2Samweli 6 - Amashiwi Aba Lesa

¹ Popele apo Dafidi waliwuŋgenye liŵili aŵalalume ŵaŵaIsilaeli ŵonse aŵasalulwilwe amasausande amakumi atatu.

² Lomba Dafidi waliimine nekuya pamo neŵantu ŵonse aŵo wali naŵo ukufuma kuBayale-Juda mukuninika ibokosi lyaŵaLesa, iliilicilwe kwiSina, ekwisina lyaŵaYawe ŵamaŵumba aŵekala peulu pali ŵakelubi.

³ Naŵo ŵaliliikalicile ibokosi lyaŵaLesa paŋgolofwana yaŵukumo, nekulifumya muŋanda yakwe Abinadabi iyali kulupili: lomba Usa naAciyo, aŵana ŵakwe Abinadabi aŵalalume ŵalukwensya iŋgolofwana.

⁴ Naŵo ŵaliifumisye muŋanda yakwe Abinadabi iyali kulupili, pamo nebokosi lyaŵaLesa: naye Aciyo walukulitanjilila ibokosi.

⁵ Peŋka Dafidi pamo nenanda yakwe Isilaeli yonse ŵalilisisye pamenso aŵaYawe ifyafiti fyamuŵelosi, nemesela, netuŋkoto, netuwoma, nempeŋga, nemiseŵe.

⁶ Sombi ili ŵaficile kuciŵansa cakwe Nakoni, Usa walitambicile ukuŵoko kwakwe kwibokosi lyaŵaLesa nekuliikata-ko, pakuti inembe syalilitutwile.

⁷ Peŋka uŵukali bwaŵaYawe bwalimuŵucile Usa, naŵo ŵaLesa ŵalimupamine apo pakuti pakuŵifya kwakwe; naye kaafwila-po apo paceni cebokosi lyaŵaLesa.

⁸ Sombi Dafidi walileŋgulwile mumutima, pakuti ŵaYawe ŵalipulumucile pali Usa; naye nekupelika apo ati nipaPelesi-usa ukufika nakukasuŵa kalelo.

⁹ Kaŵili Dafidi waliŵatinine ŵaYawe akasuŵa ako, nekulaŵila ati, Ibokosi lyaŵaYawe lifike syani kuli neŵo?

¹⁰ Fyopele'fyo Dafidi walikene ukufumya ibokosi lyaŵaYawe mukulileta kuli ye umwine kumusi wakwe Dafidi; sombi Dafidi walilipasusisye mukuliinjisya muŋanda yakwe Obededomi umuGiti.

¹¹ Lomba ibokosi lyaŵaYawe lyaliikele muŋanda yakwe Obededomi umuGiti imyensi itatu; naŵo ŵaYawe nekumusyucisya Obededomi neŵamuŋanda yakwe ŵonse.

¹² Popele ŵalimuŵulile Dafidi ati, ŵaYawe ŵasyucisya iŋanda yakwe Obededomi nefyakwe fyonse, pakuti pebokosi lyaŵaLesa. Naye Dafidi eli aŋgaya aŋganinika ibokosi lyaŵaLesa, ukulifumya muŋanda yakwe Obededomi, ukuliinjisya nekusemba mumusi wakwe Dafidi.

¹³ Peŋka paliŵele ati pakwenda ukutanuka kusanu nakumo aŵapintile ibokosi lyaŵaYawe, lomba Dafidi waliipeye umulambu waŋombe newasinonene.

¹⁴ Kaŵili Dafidi walukusyana pamenso aŵaYawe nemakosa akwe onse; lomba Dafidi walifwite efodi wansalu.

¹⁵ Fyopele'fyo Dafidi nenanda yakwe Isilaeli yonse ŵalininicile ibokosi lyaŵaYawe neŋgwele nekulisya kwalupeŋga.

¹⁶ Lomba paliŵele ati, pakulukwinjila mumusi wakwe Dafidi ibokosi lyaŵaYawe, lomba Mikali, umwana wakwe Saulu umwanakasi, waliceŵele pakambeluko, nekwiŵona imfumu Dafidi ilukusotoka nekulukusyana pamenso aŵaYawe; naye waliipufisye mumutima wakwe.

¹⁷ Lomba ŵaliliinjisye ibokosi lyaŵaYawe, nekuliikalika pantu paliko, mukati mwisema ilyo aliiŵacile Dafidi: naye Dafidi waliposele imilambu iyakoca neyaŵutende pamenso aŵaYawe.

¹⁸ Peŋka Dafidi, ili asilile ukuposa umulambu wakoca nemilambu yaŵutende, aliŵasyucisye aŵantu mwisina lyaŵaYawe ŵamaŵumba.

¹⁹ Naye aliaŵenye kuŵantu ŵonse, kwiŵumba lyonse lyaŵaIsilaeli, nakuŵalalume nakuŵanakasi, kuli ŵo ŵonse umo umo, icimpwampwa casiŋkwa, nemunefu, neŋkomeci yamfaina. Fyopele'fyo kaŵakumbuluka ŵonse ŵonse kumananda aŵo.

²⁰ Peŋka Dafidi kaabwela mukuŵasyucisya awamuŋanda yakwe. Lomba Mikali, umwana wakwe Saulu umwanakasi, walifumine mukumucinsya Dafidi, nekulaŵila ati, Ele, mboŵuleme bwamfumu yaŵaIsilaeli lelo, iyali yafula lelo pamenso aŵasyakasi ŵaŵantu ŵaiyo, koti nifyefyo ifi afula lukoso umuŋgwa neciŋkaŋga!

²¹ Peŋka Dafidi kaalaŵila kuli Mikali ati, Nipamenso aŵaYawe aŵansalulwile neŵo ukucila napali ŵawiso napananda yaŵo yonse mukunjikalika ninemfumu yapaŵantu ŵaŵaYawe, paŵaIsilaeli: pakuti pali fyefyo nakulukupukutila pamenso aŵaYawe.

²² Kaŵili ŋkacilo'kuŵipa napali fyefyo, nekulipufya napamenso anji nemwine: sombi ifyaŵasyakasi aŵo walukweŵa, ŋkalukujemiwa kuli ŵo.

²³ Lomba Mikali, umwana wakwe Saulu umwanakasi, taafyele neli mwana ukufika nakukasuŵa kakufwa kwakwe.