2Samweli 19 - Amashiwi Aba Lesa

¹ Lomba ŵalimuŵulile Yoabi ati, Ŵoneni, imfumu ilukumulilila Abisalomi nekumumfwila insoni.

² Nako ukucila paŋkondo ukwakasuŵa ako kwalialucile musowa kuŵantu ŵonse: pakuti akasuŵa ako aŵantu ŵaliumfwile ati, Imfumu ilukuŵombomanina umwana waiyo.

³ Lomba aŵantu akasuŵa ako ŵaliinjile mumusi ukulukuŵemba, koti koŋgoloka kwaŵantu aŵali nensoni pakufyuka kuŋkondo.

⁴ Lomba imfumu yalifimbile pamenso; nayo imfumu yaliŵilicisye nesiwi ilikulu ati, Wemwana wanji Abisalomi, weAbisalomi, wemwana wanji, wemwana wanji!

⁵ Popele apo Yoabi waliinjile muŋanda umwali imfumu, nekulaŵila ati, Pakasuŵa kalelo mwaleŋgesya insoni pamenso paŵantu ŵenu ŵonse, aŵapulusya lelo umweo wenu nemyeo yaŵana ŵenu aŵalalume neŵanakasi, nemyeo yaŵakasi ŵenu, nemyeo yaŵanakasi ŵenu;

⁶ pakuti mulukuŵatemwa aŵalukumufitilweni, nekuŵafitilwa aŵalukumutemweni. Pakuti mwaŵulisisya lelo ati aŵana ŵamfumu neŵapyunjisi ŵonse ŵalukoso kuli mweŵo: pakuti lelo naŵona ati kani aikala nemweo Abisalomi nafweŵo fwense nekufwa lelo, kansi ifyo fiŋgamutemwesyeni bwino.

⁷ Pakuti pali fyefyo lomba imeni, mufume, mulaŵile ifyakusaŋgalasya kuŵantu ŵenu; pakuti ndukuŵalapa ŵaYawe ati kani tesi mufume, tekuti pasyale pali mweŵo neli muntu umo uŵuŵusiku; lomba ifyo fiŋgamuweleni ifiŵipile ukucila napakuŵifya konse ukwamuŵeleni ukufuma kuwusaŋkwa bwenu ukufika nakuli ŵuŵuno-ŵukumo.

⁸ Telyo iŋgema imfumu nekwikala mumusiko. Naŵo kaŵaŵaŵula aŵantu ŵonse ati, Ŵoneni imfumu iliikele mumusiko; lomba aŵantu ŵonse nekwisa pamenso amfumu. Peŋka aŵaIsilaeli kale ŵaŵutuka ŵonse kumasema aŵo.

⁹ Kaŵili aŵantu ŵonse ŵalukupicisya monse mufikoto fyakwe Isilaeli, ati, Imfumu yalitupulwisye muminwe yatupondo twesu, nekutupanya muminwe yaŵaFilisiti; lomba pano yaŵutuka ukufuma mucalo kuli Abisalomi.

¹⁰ Kaŵili Abisalomi, utwasufisye mukutwikalika, alifwile muŋkondo. Pakuti pali fyefyo lomba, mbanindo tamulukulaŵila isiwi lyakwibwesya imfumu?

¹¹ Popele imfumu Dafidi yalitumine kuli Sadoko nakuli Abayata aŵapapatilisi ati, Kamulaŵila kuŵakulu ŵaŵaJuda ati, Mbanindo mweŵo muli ŵakupela-ko lukoso pawaŋgaibwesesya imfumu kunanda yaiyo? Kamubwene ukulaŵila kwaŵaIsilaeli ŵonse kwafika kumfumu, ukwakwibwesesya kunanda yaiyo.

¹² Mweŵo muli ŵakwasu, muli lifupa lyanji, munefu wanji: pakuti pali fye fyo lomba mbanindo muli ŵakupelako lukoso pawaŋgaibwesesya imfumu?

¹³ Kaŵili kamulaŵila kuli Amasa ati, Weŵo kansi toli lifupa lyanji, munefu wanji? ŴaLesa ŋgawakacite kuli neŵo nefyapeulu kaŵili, kani weŵo tekwikala uli cilolo ceŵumba pamenso anji insiku syonse pamupunda wakwe Yoabi.

