2Samweli 20 - Amashiwi Aba Lesa

¹ Lomba epo ali umuntu wakwe Belyali, isi na lyakwe niSyeba, umwana wakwe Bicili umwina-Benjamini; naye kaalisya ulupeŋga nekulaŵila ati, Fweŵo tatukwete icakwaŵana muli Dafidi, kaŵili tatukwete neli ŵupyani mumwana wakwe Jese: aŵantu ŵonse ŋgawaye kumasema aŵo, mweIsilaeli.

² Fyopele'fyo aŵaIsilaeli ŵonse ŵalilekele ukulukumulonda Dafidi, naŵo nekumulonda Syeba umwana wakwe Bicili: sombi awena-Juda ŵaliikatilile kumfumu yaŵo, ukufuma kuJodeni ukufika nakuJelusalemi.

³ Peŋka Dafidi waliisile kunanda yakwe kuJelusalemi; nayo imfumu yaliŵulile aŵo-ŵanakasi ŵaiyo ikumi, aŵo asile mukulama iŋanda, nekuŵaŵika bwino, nekulukuŵateŵeta nefyakulya, sombi tayainjile kuli ŵo. Fyopele'fyo ŵo nekulukwisalilwa ukufika nakukasuŵa kakufwa kwaŵo, ili ŵekele ŵumukamfwilwe.

⁴ Popele apo imfumu yalilaŵile kuli Amasa ati, Mbuŋganisisyeni aŵena-Juda pansiku sitatu, naweŵo kaŵili ukalukuli-po.

⁵ Naye Amasa nekuya mukuwuŋganya aŵena-Juda; sombi walikokwele ukucila napampindi iyansicilwe iyamuŵulile.

⁶ Naye Dafidi nekulawila kuli Abisyai ati, Pano Syeba umwana wakwe Bicili akutukatasya ukwakucila napali koko ukwakwe Abisalomi; koŵula aŵantu ŵaŵawisokulu, ulukumulonda, eŋgesa-kupoka imisi yamaliŋga, afyuke napamenso pesu.

⁷ Lomba palimulondele aŵantu wakwe Yoabi pamo neŵaCeleti neŵaPeleti neŵamakosa ŵonse; naŵo kaŵafuma mujelusalemi mukumutamfya Syeba umwana wakwe Bicili.

⁸ Ili ŵaficile kwibwe ilikulu ilili muGibyoni, lomba Amasa waliisile mukuŵacinsya. Lomba Yoabi walifwite ifyaŋkondo ifi alisamicile; kaŵili apo pali umusipi uwali nempoko mucuŵo ikacilwe muluŵunda lwakwe; lomba pakwima ye kaisopoka.

⁹ Peŋka Yoabi kaalaŵila kuli Amasa ati, Kani fili bwino naweŵo, wemukwasu? Naye Yoabi walimwikete Amasa kumwefu nekuŵoko kwakwe ukwakulwine mukumufyonta-po.

¹⁰ Sombi Amasa taalaŋgulucile impoko iyali muminwe yakwe Yoabi; fyopele'fyo walimulasile kuli yo mukapafu, nekufokwela-mo pansi amala akwe; taamupamine liŵili; naye kaafwa. Lomba Yoabi naAbisyai umukwaŵo ŵalimulondelele Syeba umwana wakwe Bicili.

¹¹ Popele apo paliimakene apepi pali ye umbi umusaŋkwa wakwe Yoabi, naye nekulaŵila ati, Ulukumutemwa Yoabi nawoyo uli wakwe Dafidi, ŋgaalukumutonda Yoabi.

¹² Kansi Amasa acilele ili alamba lukoso mumilopa yakwe pakati pamuseŵo. Popele uyo-muntu, ili abwene ati aŵantu ŵonse ŵalukwimakana, walimupintile Amasa ukumufumya mumuseŵo ukumutwala mumpaŋga, nekumufimba necakufwala, pakuŵona ye ati ŵonse aŵapitile-ko ŵalukwimakana.

¹³ Paku mufumya mumuseŵo lomba aŵantu ŵonse ŵalukumulonda Yoabi muku mutamfya Syeba umwana wakwe Bicili.

¹⁴ Naye Yoabi wali pi tile pafikoto fyakwe Isilaeli fyonse ukufika kuAbeli nakuBetamayaka nakuŵena-Beli ŵonse; naŵo nekuwuŋgana pamo, nekulukumulo nda kaŵili.

¹⁵ Naŵo ŵalificile nekumusiŋguluka muAbeli uwakuBetamayaka, nekuŵunjila ku musi umusime, nawo kauli apepi paciŵumba cakumusi; naŵo ŵonse aŵali nakwe Yoabi ŵalukucitoŵala iciŵumba mukuciwisya.

¹⁶ Popele apo umbi umwanakasi uwamano uwali mumusi waliŵilicisye ati, Tumfweni, tumfweni! Ndukumukombeteleni ati mulaŵile kuli Yoabi ati, Palamineni kuno ati ndaŵile namweŵo.

¹⁷ Naye walipalamine kuli ye, naye umwanakasi ati, Mweŵo kani nimweŵaYoabi? Naye nekwasuka ati, Nineŵo. Telyo aŋgalawila kuli ye ati, Umfweni amasiwi amusyakasi wenu. Naye nekwasuka ati, Ndukumfwa.

¹⁸ Telyo aŋgalawila ati, Akale ŵali necindaŵindaŵi ati, Wakepusya icine kuAbeli, fyopele'fyo kafiikala lukoso.

¹⁹ Neŵo ndi wapali ŵaŵo aŵaŵutende aŵatekenye muIsilaeli: mweŵo mulukufwaya ukonala umusi naŵanyina muIsilaeli: mbanindo muŋgawumina uŵupyani bwaŵaYawe?

²⁰ Naye Yoabi nekwasuka nekulaŵila ati, Ŋgafiŵe ukutali, ŋgafiŵe ukutali kuli neŵo, ati mine, ŋgonale.

²¹ Iceŵo tacili ifyo: sombi umuntu uwakucalo camapili icakuEfilayimi, isi na lyakwe niSyeba umwana wakwe Bicili, wasuntula ukuŵoko kwakwe ukwiŵucila imfumu eDafidi; mumupose uyo eŋka eli ŋkafuma ku musi. Naye umwanakasi nekulaŵila kuli Yoabi ati, Ŵoneni, umutwi wakwe wakuposwa kuli mweŵo ukucila iliŋga,

²² Peŋka umwanakasi waliile kuŵantu ŵonse koti mano akwe. Naŵo ŵalitetele umutwi wakwe Syeba umwana wakwe Bicili, nekuuposa kuli Yoabi. Naye kaalisya ulupeŋga: naŵo ŵalipalaŋgene ukufuma kumusi ŵonse ukulukuya kumasema aŵo. Naye Yoabi nekubwelela kujelusalemi kumfumu.

²³ Lomba Yoabi waliliikalicile iŵumba lyakwe Isilaeli lyonse; kaŵili Benaya umwana wakwe Yeoyada waliikalicile aŵaCeleti neŵaPeleti;

²⁴ naye Adolami wali pamusoŋko; naye Josafati umwana wakwe Aciludi wali mwanusi;

²⁵ naye Syefa wali mulembesi; naŵo Sadoko naAbayata ŵali ŵapapatilisi;

²⁶ kaŵili Ila naye umwina-Yaili wali mupapatilisi wakwe Dafidi.