2Samweli 17 - Amashiwi Aba Lesa

¹ Kaŵili Acitofeli walilaŵile kuli Abisalomi ati, Musumine pano ati nsalulule aŵantu amasausande ikumi naaŵili, lomba nakwima nekumulondelela Dafidi ŵuno-ŵusiku:

² nekukumana nakwe ili akatele nemaŵoko anacile, nekumutinisya; popele aŵantu ŵonse aŵo ali naŵo ŵakuŵutuka; eli ŋkatpama imfumu veŋka:

³ eli ŋkabwesesya kuli mweŵo aŵantu ŵonse: umuntu uyo umulukufwaya ali koti ŵabwela akale ŵonse; aŵantu ŵonse ŵakalukuli neŵutende.

⁴ Lomba amasiwi ayo alimutemwesye bwino Abisalomi neŵakulu ŵakwe Isilaeli ŵonse.

⁵ Peŋka Abisalomi ati, Kamwiteni naKusyayi umuYalici, ŋgatumfwe fyopele'fyo ifi aŋgalawila.

⁶ Peŋka, pakufika Kusyayi kuli Abisalomi, Abisalomi walilaŵile kuli ye ati, Acitofeli walaŵila ifyakuŵe'fyo: kani tucite koti kulaŵila kwakwe? Kani ifyo tefyo, kolaŵila.

⁷ Popele Kusyayi walilaŵile kuli Abisalomi ati, Ukufunda uku afunda inompindi Acitofeli takuweme-po.

⁸ Naye Kusyayi walilaŵile kaŵili ati, Muliŵesi ŵawisinwe neŵantu ŵaŵo ati ŵo ŵalalume, nakaŵili ati ŵalikalipisiwe mumitima yaŵo, koti ninyina-beya uwapokololwa neŵana pampaŋga: kaŵili ŵawisinwe ŵantu waŋkondo, tekuti ŵekale neŵantu.

⁹ Ŵoneni, pano ŵalifiseme mwikanda kani nimumbi: popele pakaŵa ati, pakufwa ŵambi pakutaŋga, ŵonse aŵakumfwe'fyo ŵakalaŵila ati, Pali ukwipayala pakati paŵantu aŵalukuŵalonda ŵaAbisalomi.

¹⁰ Peŋka uyo, naŋgawa ati walupata, uli nemutima ŵaŋkalamu, akasuŋguluka lukoso: pakuti aŵaIsilaeli ŵonse ŵaliisi ati ŵawisinwe ŵantu ŵamakosa, nakaŵili ati aŵo ŵali naŵo ŵantu ŵalupata.

¹¹ Sombi neŵo ndukufunda ati aŵaIsilaeli ŵonse ŋgawawuŋganine kuli mweŵo, ukutatika kuDani ukufika nakuBeyasyeba, koti museŋga wakucisiŵa pakuŵapenda; nakaŵili ati mweŵo mweŵene mukaye kuŋkondo,

¹² Fyopele'fyo tukawasaŋgana pambi apo waŋgawoneka, nekuŵesila koti nifyefyo ifipona pansi icime: lomba tekuti tukaŵasye-po neli umo pali ŵo aŵene neŵantu ŵonse aŵo ŵali naŵo.

¹³ Kaŵili kani ŵainjila mumusi, lomba aŵaIsilaeli ŵonse ŵakaleta imyando kumusi uyo, eli tukaukulumwina munika, ili takakaŵoneka apo neli kabwe kanini.

¹⁴ Popele Abisalomi neŵaIsilaeli ŵonse ati, Ukufunda kwakwe Kusyayi umuYalici kulicilile ukuwama napakufunda kwakwe Acitofeli. Pakuti ŵaYawe ŵalilandakenye mukukuwisya ukufunda kwakwe Acitofeli ukwamano, ati ŵaYawe ŵakafisye kuli Abisalomi ukuŵifya.

¹⁵ Popele apo Kusyayi walilaŵile kuli Sadoko naAbayata aŵapapatilisi ati, Acitofeli wamufunda Abisalomi neŵakulu ŵaŵaIsilaeli ifyakuŵe'fyo; naneŵo kambafunda ifyakuŵe'fi kaŵili.