¹⁴ Nayo nekwinamika umutima waŵaJuda ŵonse koti mutima wamuntu umo; fyopele'fyo kaŵatuma kumfumu ati, Bweleni mweŵo neŵantu ŵenu ŵonse.

¹⁵ Fyopele'fyo imfumu nekubwela nekufika ku Jodeni, Lomba aŵaJuda ŵalificile kuGiligali mukuya kwicinsya imfumu, mukwaŵusya imfumu pa Jodeni.

¹⁶ Lomba Simyai, umwana wakwe Gela umwina-Benjamini, uwakuBakulimi, kaaŋgufya kaaseluka pamo newaJuda mukwicinsya imfumu Dafidi.

¹⁷ Lomba pamo nakwe pali aŵena-Benjamini umwanda ikumi, naSifa umupyunjisi uwapananda yakwe Saulu, neŵana ŵakwe aŵalalume ikumi naŵasanu, neŵapyunjisi ŵakwe amakumi aŵili pamo nakwe; naŵo kaŵaaŵuka Jodeni pamenso amfumu.

¹⁸ Kaŵili nekwaŵuka nebwato mukwaŵusya aŵakuŋanda yamfumu, nekucita koti kufwaya kwaiyo. Lomba Simyai umwana wakwe Gela waliwilile pansi pamenso amfumu, pakwaŵuka yo Jodeni.

¹⁹ Naye nekulaŵila kumfumu ati, Ŵasikulu ŵanji weŋganjewela ukuwifya, neli kwanuka ifyo ifyacitile nemuntu wenu ukwakuleŋgulula pakasuŵa ako wafumine mu Jelusalemi ŵasikulu ŵanji, ati mwemfumu mufilame mumutima wenu.

²⁰ Pakuti neŵo nemuntu wenu ndiisi ati naliŵifisye; pakuti pali fyefyo ŵoneni, ndiisile lelo uwakutaŋga pananda yakwe Josefi ukuseluka mukuŵacinsya ŵasikulu ŵanji imfumu.

²¹ Sombi Abisyai umwana wakwe Syeluya waliasucile ati, Kansi tesi epaiwe Simyai pakuti pali fifi, pakuti alimufinjile usufisiwe kuli ŵaYawe?

²² Naye Dafidi ati, Mbasyani pali neŵo namweŵo nwewana ŵakwe Syeluya, ati lelo muŋgawa ŵapate ŵanji? Kansi pakwipaiwa-muntu akasuŵa kano muIsilaeli? pakuti nsiliisi ati lelo ninemfumu yaŵaIsilaeli?

²³ Lomba imfumu nekulaŵila kuli Simyai ati, Tekuti ukafwe. Nayo imfumu nekulapa kuli ye.

²⁴ Kaŵili Mepibosyeti, umwana wakwe Saulu waliselucile mukwicinsya imfumu; ye taafwite pamakasa, neli kucesa bwino umwefu, neli kusamfya ifyakufwala, ukutatika kukasuŵa akakufuma imfumu ukufika kukasuŵa ako yabwelele kwaŵo neŵutende.

²⁵ Popele paliŵele ati, ili aficile kuJelusalemi mukwicinsya imfumu, lomba imfumu nekulaŵila kuli ye ati, Mbanindo tawaile pamo naneŵo, Mepibosyeti?

²⁶ Naye nekwasuka ati, Mweŵasikulu, mwemfumu, umuntu wanji walintumpaicile: pakuti nemuntu wenu kandaŵila ati, Nakulisamicila imboŋgolo ati nyende-po, nje nemfumu; pakuti nemuntu wenu ndukusunta.

²⁷ Lomba ye walinsensele nemuntu wenu kuli ŵasikulu ŵanji kumfumu: sombi ŵasikulu ŵanji imfumu ili koti niŋkalamba yaŵaLesa: kamucita lomba ifyelelwe pamenso enu.

²⁸ Pakuti awamuŋanda yaŵatata ŵali koti ŵafwile pamenso aŵasikulu ŵanji imfumu; naŋgawe'fyo mwalinjikalicile nemuntu wenu pakati pali ŵaŵo aŵalukulya kwitebulu lyenu mweŵene. Lomba ndielelwe syani ukulukulila nafimbi kumfumu?

²⁹ Popele imfumu yalilawile kuli ye ati, Mbanindo ulukulaŵilila nafimbi ifyafyeŵo fyoŵe? Neŵo ati, Mweŵilo naSiba kamwaŵana icalo.

