2Samweli 5 - Amashiwi Aba Lesa

¹ Peŋka paliisile kuli Dafidi kuEbiloni ifikoto fyonse fyaŵaIsilaeli, nekulaŵila ati, Woneni, fweŵo nifwemafupa enu, nifweminefu yenu.

² Pampindi isyapitile, ili ŵacili nimfumu yesu ŵaSaulu, nimweŵo emwalukuŵatanjilila aŵaIsilaeli ukuwafumya nekuŵenjisya: lomba ŵaYawe ŵalilaŵile kuli mweŵo ati, Ukaŵapela ifyakulya aŵantu ŵanji aŵaIsilaeli, kaŵili ukaŵa niwemfumu yaŵaIsilaeli.

³ Fyopele'fyo aŵakulu ŵaŵaIsilaeli ŵaliisile ŵonse kumfumu kuEbiloni; lomba imfumu Dafidi walilayene naŵo kuEbiloni pamenso aŵaYawe; naŵo ŵalimusufisye Dafidi ati nimfumu yaŵaIsilaeli.

⁴ Dafidi walikumene imyaka amakumi ata tu, ili ataticile ukuŵekalika aŵantu, naye aliŵekalicile imyaka amakumi ane.

⁵ Aliŵekalicile aŵena-Juda kuEbiloni imyaka isanu naiŵili nemyensi isanu naumo: kaŵili kujelusalemi aliŵekalicile aŵaIsilaeli neŵena-Juda imyaka amakumi atatu naitatu.

⁶ Lomba imfumu neŵantu ŵaiyo ŵaliile kujelusalemi mukulwa neŵaJebusi injikale isyamucalo, aŵalaŵile kuli Dafidi, ati, Kani mweŵo tekufumya impofu neŵalukusunta tesi mukaninine kuno; pakuti ŵalukweŵa ati Dafidi tesi ukwinjila muno.

⁷ Naŋgawa nifyefyo Dafidi walipokele umusi weliŋga waSayoni, emusi wakwe Dafidi.

⁸ Popele pakasuŵa ako Dafidi walilaŵile ati, Aŵantu ŵonse uwakuŵapama aŵaJebusi, ŋgaaninine kumukoŋkola wamenda, apame aŵalukusunta nempofu aŵakalipilwe kumutima wakwe Dafidi. Pakuti pali fyefyo ŵalalaŵila ati, Nsilya impofu neŵalukusunta; tesi enjile muŋanda.

⁹ Peŋka Dafidi waliikele mumusi weliŋga, nekuwilika musi wakwe Dafidi. Kaŵili Dafidi waliiŵeke ukulukusiŋguluka ukutatika kuMilo nekuya mukati.

¹⁰ Lomba Dafidi walikulile nekukula ukwakucila; pakuti ŵaYawe, Lesa wamaŵumba, ŵali nakwe.

¹¹ Peŋka Cilami, imfumu yakuTulo, walitumine iŋkalamba kuli Dafidi, pamo nemiti yaŵayelesi, naŵakalipentala, neŵaŵasisi ŵamabwe; naŵo kaŵamwiŵacila Dafidi iŋanda.

¹² Peŋka Dafidi waliisiŵile ati ŵaYawe ŵanjikalika ati nimfumu yapaŵaIsilaeli, nakaŵili ati ŵasuntula peulu uŵufumu bwanji pakuti paŵantu ŵaŵo aŵaIsilaeli.

¹³ Lomba Dafidi walipokele naŵambi aŵanakasi lukoso nekuupa naŵambi aŵakasi aŵakufuma kuJelusalemi, ili afumine kuEbiloni: lomba palifyelwe kuli Dafidi naŵambi aŵana aŵalalume newanakasi.

¹⁴ Lomba amasina aŵaŵo aŵafyelwe kuli ye kuJelusalemi niaya: Syamuwa, naSyobabi, naNatani, naSolomoni,

¹⁵ nalbakala, naElisyuwa, naNefeji, naYafiya,

¹⁶ naElisyama, naEliyada, naElifeleti.

¹⁷ Popele apo, aŵaFilisiti, ili ŵaumfwile ati ŵamusufya Dafidi ati nimfumu yaŵaIsilaeli, ŵonse ŵalininine mukumufwaya-fwaya Dafidi; naye Dafidi waliumfwile ifyafyefyo, nekuseluka ukulukuya ukukosele.

¹⁸ Lomba aŵaFilisiti kale ŵaisile nekuputa mumukolo waŵaLefa.

¹⁹ Peŋka Dafidi waliipwisye kuli ŵaYawe, ati, Kani ninine mukulwa neŵaFilisiti? Kani mwakumpela ŵo muminwe yanji? Naŵo ŵaYawe ŵalilaŵile kuli Dafidi ati, Nina, pakuti ŋkakupela icine aŵaFilisiti muminwe yoŵe.

²⁰ Naye Dafidi walificile kuBalapelasimi, naye Dafidi nekuŵapama apo; naye ati, ŴaYawe ŵatutoŵa utupondo twanji pamenso anji, koti kupulumuka kwamenda. Pakuti pali fyefyo walipelicile apo ati nipaBala-pelasimi.

²¹ Lomba aŵaFilisiti ŵalisile apo ifiŵumbwaŵumbwa fyaŵo, naye Dafidi neŵantu ŵakwe ŵalifitapile.

²² Lomba aŵaFilisiti ŵalininine naliŵili nekuputa mumukolo waŵaLefa.

²³ Peŋka pakwipusya Dafidi kuli ŵaYawe, ŵalilaŵile ati, Tekuti unine, kosiŋguluka ukulukuya kunuma yaŵo, nekuŵaŵucila apasiŋkamene nemiti yamabaka.

²⁴ Popele apo, pakumfwa umulukutu peulu pamabaka, eli wakupuwa: pakuti telyo ŵaŋgakutanjilila ŵaYawe mukulipama iŵumba lyaŵaFilisiti.

²⁵ Naye Dafidi walicitile fyopele'fyo, koti nifyefyo ifi ŵamuŵulile ŵaYawe; nekuŵapama aŵaFilisiti ukufuma kuGeba ukufika weŵo kuGesyeli.