2Samweli 2 - Amashiwi Aba Lesa

¹ Panuma pali fyefyo lomba Dafidi waJiipwisye kuli ŵaYawe ati, Kani ŋkaninine kuli umbi wamisi yabwinaJuda? Naŵo ŵaYawe nekulaŵila kuli ye ati, Koninina-ko. Kumfwa Dafidi ati, Mbaŋkaninine kulipi? Naye ati, NikuEbiloni.

² Fyopele'fyo Dafidi walininine-ko pamo neŵakasi ŵakwe ŵoŵilo, Acinoyami umuYesileyeli, naAbigayili mukaNabali umuKameli.

³ Kaŵili aŵantu ŵakwe aŵo ali naŵo Dafidi aliŵaninicile ŵonse newamumananda aŵo: naŵo kaŵekala mumisi iyakuEbiloni,

⁴ Lomba aŵena-Juda ŵaliisile, nekumusufya Dafidi uko ati nimfumu yapacikoto cakwe Juda. Lomba ŵalimuŵulile Dafidi ati, Ŵantu aŵakuJabesi-gilyadi eŵamusicile Saulu.

⁵ Kumfwa Dafidi kaatuma iŋkalamba kuŵantu aŵakuJabesi-gilyadi, kaalaŵila kuli ŵo ati, Ŋgamusyucile muli ŵaYawe, pakuti mwalicitile iŋkumbu isyo kuli ŵasikulu ŵenu, ekuli ŵaSaulu, nekuŵasika!

⁶ Lomba pano ŵaYawe ŋgaŵamucitileni iŋkumbu naŵucine: naneŵo kaŵili ŋkamubwesesyeni isyoŋkumbu, pakuti mwalicitile'fyo.

⁷ Pakuti pali fyefyo lomba amaŵoko enu ŋgaakose, namweŵo kaŵili ŋgamuŵe nelupata; pakuti ŵaSaulu ŵawisikulunweni ŵalifwile; kaŵili aŵena-Juda ŵalinsufisye ati ninemfumu yaŵo.

⁸ Lomba Abineli umwana wakwe Neli, icilolo ceŵumba lyakwe Saulu, kale amutwite lsibosyeti umwana wakwe Saulu nekumufisya kuMakanayimi,

⁹ nekumwikalika ati nimfumu yapaGilyadi napaŵena-Asikuli napaYesileyeli napaEfilayimi napaBenjamini papaŵena-Isilaeli ŵonse.

¹⁰ (Lomba Isibosyeti umwana wakwe Saulu, imyaka yakwe yalikumene amakumi ane, ili ataticile ukuŵekalika aŵena-Isilaeli, naye kaekalika imyaka iŵili.) Sombi icikoto caŵena-Juda calimulondele Dafidi.

¹¹ Lomba impindi iyo aikele Dafidi ati nimfumu muEbiloni paŵena-Juda yalikumene imyaka isanu naiŵili nemyensi isanu naumo.

¹² Lomba Abineli umwana wakwe Neli neŵantu ŵakwe lsibosyeti umwana wakwe Saulu ŵalifumine kuMakanayimi ukulukuya kuGibyoni.

¹³ Peŋka Yoabi umwana wakwe Syeluya pamo neŵantu ŵakwe Dafidi ŵalifumine nekukumana naŵo pesiŵa lyakuGibyoni; naŵo kaŵekala iŵumba limbi kuno bwisilya lyesiŵa, neŵumba limbi nalyo kulya bwisilya Iyesiŵa.

¹⁴ Kumfwa Abineli walaŵila kuli Yoabi ati, Ndukumukombeteleni ati awasaŋkwa ŋgaŵeme ŵapukutile pamenso esu. Naye Yoabi ati, Ŋgaŵeme.

¹⁵ Elyo ŵaŋgema ŵaŋgaaŵuka koti kupenda; ikumi naŵaŵili aŵena-Benjamini neŵena-Isibosyeti umwana wakwe Saulu, neŵantu ŵakwe Dafidi ikumi naŵaŵili.