³⁰ Naye Mepibosyeti nekulawilakumfumu ati, Icine, ŋgaapoke conse, pakuti ŵasikulu ŵanji imfumu ŵaisa neŵute nde kunanda yaŵo aŵene.

³¹ Lomba Balesilaye umuGilyadi waliselucile ukufuma kuLogelimi; naye kaaŵuka Jodeni pamo nemfumu, mukuyawusya Jodeni.

³² Kansi Balesilaye wali mucekulu ukwakuti, walikumene imyaka amakumi asanu naatatu: lomba ye walukwiteŵeta ifyakulya pakulala yo kuMakanayimi; pakuti ye wali muntu umukulu ukwakuti.

³³ Popele imfumu yalilaŵile kuli Balesilaye ati, Aŵuka pamo naneŵo, lomba nakulukukuteŵeta naneŵo pamo mujelusalemi.

³⁴ Kumfwa Balesilaye walilaŵile kumfumu ati, Insiku syamyaka yamweo wanji sili siŋga ati niŋganinina kuJelusalemi pamo nemfumu?

³⁵ Lelo ndi kumene imyaka amakumi asanu naatatu: kani neŵo ndiisi ukulekanya ifiweme nefiŵipile? Kani nemuntu wenu ndiisi ukumfwa kulumini ifi ndukulya nefi ndukunwa? Kani ndiisi pano ukumfwa isiwi lyaŵalukwimba aŵalalume neŵanakasi? Mbanindo lomba nemuntu wenu niŋgalukuli cakukatasya lukoso ŵasikulu ŵanji imfumu?

³⁶ Nemuntu wenu ndukufwaya lukoso ukwaŵuka Jodeni pamo nemfumu; lomba mbanindo imfumu iŋgandambwila pali fyefyo nelambulo ilyakuŵe'fi?

³⁷ Ndukumukombeteleni ati musumine ati neŵo nemuntu wenu ŋgaluke ati ŋkafwe mumusi mwanji nemwine, apepi pacilende caŵatata necaŵamama. Sombi ŵoneni umuntu wenu Cimikamu; musumine ati ye aaŵuke pamo naŵasikulu ŵanji imfumu; mukamucite ifyo ifyelelwe pamenso enu.

³⁸ Peŋka imfumu nekwasuka ati, Cimikamu akwaŵuka pamo naneŵo, lomba ŋkamucita ifyo ifyelelwe pamenso oŵe: kaŵili fyonse'fyo ifi ukafwaya kuli neŵo, ŋkaficite'fyo pakuti pali weŵo.

³⁹ Popele aŵantu ŵonse ŵaliaŵucile Jodeni, nayo imfumu nekwaŵuka; lomba imfumu nekufyontapo pali Balesilaye nekumusyucisya; naye walibwelele kwaŵo.

⁴⁰ Fyopele' fyo imfumu yaliaŵucile ukuya kuGiligali, naye Cimikamu nekwaŵuka pamo nayo; lomba aŵantu ŵakwe Juda ŵonse ŵaliyaŵusisye imfumu, pamo neŵumba limo lyaŵantu ŵakwe Isilaeli.

⁴¹ Popele kuŵona aŵaIsilaeli ŵonse ŵaliisile kumfumu nekulaŵila kumfumu ati, Aŵakwaŵesu, aŵantu ŵakwe Juda, mbanindo ŵamwiŵileni, nekwaŵusya imfumu newamuŋanda yaiyo pa Jodeni, pamo neŵantu ŵaŵaDafidi ŵonse?

⁴² Peŋka aŵena-Juda ŵonse ŵaliŵaasucile aŵaIsilaeli ati, Nipakuti imfumu ŵakwaŵesu fweŵo: mbanindo lomba mwakalipila paceŵo ici? Kani twalya akantu kamfumu? Kani yatupela neli nimpese?

⁴³ Peŋka aŵaIsilaeli ŵaliŵaasucile aŵena-Juda ati, Fweŵo tuli nefyakwaŵana ikumi mumfumu; kaŵili tuli nefyamuli ŵaDafidi ifyakucilo'bwinji napafyenu; mbanindo lomba mwa tupufisya? Kansi isiwi lyesu talyali lyakutaŋga ati, Bwesyeni imfumu yesu? Lomba amasiwi aŵena-Juda alicilile uŵukali napamasiwi aŵaIsilaeli.