2Samweli 22 - Amashiwi Aba Lesa

¹ Lomba Dafidi walilaŵile kuli ŵaYawe amasiwi alulu-lwimbo pakasuŵa ako ŵaYawe ŵamupulwisye muminwe yatupondo twakwe tonse, namuminwe yakwe Saulu;

² naye ati: ŴaYawe libwe lyanji, niŋanda yanji ikosele, eŵakumpulusya, eŵanji;

³ ŴaLesa ŵebwe lyanji, muli ŵo emo nakulukupema; Niŋgawo yanji, liseŋgo lyakupuluka kwanji, Niŋanda yanji itali, ŵakupulucila-ko ŵanji; Mweŵakupulusya mulampulusisya muwuŋgwa.

⁴ Nakuŵeta ŵaYawe, aŵelelwe ukucindikwa: Fyopele filya efi ŋkapuluka kutupondo twanji.

⁵ Pakuti amaŋkapa amfwa alinsiŋgulucile, Amaloŵe aŵantu ŵalukoso alintinisye.

⁶ Imyando yakuSyeoli yali ponse pali neŵo: Ifyakuteya ifyamfwa fyalinselucile.

⁷ Mukukululuka kwanji naliŵetile ŵaYawe, Icine, kambalilila ŵaLesa ŵanji: Naŵo nekumfwa isiwi lyanji kwitempuli lyaŵo, Nekulila kwanji nako nekufika kumatwi aŵo.

⁸ Peŋka necalo nekuteŋkana nekututuma, Ifyakukosya iulu nekuteŋkana Nekusuŵana, pakuti ŵalikalipile ŵo.

⁹ Mumyona yaŵo mwalifutumine icusi, Kaŵili umulilo uwakufuma mukanwa kaŵo walimotele: Amakalasi nekwaka kuli wo.

¹⁰ Ŵaliofwele neulu, nekuseluka; Popele nemfinsi iyakuti yali pansi pamakasa aŵo.

¹¹ Kaŵili ŵaliendele pali kelubi, nekupalala: Icine, ŵalibwenwe pamapindo acipupu.

¹² Naŵo nekwalula imfinsi niŋgomi Isyakuwasiŋguluka, Ukuwuŋgana kwamenda, amakumbi amutika akwiulu.

¹³ Pakukumana nekuwaŋgala ukwapamenso aŵo Amakalasi amulilo nekwaka.

¹⁴ ŴaYawe ŵalilulumine mwiulu, Aŵo Aŵacilile ŵalilaŵile isiwi lyaŵo.

¹⁵ Popele ŵalitumine imifwi nekuŵapalaŋganya: Akampesimpesi, nekuŵakatasya.

¹⁶ Peŋka imikoŋkola yacisiŵa nekuŵoneka, Ifyapa nsi ifyacalo nekufisuluka Kukupata kwaŵaYawe, Pakumfwa ukutukala kwamupuya uwamumyona yaŵo.

¹⁷ Ŵalitumine ukufuma mwiulu; ŵalimpokele; Ŵaliŋgabwile mumenda aenji.

¹⁸ Ŵalimpulwisye kukapondo kanji akakosele, Kuli ŵaŵo aŵamfitilwe, pakuti ŵalincilile neŵo amakosa,

¹⁹ Ŵalinjisile neŵo pakasuŵa kakukululuka kwanji: Sombi ŵaYawe ŵali ŵakuncincila.

²⁰ Kaŵili ŵalimfumisye ukumfisya apakulu; Ŵalimpulwisye pakuti walisembele muli neŵo.

²¹ ŴaYawe ŵalindambwile koti kulunjika kwanji; Koti kusweta kwaminwe yanji walindambwile.

²² Pakuti nalukulama insila syaŵaYawe, Nekuŵulo'kufuma kuli ŵaLesa ŵanji ukwakuŵifya.

²³ Pakuti ukusololola kwaŵo konse kwali pamenso anji: Nemafunde aŵo nao nsinafumine kuli o.

²⁴ Kaŵili naliŵawaminine, Nekulilama ukulukulikanya ifiŵipile fyanji.

²⁵ Pakuti pali fyefyo, ŵaYawe ŵalindambwile koti kulunjika kwanji, Koti kusweta kwanji pamenso aŵo.

