2Samweli 3 - Amashiwi Aba Lesa

¹ Apo lomba pali iŋkondo itali pakati pacikoto cakwe Saulu necikoto cakwe Dafidi; naye Dafidi walikulile nemakosa akucila, sombi icikoto cakwe Saulu caliŵele nekunaka ukwakucila.

² Peŋka kuli Dafidi kwalifyalilwe kuEbiloni aŵana aŵalalume. Umuŵele wakwe niAminoni muli Acinoyami umuYesileyeli;

³ uwaŵuŵaŵili niCilyaŵi muli Abigayili mukaNabali umuKameli; uwaŵuŵatatu niAbisalomi umwana wakwe Mayaka umwana umwanakasi uwakwe Talimai imfumu yakuGesyuli;

⁴ uwaŵuŵane niAdonija umwana wakwe Kajiti; uwaŵuŵasanu niSyefatiya umwana wakwe Abitali;

⁵ uwakukoŵeka-mo niYitileyamu muli Ejila mukaDafidi. Aŵo ŵonse ŵalifyalilwe kuli Dafidi kuEbiloni.

⁶ Lomba ili pali iŋkondo pakati pacikoto cakwe Saulu necikoto cakwe Dafidi, paliŵele ati Abineli walilikosesye mucikoto cakwe Saulu.

⁷ Lomba Saulu wali nemwanakasi, isina lyakwe niLisipa, umwana wakwe Aja: peŋka lsibosyeti kaalaŵila kuli Abineli ati, Mbanindo winjile mumwanakasi waŵatata?

⁸ Kumfwa Abineli kaakalipo'kwakuti pakuti pamasiwi akwe lsibosyeti, kaalaŵila ati, Kansi neŵo ninemutwi wambwa yakwe Juda? Akasuŵa kalelo ndukucicitile' ŋkumbu icikoto caŵaSaulu ŵawiso' neŵakwaŵo neŵaŵyaŵo; nsinakupele muminwe yakwe Dafidi; naŋgawa nifyefyo ulukumpatila neceŵo icakumwanakasi uyo.

⁹ ŴaLesa ŋgaŵaficite'fi kuli Abineli nafimbi peulu, kani neŵo tesi mficite kuli ye, koti nifyefyo ifi ŵalapile ŵaYawe kuli Dafidi;

¹⁰ ati ŵaŵutuntulule uŵufumu ukuŵufumya kucikoto cakwe Saulu, nekwikalika iteŵe lyakwe Dafidi paIsilaeli napaJuda, ukufuma kuDani ukufika nakuBeyasyeba.

¹¹ Naye lsibosyeti taaisiŵile ukumwasucila Abineli neli lisiwi limbi, pakuti walukumutina.

¹² Peŋka Abineli walilituminine iŋkalamba kuli Dafidi, ati, Mbecalo cakwe nani? Nakaŵili ati, Ŋgamulayane naneŵo, lomba ŵoneni, ukuŵoko kwanji kukalukuli nenu mukumubwesesyeni aŵaIsilaeli ŵonse.

¹³ Naye Dafidi ati, Ciweme, nakulayana naweŵo; sombi pali icintu cimo endukufwaya kuli weŵo, ati weŵo tekuti ukambone pamenso, lintu ili wataŋgo'kuleta Mikali umwana umwanakasi uwakwe Saulu, pakwisa weŵo mukumbona pamenso.

¹⁴ Lomba Dafidi walitumine iŋkalamba kuli lsibosyeti umwana wakwe Saulu ati, Mpeleni umukasi wanji Mikali, uyo nambisisye nemisuti yaŵaFilisiti umwanda.

¹⁵ Peŋka lsibosyeti walitumine aŵantu nekumupokolola kumulume wakwe ekuli Palatiyeli umwana wakwe Layisi.

¹⁶ Naye umulume wakwe waliile nakwe ili alila; nekumulonda kuBakulimi. Peŋka Abineli kaalaŵila kuli ye ati, Koya ubwele! Naye kaabwela.

¹⁷ Lomba Abineli nekwambala neŵakulu ŵaŵaIsilaeli, ati, Pampindi isyapitile mwalukumufwaya Dafidi ati aŵe nimfumu pali mweŵo:

¹⁸ pano lomba kamucita, pakuti ŵaYawe ŵalaŵila ifyakuli Dafidi ati, Kukuŵoko kwamuntu wanji Dafidi ŋkaŵapulusya aŵantu ŵanji aŵaIsilaeli muminwe yaŵaFilisiti namuminwe yatupondo twaŵo tonse.

¹⁹ Kaŵili Abineli walilaŵile namumatwi aŵena-Benjamini; naye Abineli waliile kaŵili mukulaŵila mumatwi akwe Dafidi kuEbiloni fyonse ifyaelelwe kuŵaIsilaeli nakucikoto cakwe Benjamini conse.

²⁰ Fyopele'fyo Abineli walificile kuli Dafidi kuEbiloni pamo neŵantu amakumi aŵili. Lomba Dafidi waliŵacitile icitenje Abineli neŵantu aŵo ali naŵo.

