2Samweli 13 - Amashiwi Aba Lesa

¹ Panuma pali fyefyo lomba Abisalomi, umwana wakwe Dafidi, wali neŋkasi iweme iyakutamba, isina lyaiyo niTama; kaŵili Aminoni, umwana wakwe Dafidi walimutemwesye.

² Lomba Aminoni walilikutwile mumutima fyopele'fyo walukulwala pakuti pali Tema iŋkasi yakwe, pakuti wali musice uswetelele; kaŵili palimukatesye Aminoni ukumucita neli kantu.

³ Sombi Aminoni wali nemuŵyakwe, isina lyakwe niYonadabi, umwana wakwe Simeya umukwaŵo Dafidi: lomba uyo-Yonadabi, wali muntu ucenjele makosa.

⁴ Naye kaalaŵila kuli ye ati, Wemwana wamfumu mbanindo ulukuliondele'fi insiku nansiku? Tekumbula-po? Peŋka Aminoni kaalaŵila kuli ye ati, Ndukumutemucila Tama, iŋkasi yakwe Abisalomi umukwasu.

⁵ Lomba Yonadabi nekulaŵila kuli ye ati, Kolala paŵulo ŵoŵe, utumpaike ati ulukulwala; popele pakwisa ŵawiso mukukuŵona ukalaŵile kuli ŵo ati, Ndukumukombeteleni ati iise iŋkasi yanji Tama, ikanteŵetele ifyakulya nekufiansika napamenso anji, ati ŋkafiŵone, ŋkafilye muminwe yakwe.

⁶ Fyopele'fyo Aminoni walilele nekwesya ati ndi mulwele. Peŋka pakwisa imfumu mukumuŵona, Aminoni kaalaŵila kumfumu ati, Ndukumukombeteleni ati musumine ati Tama iŋkasi yanji ese ancitile pamenso anji ifimpwampwa fiŵili ati ndukulya muminwe yakwe.

⁷ Peŋka Dafidi walitumine kwaŵo Tama ati, Koya pano kunanda yakwe Aminoni indume yoŵe, umwansicile ifyakulya.

⁸ Fyopele'fyo Tama waliile kunanda yakwe Aminoni indume yakwe; lomba alilele ye. Naye waliŵulile uwusuŋga nekuŵukasa, nekucita ifimpwampwa pamenso akwe, nekufioca ifimpwampwa.

⁹ Naye nekuŵula nembale nekufiitulula pamenso akwe; sombi ye walikene ukulya. Peŋka Aminoni ati, Ŵonse ŋgawafumepo pali neŵo. Lomba ŵonse lukoso ŵalifumine-po apo ali.

¹⁰ Popele Aminoni walilaŵile kuli Tama ati, Injisya ifyakulya mucipinda ati ndye namuminwe yoŵe. Peŋka Tama waliŵulile ifimpwampwa ifyo acitile, nekufiinjisya namucipinda kuli Aminoni indume yakwe.

¹¹ Peŋka ili afipalamisye apepi pali ye ati alye, alimwikete nekulaŵila kuli ye ati, Isa ulale naneŵo, weŋkasi yanji.

¹² Naye nekumwasuka ati, Koku, wendume yanji, tekuŋkakatisya; pakuti ifyakuŵe'fi tafyelelwe ukuficita muIsilaeli; weŵo tekucita uŵutumpi uŵu!

¹³ Naneŵo mpintile kwisa insoni syanji? Naweŵo kaŵili ukalukuli koti kaŋguluŋgulu muIsilaeli. Pakuti pali fyefyo lomba ndukukukombetela ati ulaŵile kumfumu; pakuti tekuti ikane ukukupela neŵo.

¹⁴ Naŋgawe'fyo taasumine ukumfwa isiwi lyakwe: sombi pakuti walimucilile ukukosa, walimupanjile, nekulala nakwe.

¹⁵ Elyo Aminoni aŋgamufitilwa Tama nekufitwa ukukulu; pakuti ukufitwa uko alukumufitilwa kwalicilile uŵukulu nekutemucila uko amutemucile. Naye Aminoni walilaŵile kuli ye ati, Ima, ulukuya!

¹⁶ Naye nekulaŵila kuli ye ati, Koku, pakuti ukuŵifya uku ukwakumfumya kulicilile napali koko uku wancitila. Sombi taasumine ukumumfwa.

¹⁷ Peŋka kaamwita umuntu wakwe uwalukumupyunjila, nekulaŵila ati, Fumya kuli neŵo lomba uyu-mwanakasi, ufuŋge kuciŵi panuma yakwe.

¹⁸ Naye Tama wali necakufwala Icamisaŋgo-mtsaŋgo: pakuti aŵana ŵamfumu aŵanakasi aŵaswetelele lukoso ŵalukufwala iminjila iyakuŵe'fyo. Popele umuntu wakwe walimufumisye, nekufuŋga nakuciŵi panuma yakwe.

¹⁹ Lomba Tama waliŵicile amatoi pamutwi wakwe nekupandula icakufwala cakwe icamisaŋgo-misaŋgo ico afwite; naye nekuteka ukuŵoko kwakwe peulu pamutwi wakwe, nekulukuya, nekulukulila nemisowa ili alukuya.

