2Samweli 21 - Amashiwi Aba Lesa

¹ Lomba paliŵele necipumpula pansiku syakwe Dafidi imyaka itatu, umwaka umo ili ukoŋka uŵyakwe; popele Dafidi walifwaile pamenso paŵaYawe. Peŋka ŵaYawe ati, Nipakuti pali Saulu nenanda yakwe iyamilopa, pakuti ye waliŵepeye aŵaGibyoni.

² Nayo imfumu nekuŵeta aŵaGibyoni, nekulaŵila kuli ŵo; (lomba aŵaGibyoni taŵali ŵapaŵaIsilaeli, sombi ŵali ŵasyele-po paŵaAmoli; kaŵili aŵaIsilaeli kale ŵalapile kuli ŵo: lomba Saulu walifwaile ukuŵepaya pakuti pamuŋkonsya wakwe uwakuŵalsiiaeli neŵena-Juda:)

³ naye Dafidi nekulaŵila kuwa'Gibyoni ati, Mbamucitile'ndo? Kaŵili ncite kundo ukulamwina, ati mukasyucisye uŵupyani bwaŵaYawe?

⁴ Popele aŵaGibyoni ŵalilaŵile kuli ye ati, Tacili ceŵo cesilifa necegolide pakati pali fweŵo naSaulu nenanda yakwe; kaŵili taili milimo yesu ukwipaya umuntu muIsilaeli. Naye ati, Ifyo mwakulaŵila, neŵo ŋkamucitileni fyopele'fyo.

⁵ Naŵo kaŵalaŵila kumfumu ati, Uyo-muntu uwatulile nekutwalicila ati ŋgatonalwe twiŋgesa-kusyala mumipaka yonse yakwe Isilaeli,

⁶ paŵana ŵakwe aŵalalume ŋgatukapelwe ŵasanu naŵaŵili, eli tukaŵapaticila kuli ŵaYawe muGibea wakwe Saulu uwasalulwilwe kuli ŵaYawe. Nayo imfumu ati, Ŋkaŵaposa.

⁷ Sombi imfumu yalimupulwisye Mepibosyeti, umwana wakwe Jonafani umwana wakwe Saulu, pakuti pacilapo icakuli ŵaYawe icali pakati pali ŵo, pakati pali Dafidi naJonafani umwana wakwe Saulu.

⁸ Sombi imfumu yalipokele aŵana aŵalalume ŵaŵili aŵakwe Lisipa, umwana umwanakasi wakwe Aja, uyo amufyalile Saulu, Alimoni naMepibosyeti; pamo neŵana aŵalalume ŵosanu aŵakwe Mikali, umwana umwanakasi wakwe Saulu, aŵo amufyalile Adilyeli umwana wakwe Balesilaye umwina-Meyolati:

⁹ popele yaliŵapele muminwe yaŵaGibyoni, naŵo ŵaliŵakulicile palupili pamenso aŵaYawe, naŵo ŵonse ŵosanu naŵaŵili ŵaliwile pamo; lomba ŵaliŵepeye pansiku syakuteŵula pakutatika ukuteŵula amabali.

¹⁰ Lomba Lisipa, umwana umwanakasi wakwe Aja, waliŵulile ifyalupafu, nekuliansicila pebwe lyacandansi, ukufuma pakutatika kwakuteŵula ukufika nakukuloka kwamenda kwiulu; naye taasumine ati ifyuni fyamwiulu fiikale pali ŵo akasuŵa, neli filwani ifyamumpaŋga uŵusiku.

¹¹ Peŋka ŵalimuŵulile Dafidi ifi acitile Lisipa umwana wakwe Aja, umwanakasi wakwe Saulu.

¹² Popele apo Dafidi waliile nekuŵula amafupa akwe Saulu nemafupa akwe Jonafani umwana wakwe kuŵantu aŵakuJabesi-gilyadi, aŵaeŵile kumuseŵo uwakuBetasyani uko ŵaŵapaticile aŵaFilisiti, pakasuŵa ako ŵamwipeye Saulu kuGilibowa aŵaFilisiti:

¹³ naye nekufumya-po apo amafupa akwe Saulu nemafupa akwe Jonafani umwana wakwe; kaŵili ŵaliŵunjile nemafupa aŵaŵo aŵakulicilwe.

¹⁴ Naŵo ŵalisicile amafupa akwe Saulu naJonafani umwana wakwe mucalo caBenjamini kuSila, mucilende cakwe Cisi ŵawisi; naŵo kaŵacita koti nifyefyo fyonse ifi yafundile imfumu. Panuma pali fyefyo ŵaLesa ŵaliumfwile ukulomba ukwakucalo.

¹⁵ Kaŵili aŵaFilisiti ŵalukulwa liŵili neŵaIsilaeli; lomba Dafidi waliselucile pamo neŵantu ŵakwe, nekulukulwa neŵaFilisiti; naye Dafidi nekutembuka.

¹⁶ Popele Isibi-benobo, uwali paŵana ŵacimuntu icitali, ukulema kwefumo lyakwe kwalikumene amasyekeli aluŵemba imyanda itatu, ye, uwali nempoko yaŵukumo kuluŵunda, waliesesye ukumwipaya Dafidi.

¹⁷ Sombi Abisyai, umwana wakwe Syeluya, walimofwele-ko, nekumupama umuFilisiti, nekumwipaya. Popele apo aŵantu ŵakwe Dafidi ŵalilaŵile kuli ye necilapo ati, Tesi muye pamo nafweŵo mukulwa liŵili, mwiŋgesa kusimya inyale yakwe Isilaeli.

¹⁸ Lomba panuma pali fyefyo paliŵele ati pali naimbi iŋkondo neŵaFilisiti kuGobo; telyo Sibecai umuKusyati aŋgamwipaya Safi uwali paŵana ŵacimuntu ici tali.

¹⁹ Kaŵili paliŵucile naimbi iŋkondo neŵaFilisiti kuGobo; telyo Elikanani umwana wakwe Yaleolejimi umwina-Betelemi aŋgamwipaya Golyati umuGiti, uyo umusako uwakwifumo lyakwe wali koti litabwa lyamuposesi.

²⁰ Kaŵili pali neŋkondo kuGati, apo pali umuntu umutali makosa, uwali neminwe isanu naumo pamaŵoko onse, nefikumo fisanu nacimo pamakasa onse, fyonse fyalikumene amakumi aŵili nafine; naye walifyelwe kuli cimuntu icitali.

²¹ Lomba ili apinjile Isilaeli, Jonafani, umwana wakwe Simeya umukwaŵo Dafidi, walimwipeye.

²² A ŵo ŵonane ŵalifyelwe kuli cimuntu icikulu muGati; naŵo kaŵawa kuminwe yakwe Dafidi nakuminwe yaŵantu ŵakwe.