2Samweli 16 - Amashiwi Aba Lesa

¹ Lomba ili acilile panini peulu, kuŵona Siba, umuntu wakwe Mepibosyeti, walimusanjile, wali nemboŋgolo siŵili isyali nefyakwikala-po, nefimpwampwa fyasiŋkwa imyanda iŵili pali syo, nefisaŋgo fyamfaina umwanda, nefyafisepo fyalusuŵa umwanda, nemusupakala wamfaina.

² Peŋka imfumu yalilaŵile kuli Siba ati, Mbafyando ififintu? Naye Siba ati, Imboŋgolo syakwendela-po awananda yamfumu; siŋkwa nefisepo fyalusuŵa fyakulya aŵasaŋkwa: kaŵili imfaina yakunwa aŵaŋgatembuka pampanta.

³ Nayo imfumu ati, Mbaali kulipi umwana waŵawisokulu? Kumfwa Siba walilaŵile kumfumu ati, Ŵoneni, aliikele kujelusalemi; pakuti ye ati, Lelo iŋanda yakwe Isilaeli yakumbwesesya uŵufumu bwaŵatata.

⁴ Peŋka imfumu yalilaŵile kuli Siba ati, Ŵona, fyonse ifyakuli Mepibosyeti fyoŵe. Naye Siba ati, Ndukwinamisya; ŋgambone uluse pamenso enu, mweŵasikulu ŵanji, mwemfumu.

⁵ Popele pakufika imfumu Dafidi kuBakulimi, kusaŋga palifumine apo umuntu uwapacikoto cananda yakwe Saulu, isina lyakwe niSimyai umwana wakwe Gela: naye kaafuma, kaalukwisa ili afiŋga.

⁶ Naye kaamuposa Dafidi amabwe, pamo neŵantu ŵamfumu Dafidi ŵonse: kaŵili aŵantu ŵonse neŵamakosa ŵonse ŵali kulwine lwakwe nakucipiko.

⁷ Lomba Simyai, ili afiŋga, kaalaŵile'fi, ati, Koya, koya wemuntu wamilopa, wemuntu wakwe Belyali:

⁸ ŴaYawe ŵakubwesesya imilopa yonse yananda yakwe Saulu, uyo pamupunda wakwe walukwikalika aŵantu; ŵaYawe ŵapela uŵufumu muminwe yakwe Abisalomi umwana woŵe: lomba, ŵona waikatwa kukuŵifya koŵe wemwine, pakuti niwemuntu wamilopa.

⁹ Kumfwa Abisyai umwana wakwe Syeluya kaaiaŵila kumfumu ati, Mbanindo iyimbwa ifwile iŋgaŵafinjila ŵasikulu ŵanji imfumu? Ndukumukombeteleni ati musumine ati ŋgawuke mfumye umutwi wakwe.

¹⁰ Nayo imfumu ati, Mbasyani ciŵele pali neŵo namweŵo, mwewa na ŵakwe Syeluya? Pakuti pakufiŋga kwakwe, napakuti ŵa Yawe ŵalaŵila kuli ye ati, Komufiŋga Dafidi; mbaninani lomba uŋgalawila ati, Mbanindo wacitile'fyo?

¹¹ Popele Dafidi walilaŵile kuli Abisyai nakuŵantu ŵakwe ŵonse ati, Ŵoneni, umwana wanji umwalalume, uwafumine namuluŵunda lwanji, alukufwaya-fwaya nemweo wanji: tanje cine uyu-mwina-Benjamini aŋgaufwaya-fwaya pano? Mulekeni, ŋgaalukufiŋga; pakuti ŵaYawe ŵamuŵula.

¹² Cipale ŵaYawe ŵakalola ukuŵifya ukucitilwe pali neŵo, naŵo ŵaYawe nekumbwesesya ifiweme pakuti pakumfiŋga neŵo lelo.

¹³ Fyopele'fyo Dafidi neŵantu ŵakwe ŵaliile pansila; naye Simyai walipitile palupili apasiŋkamene napali ŵo, nekulukwenda ili afiŋga, nekumuposa amabwe nekupukula ifukutu.

¹⁴ Nayo imfumu neŵantu ŵonse aŵo yali naŵo ŵalificile aŵakatele; nayo nekulitontosya apo.

¹⁵ Popele Abisalomi neŵantu ŵonse aŵalalume ŵakwe Isilaeli ŵaliisile kuJelusalemi, pamo nakwe Acitofeli.

¹⁶ Peŋka paliŵele ati, pakufika kuli Abisalomi Kusyayi umuYalici, iciŵusa cakwe Dafidi, lomba Kusyayi kaalaŵila kuli Abisalomi ati, ŴaLesa ŵaipulusye imfumu! ŴaLesa ŵaipulusye imfumu!

¹⁷ Naye Abisalomi nekulaŵila kuli Kusyayi ati, Kansi ulu eluse loŵe ulwakuciŵusa coŵe? Mbanindo tawile pamo neciŵusa coŵe?

¹⁸ Naye Kusyayi nekulaŵila kuli Abisalomi ati, Koku; sombi uyo uyu ŵaYawe neŵantu aŵa neŵaIsilaeli ŵonse ŵasalulula neŵo nakulukuli wakwe, ŋkalukwikele pamo nakwe.

¹⁹ Kaŵili niŋgapyunjila nani? Tepamenso amwana wakwe? Koti nifyeyo ifi nalukupyunjila pamenso aŵawisinwe, fyopele'fyo kaŵili nakulukuli napamenso enu.

²⁰ Popele apo Abisalomi walilaŵile kuli Acitofeli ati, Uŵulisisye ifi tuŋgacita.

²¹ Naye Acitofeli nekulaŵila kuli Abisalomi ati, Injileni nakuŵanakasi ŵaŵawisinwe, aŵo ŵasya ati ŵalame iŋanda; lomba aŵaIsilaeli ŵonse ŵakomfwa ati mulukuŵanekasya ŵawisinwe namumutima: elyo amaŵoko aŵo ŵonse aŵo muli naŵo akakosa.

²² Fyopele' fyo ŵalikomene isema pamutenje wananda: naye Abisalomi nekwinjila kuŵanakasi ŵaŵawisi pamenso aŵaIsilaeli ŵonse.

²³ Lomba ukufunda kwakwe Acitofeli, uko afundile insiku isyo kwali koti kwipusya kwamuntu kumukamwami waŵaLesa: fyopele'fyo nekufunda konse kwakwe Acitofeli ukwakuli Dafidi nekwakuli Abisalomi.