2Samweli 7 - Amashiwi Aba Lesa

¹ Popele apo, pakulukwikala imfumu muŋanda yaiyo, ili ŵaYawe ŵaipele ukutusya pakati patupondo twaiyo tonse,

² lomba imfumu yalilaŵile kuli Natani uwakusimika, ati, Ŵoneni pano, neŵo ndukwikala muŋanda yayelesi, sombi ibokosi lyaŵaYawe lilukwikala mufipembe fyansalu lukoso.

³ Naye Natani nekulaŵila kumfumu ati, Kamuya, mucite fyonse ifili mumutima wenu; pakuti ŵaYawe ŵali nenu.

⁴ Lomba uŵusiku uŵo ŵopele isiwi lyaŵaYawe lyaliisile kuli Natani ati,

⁵ Koya umuŵule umuntu wanji Dafidi ati, ŴaYawe ŵalaŵile'fi ati, Kani ukanjiŵacile iŋanda yakwikala-mo neŵo?

⁶ pakuti nsiikele muŋanda ukufuma kukasuŵa ako naŵafumisye aŵaIsilaeli kuIjipiti, ukufika nakukasuŵa kalelo, sombi kandukwenda mwisema namumutanda.

⁷ Monse umo nalukwenda pamo neŵaIsilaeli, kani nalilaŵile neli lisiwi limo kufikoto fyaŵaIsilaeli neli cimo, ifyo ifi naŵulile ati ŵapeleni ukulya aŵantu ŵanji aŵaIsilaeli, ati, Mbanindo tamunjiŵacile iŋanda yayelesi?

⁸ Pakuti pali fyefyo wakulaŵile'fi kumuntu wanji Dafidi ati, ŴaYawe ŵamaŵumba ati, Nalikufumisye kucimpata cambelele uko walukusilonde'mbelele, ati uŵe niwemfumu yapaŵantu ŵanji, paŵaIsilaeli:

⁹ kaŵili kandukuli naweŵo konse uko walukuya, kantupinika utupondo toŵe tonse pamenso oŵe; kaŵili kaŋkucitila isina ilikulu, koti lisina lyaŵantu aŵakulu makosa aŵapacalo capansi.

¹⁰ Nakaŵili kanandicila pantu apakwikala aŵantu ŵanji aŵaIsilaeli, lomba ŋkaŵekalika ati ŋgaŵekale pantu paŵo aŵene, ŵekesa kutesiwa liŵili; kaŵili aŵana ŵaŵumbifi tekuti ŵakaŵapensye liŵili koti nipakutaŋga,

¹¹ koti nikukasuŵa ako naŵekalicile aŵasololwesi ŵapaŵantu ŵanji aŵaIsilaeli; lomba ŋkakuleŋgesya ukutusya kutupondo toŵe tonse. Kaŵili ŵaYawe ŵalukukuŵula ati ŵaYawe ŵalukukucitila iŋanda.

¹² Pakukumana insiku syoŵe, ili ukalala pamo naŵawisinwe, eli ŋkamwimika umwana woŵe panuma poŵe ukafuma munda moŵe, ŋkamwiwacila uŵufumu.

¹³ Niye ukaliiŵacila isina lyanji iŋanda; lomba ŋkeŵacilila iteŵe lyaŵufumu bwakwe.

¹⁴ Ŋkalukuli nineŵawisi, naye akalukuli mwana wanji. Kani akacite ifyakuŵifya, ŋkamupama kukasako kaŵantu nakufipumofyaŵana ŵaŵantu;

¹⁵ sombi iŋkumbu syanji tesi sikafume kuli ye, koti nifyefyo ifi nasifumisye kuli Saulu, uyo unatamfisye pamenso oŵe.

¹⁶ Lomba iŋanda yoŵe neŵufumu ŵoŵe fikakosiwa insiku syonse lukoso pamenso oŵe; kaŵili iteŵe lyoŵe likekalikwa insiku syonse pee.

¹⁷ Lomba Natani walilaŵile kuli Dafidi koti masiwi ayo onse nakoti kuŵona uko konse.

¹⁸ Peŋka Dafidi imfumu waliinjile nekwikala pamenso aŵaYawe, nekulaŵila ati, Mbaneŵo ninenani, mweŵaSikulu Yawe; iŋanda yanji nindo, ati mwamfisya nakukuno konse?

¹⁹ Naŋgaŵe'fyo ico cinini pamenso enu, mweŵaSikulu Yawe; sombi mwalaŵila nefyananda yamuntu wenu ili icili kutali; kansi aya mekalilo aŵantu, mweŵaSiktilu Yawe.

²⁰ Mbafindo fimbi aŋgalawila Dafidi kuli mweŵo? pakuti mulimwisiŵile umuntu wenu, mweŵaSikulu Yawe.

²¹ Pakuti pesiwi lyenu nakoti mutima wenu mweŵene, mwacito' ŵukulu uŵu ŵonse, mukumwisiwisya umuntu wenu.

²² Pakuti pali fyefyo muli ŵakulu, mweŵaYawe Lesa: pakuti tapali-po upalene namweŵo, kaŵili tapali-po naumbi Lesa apakuŵula mweŵo, koti nifyefyo fyonse ifyo twaumfwile nakumatwi esu.

²³ Kaŵili mbawisamukoka uwa pacalo capansi upalene neŵantu ŵenu, upalene neŵaIsilaeli aŵo ŵaLesa ŵaile mukulilubwila ati ŵantu ŵaŵo, nekulicitila isina, nekumucitileni ifintu ifikulu, nekucicitila icalo cenu ifintu ifyakutinisya, pamenso aŵantu ŵenu, aŵo mwalilubwilile kucalo caIjipiti, kuŵenafyalo nakuli ŵalesa ŵaŵo?

²⁴ Kaŵili mwaliliiŵacilile aŵantu ŵenu aŵaIsilaeli ati ŵaŵelelele ŵantu ŵenu; kaŵili mweŵaYawe mwaliŵele nimweŵaLesa ŵaŵo.

²⁵ Lomba pano, mweŵaYawe Lesa, isiwi ilyo mwalaŵila ilyakumuntu wenu nakunanda yakwe, ŋgamulikosye ati liikalilile pee, mucite koti kulaŵila kwenu.

²⁶ Kaŵili isina lyenu ŋgalikulilile lukoso, ati, ŵaYawe ŵamaŵumba niŵaLesa ŵapaŵaIsilaeli; kaŵili iŋanda yamuntu wenu Dafidi ikekalikwa pamenso enu.

²⁷ Pakuti mweŵo, mweŵaYawe ŵamaŵumba, Lesa waŵaIsilaeli, mwamufisulwila umuntu wenu ati, Ŋkakwiŵacila iŋanda: pakuti pali fyefyo umuntu wenu wafwaya mumutima wakwe ukumutembeleleni ifyo.

²⁸ Lomba pano mweŵaSikulu Yawe muli nimweŵaLesa, amasiwi enu niŵucine, kaŵili mwalayana nemuntu wenu ici iciweme:

²⁹ pakuti pali fyefyo lomba ŋgamusumine ukusyucisya iŋanda yamuntu wenu ati iikalilile pamenso enu; pakuti mweŵo, mweŵaSikulu Yawe mwafilaŵila; kaŵili iŋanda yamuntu wenu ŋgaisyucilile kwisyuko lyenu.