2Samweli 12 - Amashiwi Aba Lesa

¹ Peŋka ŵaYawe ŵalitumine Natani kuli Dafidi. Naye kaafika kuli ye, kaalaŵila kuli ye ati, Pali aŵalalume ŵaŵili mumusi muntu mumo; umbi wali muŵile, umbi naye upeŋgele.

² Uyomuŵile wali nemataŋga aenji ambelele neaŋombe;

³ sombi uyo upeŋgele taakwete-po neli kantu, sombi wali nakambelele akanakasi kamo keŋka aka atekele nekulisya; nako kakakulila nakwe pamo neŵana ŵakwe; kakalukulya kukakulya kakwe umwine, nekunwa nakuŋkomeci yakwe, nekulala napantiŵi yakwe, nekulukuli koti mwana wakwe umwanakasi.

⁴ Lomba palificile umulwendo kumuŵile uyo, naye walikene ukuŵula-po pamataŋga akwe umwine ambelele neaŋombe mukumwansicila uyo uwalwendo uwaficile kuli ye, sombi walipokele kambelele kawoyo upeŋgele, nekukaansika pakuti pamuntu uyo uwaficile kuli ye.

⁵ Popele uŵukali bwakwe Dafidi bwalimuŵucile ukwakuti uyo-muntu; naye kaalaŵila kuli Natani ati, Koti nifyefyo ifi ŵali nemweo ŵaYawe, uyomuntu uwaficitile'fyo alielelwe ukufwa;

⁶ kaŵili aŋgabwesya kambelele line, pakuti pakucite'fyo, napakuti tawali neŋkumbu.

⁷ Kumfwa Natani kaalaŵila kuli Dafidi ati, Weŵo niwemuntu uyo! Kansi ŵaYawe, Lesa wakwe Isilaeli, ŵalaŵile'fi ati, Nalikusufisye ati niwemfumu yaŵaIsilaeli, nekukupulusya muminwe yakwe Saulu;

⁸ nekukupela iŋanda yaŵawisokulu, neŵakasi ŵaŵawisokulu muntiŵi yoŵe, nekukupela nenanda yaŵaIsilaeli neyaŵaJuda; lomba kani ifyo fiŋgawa fyakucepa, niŋgakulundila-po fimbi nafimbi peulu.

⁹ Mbanindo lomba upufisye isiwi lyaŵaYawe, ukulukucite'fyo ifiŵipile pamenso aŵo? Walimupamine Uliya umuYeti kumpoko, nekupoko'mukasi wakwe ati aŵe woŵe; walimwipeye kumpoko yaŵana ŵakwe Amono.

¹⁰ Pakuti pali fyefyo lomba impoko tekuti ifume pananda yoŵe; pakuti walimpufisye nekumupoka muka-Uliya mukuupa.

¹¹ ŴaYawe ŵalaŵile'fi ati, Ŵona, ŋkakuŵusisya ukuŵifya ukwakutulila namuŋanda yoŵe wemwine; ŋkapoka aŵakasi ŵoŵe napamenso oŵe, nekumupela umuŵyoŵe, naye akalala neŵakasi ŵoŵe napamenso pakasuŵa aka.

¹² Pakuti weŵo walificitile kumfiso; sombi neŵo ŋkaficita ici-cintu pamenso aŵaIsilaeli ŵonse napakasuŵa.

¹³ Kumfwa Dafidi walilaŵile kuli Natani ati, Naŵifya kuli ŵaYawe. Naye Natani kaalaŵila kuli Dafidi ati, ŴaYawe naŵo ŵafumya ukuŵifya koŵe; tokafwa koku.

¹⁴ Naŋgawe'fyo, pakuti kuli kuku-kucita watupela utupondo twaŵaYawe incitilo yakucoŵola ikulu, umwana ufyelwe kuli weŵo naye akafwa icine.

¹⁵ Eli Natani aŋgakumbuluka ukulukuya kunanda yakwe. Naŵo ŵaYawe ŵalimupamine umwana uyo muka-Uliya wamufyalile Dafidi, naye kaalwala ukwakuti.