²⁶ Pawaŋkumbu mwakulibwenekesya ati muli ŵaŋkumbu; Pali woyo uwaminine mwakulibwenekesya ati muliwaminine;

²⁷ Paŵaswetele mwakulibwenekesya ati muliswetele; Kaŵili pawamileŋgululo mwakulibwenekesya ati muli ŵakuleŋgulula.

²⁸ Kaŵili mwakuŵapulusya aŵantu aŵalukupensiwa; Sombi amenso enu ali paŵakulitota ati mukaŵacefye.

²⁹ Pakuti mweŵo mweŵaYawe ninyale yanji; Lomba ŵaYawe ŵakatufya imfinsi yanji.

³⁰ Pakuti, muli mweŵo emo ntwalo'musika kwiŵumba lyaŵantu; Muli ŵaLesa ŵanji emo nsotoke'liŋga.

³¹ IfyaŵaLesa, insila yaŵo iliwaminine lukoso; Amasiwi aŵaLesa aliesesiwe; Ŵo niŋgawo kuli ŵaŵo ŵonse aŵapema-mo muli ŵo.

³² Pakuti mba ninani niŵaLesa, utaali niŵaYawe weŋka? Mbaninani cibwe, ici tacili niŵaLesa ŵesu weŋka?

³³ ŴaLesa niŋanda yanji ikosele; Naŵo ŵalatanjilila munsila yaŵo aŵawaminine.

³⁴ Ŵalesya amakasa anji koti aŵakota ŵanama; Nekunjikalika pamipunda yanji iyapeulu.

³⁵ Ŵalasambisya iminwe yanji ukulwa; Fyopele'fyo amaŵoko anji nekufuna uŵuta bwaluŵemba.

³⁶ Kaŵili mwalimpele neŵo iŋgaŵo yakupulusya kwenu; Nako ukulelesa kwenu kwandemya.

³⁷ Mwalikusisye ukutanauka kwanji pansi; Amakasa anji taatesimucile.

³⁸ Nalitamfisye utupondo twanji nekutonala; Kaŵili nsinaalulucile-po ili tatuŋgaliwa.

³⁹ Kaŵili nalitulile nekutulasa ukulukupusya, twiŋgesa mukuŵuka: Icine, ŵaliwile pansi pamakasa anji.

⁴⁰ Pakuti mwansamika nemakosa akuŋkondo; Mwalikomekele kuli neŵo aŵo aŵambucile.

⁴¹ Nakaŵili mwalitufutaticile kuli neŵo utupondo twanji, Ati mbapinike aŵo aŵamfitilwa.

⁴² Ŵaliceŵucile, sombi tapali uwakupulusya; Ekuli ŵaYawe, sombi taŵaŵaasucilepo.

⁴³ Popele apo naliŵatwile ukwakuti, Nekuŵaalula koti lifukutu ilyapacalo, Naliŵanyantile koti matipa apamiseŵo, nekuwapalaŋganya,

⁴⁴ Kaŵili mwalimpulwisye kukupatana kwaŵantu ŵanji; Mwalindamine ati cileme camikoka yaŵantu; Umukoka unsinaisiŵile ukampyunjila.

⁴⁵ Aŵensu ŵakalikomeka kuli neŵo; Peŋka pakumfwa ifyanji, ŵakaŋumfwisya.

⁴⁶ Aŵensu ŵakalela, Ŵakafuma-po apakufisamina paŵo ili ŵalitutumina.

⁴⁷ ŴaYawe ŵali nemweo; lomba ibwe lyanji ŋgalicindikwe; Kaŵili ŵaLesa ŵebwe lyakupuluka kwanji ŋgaŵalemiwe:

⁴⁸ EŵaLesa aŵo aŵancitila imilandu utupondo twanji, Awaŋkomekela imikoka yaŵantu,

⁴⁹ Aŵamfumya kutupondo twanji: Icine mulansuntwila peulu pali ŵaŵo aŵambucila; Mulampulusya kumuŋgwa,

⁵⁰ Pakuti pali fyefyo nakumutoteni, mweŵaYawe, Pakati pamikoka yaŵantu; Ŋkemba isyakucindika isina lyenu.

⁵¹ Ukupuluka ukukulu ŵalapela imfumu yaŵo; Ŵalalanjisya Iŋkumbu isyakulelesa kuli woyo usufisiwe kuli ŵo, Kuli Dafidi nakuŵana ŵakwe insiku syonse isyamuyayaya.