2Samweli 10 - Amashiwi Aba Lesa

¹ Popele apo paliŵele ati imfumu yaŵaAmono yalifwile, peŋka Kanuni umwana waiyo waliikele ati nimfumu pamupunda waiyo.

² Peŋka Dafidi ati, Nakulukumucite'ŋkumbu Kanuni, umwana wakwe Nakasi, koti nifyopele' fyo ifi ŵalukuncite'ŋkumbu ŵawisi. Fyopele'fyo Dafidi walitumine paminwe yaŵantu ŵakwe mukumusaŋgalasisya ifyakuli ŵawisi. Neŵantu ŵakwe Dafidi nekufika mucalo caŵaAmono.

³ Sombi ifilolo fyaŵaAmono fyalilaŵile kuli Kanuni wisikuluŵo ati, Kansi mulukweŵa ati Dafidi alukuŵalemya ŵawiso pakumutumineni awakusaŋgalasya? Kansi Dafidi taalitumine aŵantu ŵakwe kuli mweŵo mukufwaya-fwaya mumusi, nekuceta-mo, nekuuwisya?

⁴ Lomba Kanuni waliŵekete aŵantu ŵakwe Dafidi nekuŵaŵeya imyefu uluŵali lumo, nekuŵapandwila ifyakufwala pakati ukufika nakumatako aŵo, nekuŵatuma.

⁵ Peŋka ili ŵamuŵulile Dafidi, alitumine mukuŵacinsya, pakuti aŵo-ŵantu ŵali nensoni isyakuti. Nayo imfumu ati, Kamwikala kuJeliko ili taiŋgamena imyefu yenu, eli mukabwele.

⁶ Naŵo aŵaAmono, ili ŵabwene ati twamunekasya Dafidi namumutima, lomba ŵo aŵaAmono ŵalitumine nekuŵafola aŵaSilya aŵakuBeta-lekobi, neŵaSilya aŵakuSoba, aŵasilikani aŵakwenda pansi amasausande amakumi aŵili, nemfumu iyakuMayaka pamo neŵaŋkondo imyanda ikumi, neŵantu aŵakuTobo amasausande ikumi naaŵili.

⁷ Lomba Dafidi, ili aumfwile'fyo, alitumine Yoabi neŵumba lyonse lyaŵakali.

⁸ Peŋka aŵaAmono ŵalifumine nekwansicile'ŋkondo apakwinjilila pamusiko; naŵo aŵaSilya ŵakuSoba neŵakuLekobi pamo neŵantu aŵakuTobo neŵakuMayaka, ŵo ŵali ŵeŋka pampaŋga,

⁹ Peŋka Yoabi, ili abwene ati iŋkondo iliŋgansicilwe pamenso napanuma, alisalulwile paŵalalume aŵaIsilaeli aŵaweme lukoso ŵonse, nekuŵaansika ukulwa neŵaSilya:

¹⁰ popele awasyele-ko waliŵapele muminwe yakwe Abisyai umukwaŵo, uwaŵaŵambile mukulwa neŵaAmono.

¹¹ Naye ati, Kani aŵaSilya waŋkosele, eli mwakuŋgofwako: sombi kani aŵaAmono ŵamukoseleni, eli nakwisa mukumofweni-ko.

¹² Muŵe nelupata uluweme, ŋgatuwe ŵalalume pakuti paŵantu ŵesu napakuti pamisi yaŵaLesa ŵesu: lomba ŵaYawe ŋgaŵacite koti kufwaya kwaŵo.

¹³ Fyopele'fyo Yoabi naŵaŵo aŵo wali naŵo ŵalipalamine kuŋkondo iyakuŵaSilya; naŵo aŵaSilya ŵaliŵutucile ukufuma pamenso akwe.

¹⁴ Peŋka aŵaAmono, ili ŵabwene ati aŵaSilya ŵaŵutuka, ŵo naŵo ŵaliŵutucile fyopele'fyo pamenso akwe Abisyai nekwinjila namumusi. Peŋka Yoabi kaabwela kuŵaAmono, kaafika kuJelusalemi.

¹⁵ Lomba aŵaSilya, pakuŵona ati twapamwa kuli Isilaeli, ŵaliŵuŋganine pamo.

¹⁶ Naye Kadalesyeli walitumine nekuŵafumya aŵaSilya aŵali pesilya lyanika; naŵo kaŵesa kuKelami pamo nakwe Syobaci icilolo ceŵumba lyakwe Kadalesyeli ili aŵekalika.

¹⁷ Lomba ŵalimuŵulile Dafidi; naye kaaŵuŋganya aŵaIsilaeli ŵonse, kaaŵuka Jodeni, kaafika nakuKelami. Lomba aŵaSilya ŵaliliŵambile mukulwa nakwe Dafidi, naŵo kaŵalwa nakwe.

¹⁸ Lomba aŵaSilya ŵaliŵutucile pamenso aŵaIsilaeli; naye Dafidi waliŵepeye aŵaSilya awapaŋgolofwana imyanda isanu naiŵili, neŵapali ŵakafwalo amasausande amakumi ane, nekumupama naSyobaci, icilolo ceŵumba lyaŵo, naye kaafwila-po.

¹⁹ Peŋka'po imfumu syonse isyalukumupyunjila Kadalesyeli, ili syabwene ati twapamwa kuli Isilaeli, syalicitile uŵutende neŵaIsilaeli nekuŵapyunjila. Fyopele'fyo aŵaSilya ŵalitinine ukuŵofwa-ko aŵaAmono liŵili.