2Ifyeŵo 9 - Amashiwi Aba Lesa

¹ Popele apo imfumu yanakasi iyakuSyeba, ili yaumfwile impupo syakwe Solomoni, yalificile mukumwesya Solomoni kufyakwipusya ifyapatali kuJelusalemi; yali neŵumba ilikulu ukwakuti, neŋgamela isyapintile ifyanse, negolide mpaŋgana mpaŋgana, nemabwe amakweŵo apatali. Peŋka, ili yaficile kuli Solomoni, yalukwambala nakwe ifyafyefyo fyonse ifyali mumutima waiyo.

² Popele Solomoni waliiŵulisisye ifyakwipusya fyaiyo fyonse; Solomoni taafisilwe-kantu ako taaiŵulisisye, tau.

³ Popele apo imfumu yanakasi iyakuSyeba, ili yabwene amano akwe Solomoni, nenanda iyo aiŵeke,

⁴ nefyakulya ifyapetebulu lyakwe, nekwikala kwaŵapyunjisi ŵakwe, nekutaŵataŵa kwafilolo fyakwe nefyakufwala fyafifyo, neŵakumupintila Iŋkomeci nefyakufwala fyaŵo, nepakuninina pakwe apo aninine ukulukuya kwinjila muŋanda yaŵaYawe, tapasyele muli yo neli mutima.

⁵ Nayo yalilaŵile kumfumu ati: Impupo iyo naumfwile mucalo canji nemwine iyakucita kwenu nemano enu kansi yali yacine.

⁶ Naŋgawe'fyo nsinacetekele amasiwi aŵo, ili nsiŋgesa nemenso anji nemwine nekufiŵona, lomba ŵoneni, taŵambulile neli liyafu lyaŵukulu bwamano enu; mweŵo mulicilile-po napampupo iyo naumfwile.

⁷ Ŵalisyucile aŵantu ŵenu, ŵalisyucile aŵa-ŵapyunjisi ŵenu aŵalukwimakana insiku syonse pamenso enu nekulukumfwa amano enu.

⁸ Ŋgaŵalukucindeme ŵaYawe Lesa wenu, aŵalukusembela muli mweŵo, mukumwikalikeni peteŵe lyaŵo, mukwikala ati nimfumu pakuti pali ŵa Yawe Lesa wenu; pakuti ŵaLesa ŵenu ŵalukuŵatemwa aŵaIsilaeli mukuŵekalika insiku pee, pakuti pali fyefyo ŵalimwikalicileni ati nimfumu yapali ŵo, mukucita ukusololola nekuluŋgama.

⁹ Popele yo yaliipele imfumu igolide ilyakwesya amatalanto umwanda umo nemakumi aŵili, nefyanse mpaŋgana mpaŋgana, nemabwe amakweŵo apatali; kaŵili tapali-po ifyanse ifyakuŵe'fyo ifi imfumu yanakasi iyakuSyeba yaipele imfumu Solomoni.

¹⁰ Kaŵili aŵapyunjisi ŵakwe Kulami, neŵapyunjisi ŵakwe Solomoni, aŵaletele igolide ilyakufuma kuOfili, naŵo ŵaliletele imiti yamyalagumi nemabwe amakweŵo apatali.

¹¹ Popele kuli yeyo-myalagumi imfumu yalicitile ifitantilo ifyakunanda yaŵaYawe, nefyakunanda yamfumu, nemesela netuŋkoto utwaŵembisi; tapabwenwe-po nekale mucalo caJuda ifyakuŵe'fyo neli cimo.

¹² Lomba imfumu Solomoni yaliipele imfumu yanakasi iyakuSyeba ukufwaya kwaiyo konse, fyonse'fyo ifi yalombele, peulu pali fyefyo ifi yailetele imfumu. Fyopele'fyo yalialulucile nekubwelela kwaŵo, yo neŵapyunjisi ŵaiyo.

¹³ Lomba ukwesya kwegolide ilyaficile kuli Solomoni pamwaka untu umo kwalikumene amatalanto egolide imyanda isanu naumo nemakumi asanu nalimo,

¹⁴ peulu pali Iyelyo ililetele aŵolisi neŵakuulansyanya; kaŵili imfumu syonse syakuAlabi nefilolo ifikulu ifyapacalo fyalimuletele Solomoni igolide nesilifa.

