2Samweli 24 - Amashiwi Aba Lesa

¹ Lomba ukukalipa kwaŵaYawe kwaliŵaŵucile liŵili aŵaIsilaeli, naŵo ŵalimwimisye Dafidi mukuŵemina, ati, Koya, uŵapende aŵaIsilaeli neŵena-Juda ubwinji bwaŵo.

² Peŋka imfumu yalilaŵile kuli Yoabi, icilolo capeŵumba, uyo yali nakwe ati, Pano kamupitana monse mufikoto fyaŵaIsilaeli, ukutatika kuDani ukufika nakuBeyasyeba, mukalukuŵapenda aŵantu, ati ŋkesiwe ubwinji bwaŵantu.

³ Naye Yoabi nekulaŵila kumfumu ati, ŴaYawe Lesa wenu ŋgawakalunde kuŵantu koti bwinji bwaŵo impindi umwanda, kaŵili amenso aŵasikulu ŵanji imfumu ŋgaakafiŵone: sombi ŵasikulu ŵanji imfumu mbanindo ŵalukutemenwa muli cici-cintu?

⁴ Naŋgawe'fyo isiwi lyamfumu lyalicilile napali Yoabi napafilolo fyapeŵumba. Popele Yoabi nefilolo fyapeŵumba ŵalifumine napamenso amfumu, mukuŵapenda aŵaIsilaeli.

⁵ Naŵo kaŵaaŵuka Jodeni nekukoma muAloeli, kulwine lwakumusi ulipakati pamukolo wakwe Gadi, nakuJasyeli:

⁶ popele apo ŵalificile kuGilyadi nakucalo caTacitimi-kadisi; naŵo nekufika nakuDaniyani, nekusiŋguluka ukulukuya kuSidono,

⁷ nekufika nakumusi ukosele waTulo, nakumisi yonse yaŵaYifi, neyaŵaKanani: naŵo nekuya kusaufu kwakuJuda kuBeyasyeba.

⁸ Lomba ili ŵasilile ukupitana monse mucalo, ŵalificile kuJelusalemi pakusila imyensi isanu naine nensiku amakumi aŵili.

⁹ Naye Yoabi nekwipela imfumu ubwinji bwakupenda kwaŵantu: lomba pali muIsilaeli aŵalalume aŵalupata aŵakusomona impoko amasausande imyanda isanu naitatu; kaŵili aŵalalalume ŵakwe Juda ŵalikumene amasausande Imyanda isanu.

¹⁰ Kumfwa umutima wakwe Dafidi kulu, ili aŵapendele aŵantu. Naye Dafidi nekulaŵila kuli ŵaYawe ati, Naŵifya ukwakuti pali fifi ifi nacita: sombi ŵukumo, mweŵaYawe, ndukumukombeteleni ati mufumye ukuŵifya kwamuntu wenu; pakuti nacita ifyakutumpa ukwakuti.

¹¹ Popele pakwima Dafidi ulucelo, isiwi lyaŵaYawe lyaliisile kuwakusimika Gadi, uwakuŵona wakwe Dafidi, ati,

¹² Koya, ukalaŵile kuli Dafidi ati, ŴaYawe ŵalaŵila ifi ati, N dukukutambicila ifintu fita tu; usalulule-po cimo, ati ŋkakucitile co.

¹³ Fyopele'fyo Gadi waliisile kuli Dafidi nekumuŵula nekulaŵila kuli ye ati, Kani pakese kuli mweŵo pacalo cenu imyaka isanu naiŵili iya nsala? Kani mukalukuŵutuka imyensi itatu pamenso atupondo twenu ili tumutamfyeni? Kani pakalukuli pacalo cenu umwalo insiku sitatu? Pano kamwalakanya, mulaŋguluke ukwasuka uko nakuŵabwesesya aŵantuma.

¹⁴ Popele Dafidi walilaŵile kuli Gadi ati, Ndi pantu apafinine ukwakuti: ŋgatuwile pano muminwe yaŵaYawe; pakuti iŋkumbu syaŵo sikulu: tekusumina ati ŋgwile muminwe yaŵantu.

¹⁵ Fyopele'fyo ŵaYawe ŵalitumine umwalo paIsilaeli ukutatika ulucelo ukufika nakumpindi iyansicilwe: lomba paŵantu palifwile amasausande amakumi asanu naaŵili ukufuma kuDani ukufika nakuBeyasyeba.

¹⁶ Lomba pakutambika ukuŵoko Iŋkalamba kuJelusalemi mukuwonala umusi, ŵaYawe walilaŋgulucile fimbi ifyaŵumbifi, nekulaŵila kuŋkalamba iyalukuŵepaya aŵantu, ati, Fyeŋke'fi, ukuŵoko koŵe kucileke. Lomba iŋkalamba yaŵaYawe yali paciŵansa cakwe Alanya umuJebusi.

¹⁷ Peŋka Dafidi walilaŵile kuli ŵaYawe, ili abwene iŋkalamba iyalukuŵapama aŵantu, ati, Ŵoneni naŵifya, nacita ifyakuleŋgulula: sombi isi-mbelele mbanindo syacita? Ndukumukombeteleni ati musumine ati ukuŵoko kwenu kumbucile neŵo nekwiŵucila iŋanda yaŵatata.

¹⁸ Lomba Gadi waliisile ako-kasuŵa kuli Dafidi nekulaŵila kuli ye ati, Konina, wimike iconto icakuli ŵaYawe paciŵansa cakwe Alanya umu Iebusi,

¹⁹ Naye Dafidi walininine koti kulaŵila kwakwe Gadi, koti kufunda kwaŵaYawe.

²⁰ Popele Alanya waliceŵucile nekwiŵona imfumu neŵantu waivo ŵalukwisa kuli ye; naye Alanya nekufuma nekwinamisya kumfumu napamenso pansi.

²¹ Naye Alanya nekulaŵila ati, Mbanindo ŵasikulu ŵanji imfumu ŵesile kumuntu waŵo? Naye Dafidi ati, Nimukuula kuli weŵo iciŵansa, mukuŵeŵacila ŵaYawe iconto, ati umwalo ukacileke kuŵantu.

²² Peŋka Alanya kaalaŵila kuli Dafidi ati, Wasikulu ŵanji imfumu ŋgawapoke lukoso, ŵapose ifyo ifyelelwe kuli ŵo: ŵoneni iŋombe isyamulambu wakoca nsi, nefyakupuma nefyakuŋombe mfi niŋkuni:

²³ fyonse'fi mweŵamfumu, Alanya alukuŵapela ŵamfumu. Kaŵili Alanya ŵalilaŵile kumfumu ati, ŴaYawe Lesa wenu ŋgawamupokeleleni.

²⁴ Nayo imfumu nekulaŵila kuli Alanya ati, Koku, sombi icine nakuula kuli weŵo koti muulo; tekuti mbaposele imilambu yakoca ŵaYawe Lesa wanji iyakuŵula neli makweŵo kuli neŵo. Fyopele'fyo Dafidi waliulile iciŵansa neŋombe, nekuposa amasyekeli esilifa amakumi asanu.

²⁵ Naye Dafidi nekwiŵaka'po ico nto icakuli ŵaYawe, nekuposa imilambu yakoca neyaŵutende. Fyopele'fyo ŵaYawe ŵalikombetelwe pakuti pacalo, nawo umwalo nekucileka kuIsilaeli.