2Samweli 8 - Amashiwi Aba Lesa

¹ Panuma pali fyefyo lomba Dafidi waliŵapamine aŵaFilisiti nekuŵakomeka: naye Dafidi nekupokolola Metegama muminwe yaŵaFilisiti.

² Kaŵili alipamine aŵaMoabi, nekuŵapima kumwando, ili aŵalalika pansi; alipimine imyando iŵili yaŵantu aŵakwipaiwa, nemwando uŵuluŵulu waŵantu aŵakwikala nemweo. Peŋka aŵaMoabi ŵaliŵele ŵapyunjisi ŵakwe Dafidi nekuleta imilambu.

³ Kaŵili Dafidi walimupamine Kadadeseli umwana wakwe Likobo, imfumu yakuSoba, ili alukuya mukulibwesesyo' ŵufumu bwakwe kunika yaYufilate.

⁴ Peŋka Dafidi walitapile kuli ye aŵantu aŵapali ŵakafwalo imyanda ikumi naisanu naiŵili neŵakulwila pansi amasausande amakumi aŵili; naye Dafidi walipinicile imisipa yaŵakafwalo awakuŋgolofwana ŵonse, sombi waliŵicile awakuŋgolofwana umwanda umo.

⁵ Lomba pakwisa aŵaSilya aŵakuDamasiko mukumofwa-ko Kadadeseli imfumu yakuSoba, Dafidi waliŵepeye aŵaSilya aŵantu amasausande amakumi aŵili nemasausande aŵili.

⁶ Peŋka Dafidi walitumine ifita ifyakwikalilila muSilya uwakuDamasiko: naŵo aŵaSilya ŵaliŵele ŵapyunjisi ŵakwe Dafidi nekuleta imilambu. Lomba ŵaYawe ŵalimupele Dafidi ukucila muŋkondo konse uko walukuya.

⁷ Peŋka Dafidi walipokele iŋgaŵo syegolide isyali kuŵapyunjisi ŵakwe Kadadeseli, nekusileta kuJelusalemi.

⁸ Kaŵili imfumu Dafidi yalipokolwele uluŵemba ulwinji ukwakuti muBetaci namuBelotayi, imisi yakwe Kadadeseli.

⁹ Peŋka pakumfwa Toyi imfumu yakuAmati ati Dafidi walipama iŵumba lyonse ilyakwe Kadadeseli,

¹⁰ lomba Toyi walimutumine Jolami umwana wakwe kumfumu Dafidi, mukwisekelela nekwisyucisya, pakuti yalilwile nakwe Kadadeseli nekumupama: pakuti kansi Kadadeseli wali neŋkondo isyakulwa nakwe Toyi. Lomba Jolami waliisile nefiŋkoloŋkolo ifyesilifa nefyegolide nefyaluŵemba;

¹¹ ifyo nafyo imfumu Dafidi yalifiposele kuli ŵaYawe pamo nesilifa negolide ilyo aposele ilyafumine kumikoka yaŵantu yonse'yo akomekele;

¹² ilyakuSilya nakuMoabi, nakuŵana ŵakwe Amono, nakuŵaFilisiti, nakuAmaleci, nefyakutapa kuli Kadadeseli, umwana wakwe Likobo, imfumu yakuSoba.

¹³ Peŋka Dafidi walilicitile isina, ili abwelele pakuŵapama aŵaSilya mumukolo wamucele, eŵalalume amasausande ikumi naasanu naatatu.

¹⁴ Naye walitumine ifita ifyakwikalilila muEdomi; monse muEdomi walifiikalicile ifita, peŋka aŵaEdomi ŵonse ŵaliŵele ŵapyunjisi ŵakwe Dafidi. Lomba ŵaYawe ŵalimupele Dafidi ukucila muŋkondo konse uko walukuya.

¹⁵ Lomba Dafidi waliŵekalicile aŵaIsilaeli ŵonse; naye Dafidi nekuŵacitila ukusololola nefyakuluŋgama aŵantu ŵakwe ŵonse.

¹⁶ Kaŵili Yoabi umwana wakwe Syeluya walukwikalika iŵumba lyafita; naye Josafati umwana wakwe Aciludi wali mwanusi:

¹⁷ kaŵili Sadoko umwana wakwe Acitubi naAcimeleci umwana wakwe Abayata ŵo ŵali ŵapapatilisi; naye Selaya wali mulembesi;

¹⁸ naye Benaya umwana wakwe Yeoyada walukwikalika aŵaCeleti neŵaPeleti; neŵana ŵakwe Dafidi aŵalalume ŵali ŵapapatilisi.