¹⁶ Naŵo ŵonse ŵonse kaŵekata aŵaŵyaŵo pamutwi, nekuŵalasa aŵaŵyaŵo pambafu kumpoko; fyopele'fyo ŵonse ŵaliwilile pansi pamo. Pakuti pali fyefyo apo-pantu paliilicilwe ati niKelikatiyasyulimi, uli muGibyoni.

¹⁷ Peŋka iŋkondo yalikatesye ukwakuti akokasuŵa; naye Abineli walipaminwe pamo neŵena-Isilaeli, pamenso aŵantu ŵakwe Dafidi.

¹⁸ Lomba pali-po aŵana ŵakwe Syeluya ŵotatu, Yoabi naAbisyai naAsayeli; naye Asayeli wali neluŵilo koti nimpoyo iyamumpaŋga.

¹⁹ Lomba Asayeli walimutamfisye Abineli; naye pakuŵutuka taapasucile-po neli nikulwine neli nikucipiko ukuleko'kumulonda Abineli.

²⁰ Peŋka Abineli kaasyoloka, ati, Kansi niweŵo Asayeli? Naye nekwasuka ati, Nineŵo!

²¹ Kumfwa Abineli walaŵila kuli ye ati, Pasuka kulwine neli nikucipiko, umwikate umbi umusaŋkwa, upoke ifyela fyakwe ifyakulifuna-ko. Sombi Asayeli taasumine ukupasuka ukuleko'kumulonda.

²² Kumfwa Abineli walaŵila liŵili kuli Asayeli ati, Pasuka, uleke ukundonda: mbanindo niŋgakupama pansi? Mbapo lomba syani niŋgamucewucila Yoabi umukwanu?

²³ Naŋgawe'fyo alikene ukupasuka. Pakuti pali fyefyo Abineli walimulasile munda kuli coco wefumo, nalyo ifumo nekupula namunuma yakwe; naye nekuwila'po nekufwila peŋka'po: popele lomba paliŵele ati ŵonse aŵakufika apo apawilile Asayeli nekufwila kaŵemakana.

²⁴ Sombi Yoabi naAbisyai kaŵacimulondelela Abineli; lomba akasuŵa nekuwa pakufika ŵo kulupili lwaAma, ulusiŋkamene naGiyaka pansila iyakumpanta iyakuGibyoni.

²⁵ Lomba aŵena-Benjamini ŵaliŵuŋgene ukumulonda Abineli, nekwaluka liŵumba limo, nekwimakana peulu palupili.

²⁶ Peŋka Abineli nekumwita Yoabi nekulaŵila ati, Kani impoko yakulukulyalyalya? Tamwisi ati pakusila lukoso pakalukuli ukulula? Impindi yakuŵa syani lomba ili tamuŋgawawula aŵantu ati ŋgawabwele kukuŵalonda aŵaŵyawo?

²⁷ Kumfwa Yoabi ati, Koti nifyefyo ifi ŵali nemweo ŵaLesa, ŋga tamwalaŵila, aŵantu ŋga ŵafume' cine ulucelo, ŋga taŵalondele ŵonse aŵaŵyaŵo.

²⁸ Fyopele'fyo Yoabi nekulisyo'lupeŋga, naŵo aŵantu ŵonse nekwimakana, nekucileko'kuŵalonda aŵena-Isilaeli, nekucileka lukoso ukulwa.

²⁹ Lomba uŵusiku uŵo ŵonse Abineli neŵantu ŵakwe ŵalukwenda pampanta, nekwaŵuka Jodeni, nekupita ponse paBitilono, nekufika nakuMakanayimi.

³⁰ Peŋka Yoabi nekubwela kukumulonda Abineli; lomba ili awuŋgenye aŵantu ŵonse paŵantu ŵakwe Dafidi paliŵulile aŵantu ikumi naŵasanu naŵane naAsayeli.

³¹ Sombi aŵantu ŵakwe Dafidi ŵalipamine aŵena-Benjamini neŵantu ŵakwe Abineli, fyopele'fyo nekufwa aŵantu imyanda itatu nemakumi asanu nalimo.

³² Lomba ŵalimupintile Asayeli nekumusika namucilende caŵawisi, icali kuBetelemi. Naye Yoabi neŵantu ŵakwe ŵaliendele uŵusiku ŵonse, lomba nelucelo nekuŵacila kuEbiloni.