2Samweli 18 - Amashiwi Aba Lesa

¹ Lomba Dafidi waliŵapendele aŵantu aŵo ali naŵo nekwikalika pali ŵo ifilolo fyapamasausande nefyapamyanda.

² Naye Dafidi nekuŵatuma aŵantu pamaŵumba atatu, iŵumba lyakutaŋga muminwe yakwe Yoabi, nelyaŵuaŵili muminwe yakwe Abisyai umwana wakwe Syeluya, umukwaŵo Yoabi, nelyaŵuatatu muminwe yakwe Itayi umuGiti. Lomba imfumu nekulaŵila kuŵantu ati, Icine nakwima nemwine ukulukuya nenu.

³ Sombi aŵantu ati, Tekuti mwime mweŵo: pakuti kani fweŵo tuŵutuke, tesi watulaŋgutuke; kaŵili kani pali fweŵo fweŵenji lukoso tufwe, tesi watulaŋguluke; sombi mweŵo mulukwesya koti nifweŵantu amasausande ikumi; pakuti pali fyefyo ukwelelwa ati mweŵo muliluŋgeme mukutofwa-ko mumusi.

⁴ Nayo imfumu nekulaŵila kuli ŵo ati, Neŵo nakucita koti nifyefyo ifyelelwe kuli mweŵo. Peŋka imfumu yaliimakene pamusiko, naŵo aŵantu ŵonse nekufuma pamaŵumba amyanda neamasausande.

⁵ Popele imfumu yaliŵafundile Yoabi naAbisyai naliayi, ati, Kamucita bwino kumusaŋkwa, ekuli Abisalomi, pakuti pali neŵo. Kaŵili aŵantu ŵonse ŵaJiumfwile ili imfumu ififunda ifilolo fyonse ifyakuli Abisalomi.

⁶ Fyopele'fyo aŵantu ŵaliile mumpaŋga mukulwa neŵaIsilaeli: lomba iŋkondo yali mwiyamba ilyakuEfilayimi.

⁷ Popele aŵaIsilaeli ŵalipaminwe apo pamenso aŵantu ŵakwe Dafidi, lomba pali ukwipayala ukukulu apo akasuŵa ako, ukwaŵantu amasausande amakumi aŵili.

⁸ Pakuti iŋkondo yalikumene ponse pamenso acalo conse; kaŵili iyamba nekulya aŵantu aŵenji ukucila napakulya kwampoko.

⁹ Lomba paliŵele ati Abisalomi walikumene neŵantu ŵakwe Dafidi. Naye Abisalomi walukwenda pemyuli lyakwe; lomba imyuli nekwenda pansi pamitano yamutika iyamweloni ukulu, nemutwi wakwe nekwikatana nemweloni, naye nekupatikwa pakati peulu necalo; lomba imyuli ilyali pansi pali ye nekuya lukoso.

¹⁰ Peŋka umbi umuntu nekufiŵona nekumuŵula Yoabi ati, Ŵoneni namuŵona Abisalomi ili apaticilwe kumweloni.

¹¹ Popele Yoabi walilaŵile kumuntu uwamuŵulile ati, Lomba kansi wafiŵona, mbanindo tomupamine pansi? Ŋga nakupela amasilifa ikumi nemusipi.

¹² Naye umuntu nekulaŵila kuli Yoabi ati, Naŋgawa'ti niŋgapoka muminwe yanji amasilifa imyanda ikumi, tekuti ntambike ukuŵoko kwanji ukumuŵucila umwana wamfumu: pakuti, pamatwi esu, imfumu yamufundeni mweŵo naŵaAbisyai naŵaliayi ati, Cenjeleni eŋgesa umuntu mukukuma-ko kumusaŋkwa Abisalomi.

¹³ Kani ifyo tefyo, ŋga nacita ifyakupulaisya kumweo wakwe (lomba tapali-po iceŵo icifisilwe kumfumu), namweŵo mweŵene ŋga mwanjimina.

¹⁴ Telyo aŋgalawila Yoabi ati, Tesi ŋkokole'fi naweŵo. Naye kaapoka muminwe yakwe imifwi itatu nekupusya mumutima wakwe Abisalomi, ili acili mulaŵi pakati pamweloni.

¹⁵ Kaŵili awasaŋkwa ikumi, aŵapintile ifyakulifuna-ko fyakwe Yoabi, walisiŋgulucile nekumupama Abisalomi nekumwipaya.

¹⁶ Popele apo Yoabi walilisisye ulupeŋga, naŵo aŵantu nekubwela kukuŵalondesya aŵaIsilaeli; pakuti Yoabi waliŵakenye aŵantu.

¹⁷ Naŵo ŵalimupokele Abisalomi nekumuposa mwikanda ilikulu ilyali mwiyamba; nekuwuŋga peulu pali ye umupili wamabwe uku lu makosa; lomba aŵaIsilaeli ŵaliwutucile ŵonse ukulukuya kumasema aŵo.

