2Samweli 4 - Amashiwi Aba Lesa

¹ Lomba lsibosyeti, umwana wakwe Saulu, ili aumfwile ati Abineli walifwilile kuEbiloni, amaŵoko akwe nekunaka, naŵo aŵaIsilaeli ŵonse nekukaŋkamuka.

² Lomba Isibosyeti wali neŵantu ŵaŵili ifilolo fyamaŵumba; isina lyakwe umbi niBayanaci, nesina lyamuŵyakwe niLekaŵi, aŵana ŵakwe Limoni umuBeyeloti uwapaŵena-Benjamini: (pakuti kuBeyeloti nako kulipendelwe pamo nakuBenjamini:

³ naŵo aŵaBeyeloti ŵaliŵutucile ukulukuya kuGitayimi, nekulukwikele uko nakukasuŵa kalelo).

⁴ Jonafani, umwana wakwe Saulu, wali nemwana umwalalume icilema pamakasa. Uyo walikumene imyaka isanu, pakufika ifyeŵo ifyakuli Saulu najonafani ukufuma kuYesileyeli, lomba umulelesi wakwe nekumuŵula nekuŵutuka; peŋka paliŵele ati ili aŵundumucile uluŵilo, umwana nekupona nekukonoka. Isina lyakwe niMepibosyeti.

⁵ Peŋka aŵana ŵakwe Limoni umuBeyeloti, Lekaŵi naBayanaci ŵaliile nekufika pakukaŵa akasuŵa kunanda yakwe Isibosyeti, ili alukutusya akasuŵa pakati.

⁶ Naŵo kaŵafiko'ko mukati muŋanda, koti ati ŵaya kuleta tiligu; kaŵamupama namunda; naŵo Lekaŵi naBayanaci umukwaŵo kaŵafyuka.

⁷ Lomba pakwinjila ŵo muŋanda, ili alele paŵulo mucipinda cakwe icakulala-mo, ŵalimupamine, nekumwipaya, nekumuteto'mutwi, nekoŋgoloka pansila iyakumpanta uŵusiku ŵonse.

⁸ Naŵo ŵalimuletele Dafidi umutwi wakwe lsibosyeti kuEbiloni, nekulaŵila kumfumu ati, Ŵoneni, ŋgu umutwi wakwe lsibosyeti, umwana wakwe Saulu akapondo kenu, uwalukwesya ukumwipayeni; lomba ŵaYawe ŵaŵafutila ŵasikulu ŵanji imfumu akasuŵa kano pakuti pali Saulu, napakuti paŵana ŵakwe.

⁹ Kumfwa Dafidi nekuŵaasucila Lekaŵi naBa ya naci umukwaŵo, aŵana ŵakwe Limoni umuBeyeloti, nekulaŵila kuli ŵo ati, Koti nifyefyo ifi ŵali nemweo ŵaYawe aŵalubwile umutima wanji kumapensyo onse,

¹⁰ pakumbula umbi ati, Woneni ŵaSaulu ŵalifwile, ukulukulaŋguluka ati ndukulete'fyeŵo ifiweme, kansi neŵo kamwikata, kamwipaya kuSikalaji, emalambulo namupele pakuti pafyeŵo fyakwe.

¹¹ Tefyakucilo'kwakuti, kani aŵantu ŵakuŵifya ŵamwipaya umuntu uluŋgeme muŋanda yakwe umwine napaŵulo bwakwe, ati mbule ukufwaila kuminwe yenu imilopa yakwe, nekumufumyeni napacalo capansi?

¹² Naye Dafidi nekuŵaŵula awasaŋkwa ŵakwe, naŵo kaŵaŵepaya, kaŵaŵateta nemaŵoko nemakasa, kaŵaŵapatika pambali yesiŵa kuEbiloni. Sombi ŵaliŵulile umutwi wakwe Isibosyeti, nekuusika namucilende cakwe Abineli kuEbiloni.