2Samweli 14 - Amashiwi Aba Lesa

¹ Lomba Yoabi umwana wakwe Syeluya walibwene ati umutima wamfumu uli kuli Abisalomi.

² Peŋka Yoabi walitumine kuTekoa, nekuleto'ko umwanakasi uwamano, nekulaŵila kuli ye ati, Ndukukukombetela ati utumpaike wesye ati uli wakulila, ufwale ifyamalilo, ndukukukombetela; tekulisufya amafuta, sombi uŵe koti mwanakasi uwalukulilila imfwa impindi itali:

³ eli ukenjile kumfumu, ukalaŵile'fi kuli yo. Fyopele'fyo Yoabi waliŵicile amasiwi mukanwa kakwe.

⁴ Popele apo umwanakasi uwakuTekoa, ili alaŵile kumfumu, wali ifuneme napansi, nekwinamisya, nekulaŵila ati, Ŋgofweni-ko mwemfumu!

⁵ Peŋka imfumu kailaŵila kuli ye ati, Mbanindo weŵo? Naye nekwasuka ati, Icine neŵo ninemukakusyala, umulume wanji alifwile.

⁶ Lomba nemusya wenu kandi neŵana ŵaŵili, naŵo kaŵalukulwa pampaŋga apakuŵulo' wakuŵalekanya, sombi umbi kaapama umuŵyakwe kaamwipaya.

⁷ Lomba ŵoneni, icikoto conse kacimbucila nemusya wenu, kaceŵa ati, Mupose uyo uwapamine umukwaŵo, ati tumwipaye pakuti pamweo wamukwaŵo uyo aipeye, fyopele'fyo twipaye nempyani; ifyo waŋgasimisya amalasya asyele-po, nekuŵulo'kumusila umulume wanji neli lisina neli fyakusyala-po pamenso acalo.

⁸ Peŋka imfumu yalilaŵile kumwanakasi ati, Koya kunanda yoŵe, nakufunda ifyakuli weŵo.

⁹ Peŋka umwanakasi uwakuTekoa walilaŵile kumfumu ati, Mweŵasikulu ŵanji, mweŵamfumu, ukupulaisya kuŵe pali neŵo napananda yaŵatata; lomba imfumu neteŵe lyaiyo liŵule umulandu.

¹⁰ Nayo imfumu nekulaŵila ati, Aŵantu ŵonse uŋgalawila neli kantu kuli weŵo, umulete kuli neŵo, naye tesi akakucite nafimbi.

¹¹ Kumfwa naye ati, Ndukumukombeteleni ati ŵamfumu ŋgawalaŋguluke ŵaYawe Lesa waŵo, ati uwakulwila imilopa ekonala nafimbi, ŵeŋgesa aŵantu mukumonala umwana wanji umwalalume. Nayo ati, Koti nifyefyo ifi ŵali nemweo ŵaYawe, tapakawila pansi neli musisi umo uwamwana woŵe umwalalume.

¹² Peŋka umwanakasi ati, Ŋgamusumine ati neŵo nemusya wenu ndaŵile isiwi kuli ŵasikulu ŵanji imfumu. Nayo ati, Kolaŵila.

¹³ Peŋka umwanakasi ati, Mbanindo lomba mwalandakanisisya icakuŵe'fyo mukuŵifya aŵana ŵakwe Lesa? Pakuti, pakulaŵila iliisi wi, imfumu ili koti wamulandu, pakuti imfumu telukubwesesya kwaŵo uyo yaposesye.

¹⁴ Pakuti tulielelwe ukufwa, tuli koti menda eticile pansi, atesi ukutolwa liŵili; kaŵili ŵaLesa taŵafumya-po umweo, sombi ŵalaansika ati uyo uposiwe eŋgesa kwikala utamfiwe kuli ye.

¹⁵ Pakuti pali fyefyo lomba, kamubwene ndiisile mukulaŵila isiwi ili kuli ŵasikulu ŵanji imfumu, nipakuti aŵantu ŵantinisya: lomba nemusya wenu kandaŵila ati, Pano ndukulaŵila kumfumu; cipale imfumu yakucita koti kulomba kwamuntu waiyo.

¹⁶ Pakuti imfumu yakumfwa, nekupulusya umuntu waiyo muminwe yamuntu uyo uŋgaŋgonala neŵo nemwana wanji pamo, mukutufumya kuŵupyani bwaŵaLesa.

¹⁷ Eli aŋgalawila umusya wenu, ati, Ndukumukombeteleni ati isiwi lyaŵasikulu ŵanji imfumu ŋgaliŵe Iyakusaŋgalasya: pakuti koti niŋkalamba yaŵaLesa, koti nifyopele'fyo efili ŵasikulu ŵanji imfumu mukwisiŵisya ifyakuwama nefyakuŵipa; kaŵili ŵaYawe Lesa wenu ŵaŵe nenu.