¹⁶ Pakuti pali fyefyo lomba kamutuma bwaŋgu, mukaŵaŵule ŵaDafidi ati, Tekwikala ŵuno-ŵusiku kumyaŵa iyakumpanta, sombi kamwaŵuka lukoso icine; iŋgesa kuminwa imfumu neŵantu ŵonse aŵo ili naŵo.

¹⁷ Lomba Jonafani naAcimayasi ŵalukwikala apepi paEnilogeli; nemusyakasi kaalukuya mukuŵaŵula; naŵo kaŵaya kaaŵaiŵula imfumu Dafidi: ŵeŋgesa kuŵonwa pakwinjila mumusi.

¹⁸ Sombi umusaŋkwa waliŵabwene nekumuŵula Abisalomi: naŵo ŵoŵilo nekwaŋgufya ukukumbuluka nekufika kunanda yamuntu uwakuBakulimi, uwali nemukalo paluŵansa lwakwe; naŵo nekwinjila-mo.

¹⁹ Peŋka umwanakasi waliŵulile icakufimba pakanwa kamukalo nekucansika-po, nekuposaila-po amasaka akutwa; lomba tapaisibwa-po neli kantu.

²⁰ Popele aŵantu ŵakwe Abisalomi ŵaliisile kumwanakasi kuŋanda; naŵo ati, Ŵali kulipi Acimayasi naJonafani? Naye umwanakasi nekulaŵila kuli ŵo ati, Ŵaaŵuka akanika kamenda. Lomba pakulukufwaya-fwaya nekukaŋgo'kuwawona, ŵalibwelele kuJelusalemi,

²¹ Popele paliŵele ati, ili ŵakumbulucile, aŵo-ŵantu kaŵafuma mumukalo, kaŵaya kaŵaiŵula imfumu Dafidi; naŵo nekulaŵila kuli Dafidi ati, Imeni mwaŋgufisye ukwaŵuka pamenda: pakuti Acitofeli wafunde'fyo ifyakuli mweŵo.

²² Peŋka Dafidi kaema pamo neŵantu ŵonse aŵo ali naŵo, nekwaŵuka Jodeni: lomba pakuco'lucelo tapasyele neli umo utaŋgaawuka Jodeni.

²³ Popele Acitofeli ili abwene ati taŵacitile koti kufunda kwanji, alisamicile imboŋgolo yakwe, nekwima, nekubwelela kwaŵo, kumusi wakwe, nekwansika nenanda yakwe, nekulikulicila; naye nekufwa, nekusikwa mucilende caŵawisi.

²⁴ Popele apo Dafidi walificile kuMakanayimi. Naye Abisalomi nekwaŵuka Jodeni, ye neŵaIsilaeli pamo nakwe.

²⁵ Kaŵili Abisalomi waliikalicile Amasa peulu peŵumba pamupunda wakwe Yoabi. Lomba uyo-Amasa wali mwana wamuntu, isina lyakwe niYitila umuIsilaeli, uwainjile muli Abigayili umwana umwanakasi uwakwe Nakasi, umukwaŵo Syeluya ŵanyina Yoabi.

²⁶ Peŋka aŵaIsilaeli naAbisalomi ŵalikomene ifisema mucalo caGilyadi.

²⁷ Popele paliŵele ati, pakufika Dafidi kuMakanayimi, lomba Syobi umwana wakwe Nakasi uwakuLabati, uwapaŵana ŵakwe Amono, naMacili umwana wakwe Amiyeli uwakuLodebala, naBalesilaye umuGilyadi uwakuLogelimi,

²⁸ ŵaliletele amalo, nemabeseni, nenoŋgo syeŵumba, natiligu, nemabali, newuŋga, nemasaka akoca, nenyaŋgu, nemalentile, neŵuleya bwakoca,

²⁹ neŵuci, nabatala, nembelele, nacisi wakuŋombe, ati Dafidi neŵantu aŵo ali naŵo ŋgaŵalye; pakuti ŵo ati, A ŵantu ŵali nensala, ŵalikatele, ŵali necilaka, mumpanta.