2Samweli 11 - Amashiwi Aba Lesa

¹ Lomba paliŵele ati, pakubwela umwaka, pampindi yakutule'ŋkondo imfumu, Dafidi walitumine Yoabi pamo neŵapyunjisi ŵakwe neŵaIsilaeli ŵonse, naŵo kaŵaŵonala aŵaAmono nekusiŋguluka umusi waLabati. Sombi Dafidi umwine walisyele kuJelusalemi.

² Lomba iciŋgulo Dafidi waliŵucile napaŵulo bwakwe, nekwenda pamutenje wananda yamfumu; peŋka ili ali pamutenje walibwene umwanakasi alukusamba; naye umwanakasi waliweme ukwakuti ukumutamba.

³ Naye Dafidi walitumine mukwipusya ifyamwanakasi uyo. Lomba umbi ati, Kansi uyu teye Batasyeba, umwana wakwe Elyamu, umukasi wakwe Uliya umuYeti?

⁴ Peŋka Dafidi walitumine iŋkalamba nekumupoka; naye umwanakasi waliinjile nakuli ye, naye kaalala nakwe; (naye waliswetele kukuŵulo'kusweta kwakwe), nekubwelela kunanda yakwe.

⁵ Lomba umwanakasi waliimitile, nekutuma nekumuŵula Dafidi ati, Ndi nepafu.

⁶ Popele Dafidi walitumine kuli Yoabi, ati, Ntumineni Uliya umuYeti. Naye Yoabi walimutumine Uliya kuli Dafidi.

⁷ Lomba pakufika Uliya kuli ye, Dafidi walimwipwisye ati, Ali syani Yoabi, neŵantu naŵo ŵali syani, kaŵili ilukwenda syani iŋkondo.

⁸ Peŋka Dafidi walilaŵile kuli Uliya ati, Koselucila kunanda yoŵe, usambe nakumakasa. Naye Uliya walifumine muŋanda yamfumu, nefyakulya ifiweme ifyakufuma kumfumu nekumulonda.

⁹ Sombi Uliya walilele kumulyaŋgo uwakunanda yamfumu pamo neŵapyunjisi ŵaŵawisikulu, taaselucile ukuya kunanda yakwe.

¹⁰ Lomba ili ŵamuŵulile Dafidi ati, Uliya taaselucile ukuya kunanda yakwe, Dafidi walilaŵile kuli Uliya ati, Kansi tofumine kulwendo? Mbanindo toselucile ukuya kunanda yoŵe?

¹¹ Naye Uliya walilaŵile kuli Dafidi ati, Ibokosi lyakulayana pamo neŵaIsilaeli neŵaJuda ŵaliikele mumitanda, kaŵili waSikulu ŵanji ŵaYoabi pamo neŵapyunjisi ŵaŵaSikulu ŵanji ŵali pacisasa mumpaŋga lukoso; kansi neŵo. lomba niŋgenjila muŋanda yanji mukulukulya nekulukunwa nekulala nemukasi wanji? Koti nifyefyo ifi muli nemweo mweŵo nemutima wenu nawo uli nemweo, tekuti ncite'fyo, ii!

¹² Kumfwa Dafidi nekulaŵila kuli Uliya ati, Kawikala pano nalelo, lomba mailo ŋkasumina ati ulukuya. Fyopele'fyo Uliya waliikele kujelusalemi akasuŵa ako naŋgamailo.

¹³ Popele Dafidi, ili amwitile, alukulya nekulukunwa pamenso akwe; eli amucitile ati apendwe; lomba iciŋgulo Uliya walifumine mukuya kulala paŵulo bwakwe pamo neŵapyunjisi ŵaŵawisikulu; sombi taaselucile ukuya kunanda yakwe.

¹⁴ Popele ulucelo paliŵele ati Dafidi walimulembele Yoabi iŋkalata nekwituma muminwe yakwe Uliya.

¹⁵ Naye kaalemba paŋkalata ati, Kamumwikalika Uliya pantanjile lukoso pakulwa ukwakucila lukoso, mutele-ko ukumusya ati akapamwe, afwe.

¹⁶ Popele apo Yoabi, ili alukucincisya kumusi, alimutumine Uliya uko ukwaisiŵile ati kuli awaŋkondo aŵalupata.

¹⁷ Lomba aŵamumusi ŵalifumine nekulwa nakwe Yoabi; neŵantu ŵambi nekuwa aŵapyunjisi ŵakwe Dafidi; naye Uliya umuYeti nekufwa.

¹⁸ Elyo Yoabi aŋgatuma aŋgamuŵula Dafidi ifyeŵo fyonse ifyakuŋkondo;

¹⁹ naye nekwicenjesya iŋkalamba ati, Ili ukasila ukwiŵulisisya imfumu fyonse ifyakuŋkondo,

²⁰ pakaŵe ati, kani uŵukali bwamfumu ŵuŵuke, nayo nekulawila kuli weŵo ati, Mbanindo mupalaminine apepi pepi napamusi mukulwa? Kansi tamwaisiŵile ati ŵakuposa imifwi kuciŵumba?

²¹ Ninani uwamupamine Abimeleci umwana wakwe Yelubesyeti? Kansi temwanakasi uwamuposele nempelo kuciŵumba, naye nekufwa kuTebesi? Mbanindo mwailile apepi pepi napaciŵumba? Telyo uŋgalaŵila ati, Umuntu wenu Uliya umuYeti naye wafwa.

²² Fyopele'fyo iŋkalamba nekuya, nekufika nekumubwenesya fyonse'fyo ifi aitumine Yoabi.

²³ Nayo iŋkalamba nekulaŵila kuli Dafidi ati, Awantu walitucilile uŵukali, nekufuma mukutwisila namumpaŋga, nafweŵo katuŵaŵucila ukufika nakumusiko.

²⁴ Lomba aŵakuposa ŵaliŵaposele imifwi aŵantu ŵenu kuluŵao; naŵo ŵambi aŵantu ŵamfumu ŵalifwile, nave umuntu wenu Uliya umuYeti alifwile.

²⁵ Peŋka Dafidi kaalaŵila kuŋkalamba ati, Ukalaŵile'fi kuli Yoabi ati, Ifyo fiikamufitisyeni mumutima, pakuti impoko ilalya ŵonse ŵonse: kamukosya ukulwa nemusi, muuwisye: lomba weŵo komukosya mumutima.

²⁶ Lomba muka-Uliya, pakumfwa ati umulume wafwa, kaalukumulilila umulume wakwe.

²⁷ Kaŵili pakusila impindi yakulila, Dafidi walitumine nekumufisya kwakwe kunanda, naye waliŵele mukasi wakwe, nekumufyalila nemwana umwalalume. Sombi ifyo ifi acitile Dafidi fyaliŵafitisye ŵaYawe mumutima.