¹⁸ Lomba imfumu yaliasucile nekulaŵila kumwanakasi ati, Ndukukukombetela ati tekufisa kuli neŵo neli kantu aka nakukwipusya. Naye umwanakasi ati, Ŵasikulu ŵanji imfumu ŋgaŵalaŵile pano.

¹⁹ Nayo imfumu ati, Kani ukuŵoko kwakwe Yoabi kuli naweŵo muli fifi fyonse? Naye umwanakasi nekwasuka nekulaŵila ati, Koti nifyefyo ifi uli nemweo umutima wenu, mweŵasikulu ŵanji mwemfumu, tapalipo uŋgapasucila neli nikulwine neli nikucipiko kuli fyefyo fyonse ifi ŵalaŵila ŵasikulu ŵanji imfumu; pakuti Yoabi, umuntu wenu, ewambula nekuŵika ayomasiwi onse mukanwa kamusya wenu;

²⁰ Yoabi umuntu wenu wacite'ci-cintu mukwalula lukoso iceŵo; kaŵili ŵasikulu ŵanji ŵali nemano koti mano aŋkalamba yaŵaLesa, mukwisiŵa ifintu fyonse ifili pacalo.

²¹ Popele apo imfumu yalilaŵile kuli Yoabi ati, Ŵona pano, nacite'ci-cintu; koya lomba, umubwesye umusaŋkwa Abisalomi.

²² Naye Yoabi waliwilile pansi ubwifuneme, nekwinamisya, nekwisyucisya imfumu; naye Yoabi ati, Lelo neŵo nemuntu wenu ndiisi ati ndibwene uluse pamenso enu, mweŵasikulu ŵanji mwemfumu, pakweŵa'ti imfumu yacita koti kulomba kwamuntu waiyo.

²³ Fyopele'fyo Yoabi waliimine nekuya kuGesyuli nekumufisya Abisalomi kuJelusalemi.

²⁴ Kumfwa imfumu ati, Ŋgaalule aye kunanda yakwe umwine, sombi eŋgesa kumbona neŵo pamenso. Fyopele'fyo Abisalomi alialucile nekuya kunanda yakwe umwine, taaibwene imfumu napamenso.

²⁵ Lomba muIsilaeli wonse tapali-po uwakumucila Abisalomi ukulemiwa pakuti pawulombe bwakwe: ukutatika mukati kalukasa lwakwe pansi ukufika nakukabwaŋgala kakumutwi wakwe peulu tapali-po neli cisemba pali ye.

²⁶ Kaŵili pakucesa mumutwi wakwe, (lomba walukucesa pakusila umwaka imyaka yonse: pakuti pakulema imisisi, epo aicesele:) aliesesye imisisi yapamutwi wakwe, iyakukumana amasyekeli imyanda iŵili koti kwesya kwamfumu.

²⁷ Kaŵili palifyelwe kuli Abisalomi aŵana aŵalalume ŵatatu nemwanakasi umo, isina lyakwe niTama; ye wali mwanakasi uweme pamenso.

²⁸ Popele Abisalomi waliikele imyaka iŵili iŵuluŵulu mujelusalemi, uwakuŵulo'kwiŵona imfumu pamenso.

²⁹ Telyo Abisalomi aŋgatuma mukwita Yoabi ati mutume kumfumu, sombi taasumine ukwisa kuli ye; naye kaatuma liŵili, sombi taasumine ukwisa.

³⁰ Pakuti pali fyefyo alilaŵile kuŵantu ŵakwe ati, Ŵoneni, iŵala lyakwe Yoabi lili apepi napalyanji, naye ali nemabali muli lyo: kamuyeni, mulioce. Peŋka aŵantu ŵakwe Abisalomi ŵaliliocele iŵala.

³¹ Eli aŋgema Yoabi, nekwisa kuli Abisalomi kunanda yakwe, nekulaŵila kuli ye ati, Mbanindo aŵantu ŵoŵe ŵaŋgocela iŵala?

³² Naye Abisalomi kaamwasuka Yoabi ati, Ŵona, kantuma kuli weŵo ati, Isa kuno ati ŋkutume kumfumu mukulaŵila ati, Mbanindo mfumine muGesyuli? Ŋga ncikele apo, ŋga filukuwama! Pakuti pali fyefyo lomba ŋganjiŵone imfumu pamenso; lomba kani muli ukuŵifya muli neŵo, ŋgainjipaye.

³³ Fyopele'fyo Yoabi waliisile kumfumu nekwiŵula; popele ili yamwitile Abisalomi, alificile nakumfumu, nekwinamisya pansi pamenso amfumu; nayo imfumu yalimufyontele Abisalomi.