2Ifyeŵo 8 - Amashiwi Aba Lesa

¹ Popele apo, pakusila imyaka amakumi aŵili, ili alukwiŵaka Solomoni iŋanda yaŵaYawe nenanda yakwe umwine,

² lomba imisi, iyo Kulami amupele Solomoni, ye Solomoni waliiŵeke yo, nekuleŋgesya ati aŵana ŵakwe Isilaeli ŵekale-mo.

³ Popele Solomoni waliile kuAmatisoba, nekucila-po napamusi.

⁴ Kaŵili waliiŵeke Tadimolo pampanta, nemisi yonse iyamaŵoni, iyo aiŵeke kuAmati.

⁵ Kaŵili waliiŵeke Beta-kolono wapeulu, naBeta-kolono wapansi, imisi yamaliŋga iyali nefiŵumba nefiŵi nemitaŵiko,

⁶ naBayalati, nemisi yonse iyamaŵoni iyo ali nayo Solomoni, nemisi yonse yaŋgotofwana syakwe, nemisi yaŵantu ŵakwe aŵapali ŵakafwalo, nafyefyo fyonse ifi afwaile Solomoni ukwiŵacila uŵutemwe bwakwe mu Jelusalemi, namuLebanoni, namucalo conse icawufumu bwakwe.

⁷ Kaŵili ifyaŵantu ŵonse aŵasyelepo paŵaYeti, neŵaAmoli, neŵaPelisi, neŵaYifi, neŵaJebusi, aŵataŵali ŵaŵaIsilaeli;

⁸ paŵana ŵaŵo aŵasyele-po panuma paŵo mucalo, aŵo aŵana ŵakwe Isilaeli taŵaipailile lukoso, pali ŵo Solomoni walifolele ukufola kwaŵasya, ukufika kukasuŵa kano.

⁹ Sombi paŵana ŵakwe Isilaeli Solomoni taacitilepo aŵasya aŵakucita imilimo yakwe, koku; ŵo kansi ŵali ŵalalume ŵaŋkondo, neŵakulu ŵampemba syakwe, neŵekalicisi ŵaŋgolofwana syakwe neŵaŵantu ŵakwe aŵapali ŵakafwalo.

¹⁰ Ifyo efilolo ifikulu ifyamfumu Solomoni, emyanda iŵili nemakumi asanu, ifyalukuŵekalika aŵantu.

¹¹ Popele Solomoni walininicile umwana umwanakasi wakwe Falo ukumufumya mumusi wakwe Dafidi, nekumuleta kunanda iyo amwiŵacile; pakuti ye ati: Umukasi wanji tekuti ekale muŋanda yakwe Dafidi imfumu yakuIsilaeli, pakuti apo-pantu paliswetelele, apo lyaficile-po ibokosi lyaŵaYawe.

¹² Popele apo Solomoni walukuŵaposela ŵaYawe imilambu yakoca paconto caŵaYawe, ico aiŵacile pamenso ansense,

¹³ koti milimo iyelelwe insiku syonse ili aposa koti lifunde lyakwe Mose, pali ŵasabata, napamyensi yamaseŋgo, napafitenje ifyansicilwe, impindi sitatu pamwaka, pacitenje cafimpwampwa fyakuwulo'musuŋga, napacitenje camiluŋgu, napacitenje camitanda.

¹⁴ Kaŵili, koti kusololola kwakwe Dafidi ŵawisi, aliansicile amakoto aŵapapatilisi akukupyuŋga kwaŵo, nemilimo yaŵena-Lefai iyo ŵaŋgalama, iyakucindika nekupyuŋga pamenso aŵapapatilisi, koti milimo iyelelwe insiku syonse; neŵakulama imilyaŋgo naŵo koti makoto aŵo pamilyaŋgo yonse; pakuti ifyo efyafundile Dafidi umuntu waŵaLesa.

¹⁵ Peŋka taŵafumine-po pefunde lyamfumu ilyakuŵapapatilisi neŵena-Lefai, ifyafyeŵo fyonse neli fyamaŵoni.

¹⁶ Lomba imilimo yakwe Solomoni yonse yaliansicilwe, ukufika kukasuŵa kakutatika ifyapansi ifyananda yaŵaYawe, nakumpindi yakwisilisya. Fyopele'fyo iŋanda yaŵaYawe yaliwaminine.

¹⁷ Popele apo Solomoni waliile kuEsyoni-gebeli nakuEloti pambali yesiŵa mucalo caEdomi.

¹⁸ Lomba Kulami walimutumine amato kuminwe yaŵapyunjisi ŵakwe aŵaisiŵisye icisiŵa; naŵo ŵalificile pamo neŵapyunjisi ŵakwe Solomoni kuOfili, nekufumya-ko'ko igolide ilyakwesya amatalanto imyanda ine nemakumi asanu, nekulileta nakumfumu Solomoni.