali muŋanda yakwe Macili umwana wakwe Amiyeli kuLodebala.

⁵ Peŋka imfumu Dafidi yalitumine nekumuleta ukumufumya muŋanda yakwe Macili umwana wakwe Amiyeli kuLodebala.

⁶ Lomba Mepibosyeti, umwana wakwe Jonafani, umwana wakwe Saulu, waliisile kuli Dafidi, nekwifunama nekucindika. Kumfwa Dafidi ati, Mepibosyeti. Naye nekwasuka ati, Ŵoneni, ninemuntu wenu!

⁷ Naye Dafidi walilaŵile kuli ye ati, Witina, pakuti icine ŋkakubwenesye'ŋkumbu pakuti pali ŵaJonafani ŵawiso, kaŵili ŋkakubwesesya conse icalo caŵaSaulu ŵawiso; lomba ukalukulya insiku syonse kwi tebulu lyanji.

⁸ Naye kaacindika kaalaŵila ati, Mbanemuntu wenu ninenani ati mweŵo mulukundolesya nembwa ifwile lukoso?

⁹ Peŋka imfumu yalimwitile Siba, umuntu wakwe Saulu, nekulaŵila kuli ye ati, Fyonse ifyakwe Saulu nefyakunanda yakwe yonse namupela umwana waŵawisokulu.

¹⁰ Peŋka ukamulimine icalo weŵo neŵana ŵoŵe aŵalalume newantu ŵoŵe; kaŵili ukaloŋgele-mo ati umwana waŵawisokulu akaŵe nefyakulya; sombi Mepibosyeti, umwana waŵawisokulu akalukulya insiku syonse kwitebulu lyanji. Lomba Siba wali neŵana aŵalalume ikumi naŵasanu pamo neŵapyunjisi amakumi aŵili.

¹¹ Peŋka Siba walilaŵile kumfumu ati, Koti nifyefyo fyonse ifi ŵamuŵula ŵasikulu ŵanji imfumu, fyopele'fyo akacita umuntu wenu. Nayo imfumu ati, Sombi Mepibosyeti akalukulya kwitebulu lyanji, koti wapaŵana ŵamfumu.

¹² Lomba Mepibosyeti wali nemwana umwalalume umwanice, isina lyakwe niMica. Lomba ŵonse aŵalukwikala muŋanda yakwe Siba ŵali ŵapyunjisi ŵakwe Mepibosyeti.

¹³ Fyopele'fyo Mepibosyeti waliikele kuJelusalemi: pakuti walukulya insiku syonse kwitebulu lyamfumu; kaŵili walikonokele kumakasa akwe oŵilo.