¹⁵ Lomba imfumu Solomoni yalicitile iŋgaŵo isikulu isyegolide ilyakukandwa imyanda iŵili; iŋgawo ikulu imo yali nemasyekeli egolide ilyakukandwa imyanda isanu naumo.

¹⁶ Kaŵili yalicitile iŋgawo sinini isyegolide ilyakukandwa imyanda itatu; iŋgawo inini imo yali nemasyekeli egolide imyanda itatu; popele imfumu yalisiŵicile muŋanda yeyaamba lyaLebanoni.

¹⁷ Kaŵili imfumu yaJicitile iteŵe lyamfumu ilikulu ilyalwino lwansofu, nekuŵika-po ponse igolide iliswetele.

¹⁸ Peŋka pali ifitantilo fisanu nacimo ukufika kwiteŵe, necakusamina-po amakasa icegolide, fyonse fyalikacilwe kwiteŵe; kaŵili pali ifyakuciŋka-ko pambali syoŵilo syapakwikala-po, neŋkalamu siŵili isiimakene muceni cafyakuciŋkako.

¹⁹ Nakaŵili iŋkalamu ikumi nasiŵili syalukwimakene apo paluŵali lumo napaluŵali lumbi pafitantilo ifyo fisanu nacimo; tapacitilwe ilyakuŵe'fyo neli nimuŵufumu ŵumbi, tau.

²⁰ Kaŵili iŋkomeci syakunwina-mo isyamfumu Solomoni syonse syali syegolide, nafyo fyonse ifiŋkoloŋkolo ifyamuŋanda yeyamba lyaLebanoni fyali fyegolide iliswetele; pansiku syakwe Solomoni taŵalukweŵa ati isilifa lyamakweŵo, ŵaŵa.

²¹ Pakuti imfumu yali nemato alukuya kuTasisi pamo neŵapyunjisi ŵakwe Kulami; lomba impindi imo pamyaka itatu alificile amato akuTasisi, ili aleta igolide, nesilifa, nemeno ansofu, naŵakolwe, nemapikoko.

²² Fyopele'fyo imfumu Solomoni yalicilile uŵuŵile nemano pamfumu syonse isyapacalo capansi.

²³ Lomba imfumu syonse isyapacalo syalifwaisye pamenso pakwe Solomoni, mukumfwa amano akwe, ayo ŵaŵicile ŵaLesa mumutima wakwe.

²⁴ Popele aŵantu ŵonse umo umo ŵalukuleta impese syaŵo, ifiŋkoloŋkolo fyesilifa, nefiŋkoloŋkolo fyegolide, nefyakufwala, nefyakulilamina-mo, nefyanse, naŵakafwalo, nemamyuli, icipimo imyaka namyaka.

²⁵ Kaŵili Solomoni wali nefipata amasausande ane ifyaŵakafwalo neŋgolofwana, neŵapali ŵakafwalo amasausande ikumi naaŵili, naye nekuŵekalika mumisi yaŋgolofwana napamo nemfumu kujelusalemi,

²⁶ Kaŵili alisiikalicile imfumu syonse, ukufuma kunika ukufika nakucalo caŵaFilisiti nakumupaka uwakuIjipiti.

²⁷ Lomba imfumu nekwalula Isilifa koti mabwe muJelusalemi, naŵayelesi nekuŵaalula koti mikuyu yamumikolo pakuti pabwinji.

²⁸ Lomba ŵalifumisye kuIjipiti nakufyalo fyonse ŵakafwalo aŵakuli Solomoni.

²⁹ Lomba fimbi ifyacitilwe kuli Solomoni, ifyakutaŋga nefyakupela-ko, kansi tafililembelwe mufyeŵo fyakwe Natani uwakusimika, namufyakusimika fyakwe Ayija umuSilo, namufyakuŵona fyakwe Ido uwakuŵona ifyakuli Jeloboami umwana wakwe Nebati?

³⁰ Peŋka Solomoni waliikalicile aŵaIsilaeli ŵonse mujelusalemi imyaka amakumi ane.

³¹ Popele Solomoni walilele naŵawisiŵo, nekusikwa mumusi wakwe Dafidi ŵawisi; popele Leyoboami, umwana wakwe umwalalume, walukwikalika pamupunda wakwe.