²⁰ Peŋka Abisalomi indume yakwe walilaŵile kuli ye ati, Kani Aminoni, indume yoŵe, ali naweŵo? Sombi pano kolukwikele celele, weŋkasi yanji: ye nindume yoŵe; tekulukulikutula mumutima ifyafifi. Fyopele'fyo Tama walisyele ili aonaicile muŋanda yakwe Abisalomi indume yakwe.

²¹ Sombi imfumu Dafidi, ili yaumfwile ifyo fyonse, yalikalipile ukwakuti.

²² Naye Abisalomi taalaŵile kuli Aminoni neli fiweme neli fiŵipile; pakuti Abisalomi walimufitilwe Aminoni, pakuti walimupanjile Tama iŋkasi yanji.

²³ Lomba paliŵele ati pakupita imyaka iŵili iŵuluŵulu, Abisalomi wali neŵaŵeyesi ŵambelele muBala-kasoli, uli apasiŋkamene naEfilayimi: peŋka Abisalomi aliŵetile ŵonse aŵana ŵamfumu aŵalalume.

²⁴ Naye Abisalomi waliisile kumfumu nekulaŵila ati, Ŵoneni-ko, nemuntu wenu ndi neŵaŵeyesi; ndukumukombeteleni ati mwemfumu neŵantu ŵenu ŋgamwende pamo nemuntu wenu.

²⁵ Nayo imfumu nekulaŵila kuli Abisalomi ati, Koku, wemwana wanji, twiya fwense twiŋgesa kukukatasya. Naye nekwikakatisya: sombi naŋgawe'fyo tayasumine ukuya, sombi yalimusyucisye.

²⁶ Telyo aŋgalawila Abisalomi ati, Kani ifyo tefyo, ndukumukombeteleni ati Aminoni umukwasu tuye nakwe. Nayo imfumu nekulaŵila kuli ye ati, Mbanindo uŋgela nakwe?

²⁷ Sombi Abisalomi walikakatisye; fyopele' fyo yalisumine ati Aminoni neŵana ŵamfumu ŵonse alukuya naŵo.

²⁸ Popele Abisalomi waliŵafundile aŵantu ŵakwe ati, Umfweni-ko, pakusaŋgalala umutima wakwe Aminoni pakuti pamfaina, napakulaŵila neŵo kuli mweŵo ati, Mupameni Aminoni, kamumwipaya, mwitina; kansi nsinamuŵuleni? Muŵe nelupata nemitima ikosele.

²⁹ Lomba aŵantu ŵakwe Abisalomi ŵalimucitile Aminoni koti nifyopele'fyo ifi afundile Abisalomi. Peŋka aŵana ŵamfumu ŵonse ŵaliimine, ŵonse lukoso kaŵanina napamamyuli aŵo, kaŵaŵutuka.

³⁰ Popele apo, ili ŵacili pansila, iceŵo calificile kuli Dafidi ati, Abisalomi waipaya aŵana ŵamfumu ŵonse, tapasyele-po neli umo.

³¹ Eli iŋgema imfumu nekupandula nefyakufwala fyaiyo nekulala napansi; neŵantu ŵaiyo ŵonse ŵaliimakene-ko nefyakufwala fyaŵo ifipanducile.

³² Popele Yonadabi, umwana wakwe Simeya umukwaŵo Dafidi, waliasucile nekulaŵila ati, Mweŵasikulu ŵanji ŵeŋgeŵa ati ŵaipaya awasaŋkwa ŵonse aŵana ŵamfumu; pakuti niAminoni eŋka eufwile: pakuti koti kwansika kwakwe Abisalomi ifi walifilandakenye ukutatika kukasuŵa ako apanjile Tama iŋkasi yakwe.

³³ Pakuti pali fyefyo lomba mweŵasikulu ŵanji, mwemfumu, mwilikutula mumutima ati aŵana wamtumu ŵonse ŵalifwile; pakuti niAminoni eŋka eufwile.

³⁴ Sombi Abisalomi walifyucile. Lomba umusaŋkwa uwalukulaŋgalaŋga waliceŵucile nekulolesya, lomba kuŵona palukwisa aŵantu aŵenji pansila iyapalupili panuma yakwe.

³⁵ Kumfwa Yonadabi nekulaŵila kumfumu ati, Ŵoneni, aŵana ŵamfumu ŵaisa; paliŵele koti nifyefyo ifi alaŵile umuntu wenu.

³⁶ Popele apo, ili asilile ukulaŵila, kuŵona aŵana ŵamfumu ŵaliisile, naŵo nemisowa kaŵalila; nayo imfumu kaŵili neŵantu ŵaiyo ŵonse kaŵalukulila ukwakuti.

³⁷ Sombi Abisalomi walifyucile, nekuya kuli Talimayi umwana wakwe Amikuli, imfumu yakuGesyuli. Naye Dafidi walukumulilila umwana wakwe insiku syonse.

³⁸ Fyopele'fyo Abisalomi walifyucile nekuya kuGesyuli, nekulukwikala uko imyaka itatu.

³⁹ Popele umutima wakwe Dafidi walukufuŋga ukuya kuli Abisalomi; pakuti walipokele ukusaŋgalala pakuti pali Aminoni, kobwene alifwile.