¹⁶ Pakuti pali fyefyo Dafidi waliŵalombele ŵaLesa pakuti pamwana; naye Dafidi kaalifina nekwinjila nekulala pamusili pansi uŵusiku ŵonse.

¹⁷ Peŋka aŵakulu aŵamuŋanda yakwe ŵaliimine nekwimakana muceni cakwe mukumwimya pansi; sombi walikene, kaŵili taalile-po neli fyakulya naŵo.

¹⁸ Lomba pakasuŵa kaŵusisanu nasiŵili, umwana nekufwa. Naŵo aŵapyunjisi ŵakwe Dafidi ŵalitinine ukumuŵula ati umwana wafwa: pakuti ŵo ati, Ŵoneni, lomba ili umwana acili-po nemweo, katulaŵila kuli ŵo, naŵo taŵatumfwile isiwi lyesu: kansi taŵakalikatasya kani fweŵo tuŵaŵule ati umwana wafwa?

¹⁹ Sombi Dafidi, ili abwene ati aŵapyunjisi ŵalukutepetansyanya, aliisiŵile ati umwana wafwa; naye Dafidi nekulaŵila kuŵapyunjisi ŵakwe ati, Kani wafwa umwana? Naŵo ati, Wafwa.

²⁰ Peŋka Dafidi kaema-po napansi, kaasamba, kaasuŵa, kaafwala nafimbi; naye kaenjila muŋanda yaŵaYawe, kaacindika: popele apo kaenjila namuŋanda yakwe umwine; naye pakufifwaya ŵalitekele ifyakulya pamenso akwe, kaalya.

²¹ Popele apo aŵantu ŵakwe ŵalilaŵile kuli ye ati, Mbefi findo ifi mwacita? Mwalukulifina nekulukumulilila umwana ili acili nemweo; sombi pakufwa umwana mweŵo nekuŵuka nekulukulya.

²² Naye ati, Ili acili nemweo umwana, kandukulifina nekulukulila; pakuti neŵo ati, ninani uwisi kani ŵaYawe ŵakuncitila iŋkumbu ati apuluke umwana?

²³ Sombi pano alifwile, mbanindo niŋgalifinina? Kani ndiisi ukumubwesya? Ŋkaya kuli ye, sombi ye taakabwelela kuli neŵo.

²⁴ Lomba Dafidi walimusaŋgalesye Batasyeba umukasi wakwe, nekwinjila nakuli ye: naye nekumufyalila nemwana umwalalume, naye Dafidi nekumwilika isina lyakwe ati niSolomoni. Lomba ŵaYawe ŵalimutemenwe;

²⁵ nekutuma paminwe yakwe Natani uwakusimika, nekumwilika isi na lyakwe ati niYedidiya, pakuti pali ŵaYawe.

²⁶ Lomba Yoabi walukulwa naLabati uwaŵana ŵakwe Ameno, nekupoka umusi wamfumu.

²⁷ Peŋka Yoabi walitumine iŋkalamba kuli Dafidi ati, Nalwa naLabati, icine napoka umusi wamenda.

²⁸ Pano lomba kamuŵuŋganya aŵantu aŵasyele-ko, mukekale apasiŋkamene nemusi, mukaupoke; niŋgesa neŵo kupoka umu si, nawo nekwilikwa nesina lyanji.

²⁹ Peŋka Dafidi kaawuŋganya pamo aŵantu ŵonse, kaaya kuLabati, kaalwa nawo, kaopoka.

³⁰ Kaŵili walicifumisye iciluŋgu camfumu yaŵo mumutwi waiyo; lomba ukulema kwacico kwalikumene italanto Iyegolide, kaŵili muli co mwali amabwe amakweŵo apatali; naco caliŵicilwe mumutwi wakwe Dafidi. Naye walifumisye ifyakutapa ifyamumusi ifyakuti ubwinji.

³¹ Kaŵili walifumisye neŵantu aŵali-mo, nekuŵaŵika pansi pafipandwisi, napansi pamiso yafyela, napansi patu temo twafyela, nekuwapisya munyumbi syancelwa: lomba walicitile fyopele'fyo kumisi yonse yaŵana ŵakwe Amono. Peŋka Dafidi neŵantu ŵonse ŵalibwelele kuJelusalemi.