²¹ Kumfwa Abineli walaŵila kuli Dafidi ati, Ndukwima mukuya, ŋkaŵuŋganya aŵena-Isilaeli ŵonse kuli ŵasikulu ŵanji imfumu, ati ŋgaŵakalayane namweŵo, nakaŵili ati mukafiikalike fyonse'fyo ifi ulukufwayo'mutima wenu. Peŋka Dafidi walimutumine Abineli; naye kaya neŵutende.

²² Lomba kuŵona, aŵantu ŵakwe Dafidi neŵakwe Yoabi ŵalukubwela mukulwa, nekuleta nefyakutapa ifinji; sombi. Abineli taali-po naDafidi kuEbiloni; pakuti kale amutumine, waya neŵutende.

²³ Lomba pakufika Yoabi neŵumba lyonse ili ali nalyo, ŵalimuŵulile Yoabi ati, Abineli umwana wakwe Neli waliisile kumfumu, nayo yamutuma, waya neŵutende.

²⁴ Peŋka Yoabi waliisile kumfumu ati, Mbamwacite'ndo? Ŵoneni, Abineli waliisile kuli mweŵo. Mbasyani mwamutumina, naye waya lukoso?

²⁵ Mulimwisi Abineli umwana wakwe Neli ati waliisile mukumutumpaikeni, nekwisiŵa ukufuma kwenu nekwinjila kwenu, nekwisiŵa fyonse ifi mulukucita.

²⁶ Peŋka Yoabi, ili afumine: kuli Dafidi, alitumine iŋkalamba ati simulonde Abineli; nasyo syalimubwesesye ukumufumya kumukalo uwakuSila; sombi Dafidi taafiisiŵile'fyo.

²⁷ Lomba ili abwelele Abineli kuEbiloni, Yoabi walimutwite kumpelo pakati pacilyaŋgwa mukulaŵila nakwe kumfiso, nekumulasa-po apo mumala, naye kaafwa; pakuti pamilopa yakwe Asayeli umukwaŵo.

²⁸ Lomba pantanjile ili afyumfwile' fyo Dafidi, alilaŵile ati, Neŵo neŵufumu bwanji tatukwete umulandu pamenso aŵaYawe pakuti pamilopa yakwe Abineli umwana wakwe Neli,

²⁹ Ŋgaiwe pamutwi wakwe Yoabi napacikoto conse icaŵawisi; lomba tekuti kuŵule-po pacikoto cakwe Yoabi umuntu uli nekuswa kwamilopa neli wamanata neli ukonokele uŵeyamina pamukombo neli wakufwa kumpoko neli wakuŵule'fyakulya.

³⁰ Fyopele'fyo Yoabi naAbisyai umukwaŵo ŵalimwipeye Abineli, pakuti walimwipeye Asayeli umukwaŵo kuGibyoni paŋkondo.

³¹ Peŋka Dafidi walilaŵile kuli Yoabi nakuŵantu ŵonse aŵo ali naŵo ati, Kwamuneni ifyakufwala fyenu, mufwale nefikundulu, mumulile Abineli. Nayo imfumu Dafidi yaliulondele umuseŵa.

³² Naŵo ŵalimusicile Abineli kuEbiloni. Lomba imfumu yalililile nemusowa neminsosi kucilende cakwe Abineli; naŵo aŵantu ŵonse nekulila.

³³ Kaŵili imfumu yaliŵombomene pakuti pali Abineli, nekulaŵila ati, Kani aŋgafwa Abineli koti kufwa kwakaŋguluŋgulu?

³⁴ Amaŵoko enu taakacilwe, Amakasa enu taaŵicilwe muminyololo: Koti nifyefyo ifi awa umuntu pamenso aŵana ŵaŵumbifi, Koti nifyopele'fyo namweŵo kamuwa. Lomba neŵantu ŵonse nekumulilila liŵili.

³⁵ Peŋka aŵantu ŵonse ŵaliisile mukumulomba Dafidi ati alye lomba takaŋgawa akasuŵa; sombi Dafidi walilapile ati, ŴaLesa ŋgawacite kuli neŵo nafimbi peulu, kani ŋgesye lukoso siŋkwa neli nicimbi, ili takaŋgawa akasuŵa.

³⁶ Lomba aŵantu ŵonse ŵalifibwene'fyo, nafyo fyaliŵatemwesye; pakuti fyonse'fyo ifi yacitile imfumu fyaliŵatemwesye aŵantu ŵonse.

³⁷ Fyopele'fyo aŵantu ŵonse neŵaIsilaeli ŵonse ŵaliisiŵile bwino akasuŵa ako ati imfumu tayafwaile ukumwipaya Abineli umwana wakwe Neli.

³⁸ Peŋka imfumu yalilaŵile kuŵantu ŵaiyo ati, Kansi tamwisi ati kanokasuŵa imfumu, umuntu umukulu, yawa muIsilaeli?

³⁹ Lomba kano-kasuŵa ndinacile naŋgawa ati ndisufisiwe ati nimfumu; kaŵili aŵa-ŵantu aŵana ŵakwe Syeluya ŵalincilile ukukosa. ŴaYawe ŋgaŵaibwesesye imbifi umulandu koti kuŵifya kwaiyo.