¹⁸ Lomba Abisalomi ili acilaŵa waliŵulile nekuliimicila ulupanda lwebwe ululi mumukolo wamfumu: pakuti ye ati nsikwete-mwana umwalalume uwakwanusya isina lyanji; naye nekulwilika ulupanda koti lisina lyakwe umwine; nalo luliilicilwe ati Mupunda wakwe Abisalomi nakukasuŵa kalelo.

¹⁹ Popele apo Acimayasi umwana wakwe Sadoko walilaŵile ati, Ŋgandukuŵutuka mpintile imfumu ifyeŵo ifi ŵaYawe ŵaifutila patupondo twaiyo.

²⁰ Sombi Yoabi walilaŵile kuli ye ati, Tekuti uŵe wakupinte'fyeŵo lelo, sombi ukapinte'fyeŵo kambi akasuŵa; sombi lelo tesi upinte ifyeŵo, pakuti umwana wamfumu alifwile.

²¹ Peŋka Yoabi walilaŵile kumuKusi ati, Koya wiŵule imfumu ifi waŵona. Naye umuKusi nekwinamisya kuli Yoabi, nekuŵutuka.

²² Peŋka Acimayasi umwana wakwe Sadoko kaalaŵila naliŵili kuli Yoabi ati, Sombi naŋgawa nifyo fyonse, ndukumukombeteleni ati musumine ati naneŵo mbutuke ukumulonda umuKusi. Naye Yoabi ati, Mbanindo ulukufwayo' kuŵutuka, wemwana wanji, kobwene tekuti ukapoke umulambulo wapafyeŵo?

²³ Sombi ye ati, Naŋgawa nifyo fyonse, nakuŵutuka. Naye kaalaŵila kuli ye ati, Ŵutuka! Elyo Acimayasi aŋgaŵutuka pansila iyap'acinika, nekumucila umuKusi pakuŵutuka.

²⁴ Lomba Dafidi waliikele pakati pamisiko yoŵilo; naye kalama walininine kumutenje uwapamusiko kwiliŋga, nekuceŵuka nekucencenta, lomba kuŵona nikumuntu alukuŵutuka eŋka.

²⁵ Naye kalama nekuŵilicisya nekwiŵula imfumu. Peŋka imfumu ati, Kani ali eŋka, kansi muli ifyeŵo mukanwa kakwe. Naye kaaŵutucisya nekupalamina.

²⁶ Popele kalama nekuŵona naumbi alukuŵutuka; naye kalama nekumwita uwakulama umusiko nekulaŵila ati, Ŵona, nikumuntu umbi alukuŵutuka eŋka. Nayo imfumu ati, Uyu naye alukuleta ifyeŵo.

²⁷ Popele kalama ati, Ndukulaŋguluka ati ukuŵutuka kwawakutaŋga kuli koti kuŵutuka kwakwe Acimayasi umwana wakwe Sadoko. Kumfwa imfumu ati, Uyo muntu uweme, alukwisa nefyeŵo ifiweme.

²⁸ Popele Acimayasi waliŵilicisye nekulaŵila kumfumu ati, Fyonse fiweme. Naye nekwinamisya kumfumu nemenso akwe pansi pamusili, nekulaŵila ati, Ŵacindeme ŵaYawe Lesa wenu, aŵaŵaposa aŵantu aŵaŵucile ŵasikulu ŵanji imfumu.

²⁹ Kumfwa imfumu ati, Kani kuli bwino kumusaŋkwa Abisalomi? Naye Acimayasi nekwasuka ati, Pakutuma umuntu wamfumu Yoabi, eneŵo nemuntu wenu, nali naŵona icipupa icikulu, sombi nsiisiŵile ifi cali.

³⁰ Nayo imfumu ati, Tela-ko, wime apa. Naye walitelele-ko nekwimakana.

³¹ Lomba kuŵona umuKusi nekufika; naye umuKusi ati, Fyeŵo ifyakuli ŵasikulu ŵanji imfumu; pakuti ŵaYawe ŵamufutileni lelo pali ŵaŵo ŵonse aŵamwimineni.

³² Popele imfumu nekulaŵila kumuKusi ati, Kani kuli bwino kumusaŋkwa Abisalomi? Naye umuKusi nekwasuka ati, Utupondo twaŵasikulu ŵanji imfumu naŵo ŵonse aŵakumuŵucileni mukumukatasyeni ŋgaŵaŵe koti niwoyo-musaŋkwa.

³³ Peŋka imfumu nekumfwe'nsoni isikulu, nekunina nakucipinda peulu pamusiko, nekulukulila; lomba ili ilukuya, kailukulaŵile'fi ati, Wemwana wanji Abisalomi, wemwana wanji, wemwana wanji Abisalomi! ŴaLesa ŋga ŵasumina ati nakufwila, weAbisalomi, wemwana wanji, wemwana wanji!