2Ifyeŵo 7 - Amashiwi Aba Lesa

¹ Popele, pakusilisya Solomoni ukutembela, lomba umulilo nekuseluka kwiulu, nekulasya umulambu wakoca neyakwipaya; peŋka uŵuleme bwaŵaYawe nekwisula iŋanda.

² Lomba aŵapapatilisi taŵaisiŵile ukwinjila muŋanda yaŵaYawe, pakuti uŵuleme bwaŵaYawe bwaliiswile iŋanda yaŵaYawe.

³ Popele aŵana ŵakwe Isilaeli ŵonse ŵalitontomekele, pakuseluka umulilo, napakwikala pananda uŵuleme bwaŵaYawe; naŵo kaŵenamila nemenso aŵo pansi, epaluŵansa, nekulukucindika, nekuŵatota ŵaYawe, ati: Nipakuti ŵo ŵaliweme, pakuti iŋkumbu syaŵo syamuyayaya.

⁴ Popele apo imfumu pamo neŵantu ŵonse ŵaliposele imilambu pamenso aŵaYawe.

⁵ Lomba imfumu Solomoni yali posele umulambu waŵasune ŵaŋombe amasausande amakumi aŵili naaŵili, nembelele amasausande umwanda umo nemakumi aŵili. Fyopele'fyo imfumu neŵantu ŵonse ŵaliposele kuli ŵaLesa iŋanda yaŵaLesa.

⁶ Lomba aŵapapatilisi ŵaliimakene koti kulama kwaŵo; neŵena-Lefai naŵo nefyakulisya isyakuli ŵaYawe, isyo acitile Dafidi imfumu mukuŵatota ŵaYawe, (pakuti iŋkumbu syaŵo syamuyayaya,) pakucindika Dafidi kukupyuŋga kwaŵo; kaŵili aŵapapatilisi ŵalilisisye impeŋga pamenso aŵo; naŵo aŵaIsilaeli ŵonse nekwimakana.

⁷ Kaŵili Solomoni walicindicile icaluŵansa ica pakati icali pamenso ananda yaŵaYawe; pakuti nipapo epo aposele imilambu yakoca, nemafuta akumilambu yaŵutende; pakuti iconto icaluŵemba icacitile Solomoni tacakumene ukupoka umulambu wakoca, nemulambu wawuŋga, nemafuta.

⁸ Fyopele'fyo Solomoni walicitile icitenje pampindi iyo insiku sisanu nasiŵili, neŵaIsilaeli ŵonse pamo nakwe, iŵumba ilikulu ukwakuti, ukufuma kukwinjilila ukwakuAmati ukufika kukanika akakuIjipiti.

⁹ Lomba pakasuŵa kaŵusisanu nasitatu ŵalicitile ubwite ubwansoni; pakuti ŵalilamine ukuposa kwaconto kuli ŵaLesa insiku sisanu nasiŵili, necitenje naco insiku sisanu nasiŵili.

¹⁰ Popele pakasuŵa kamakumi aŵili nasitatu akamwensi waŵuisanu naiŵili, aliŵatumine aŵantu ati ŵaye kumasema aŵo, ili ŵasaŋgalala nekulukusemba mumitima pakuti pakuwama uko ŵaYawe ŵaŵabwenesye Dafidi naSolomoni neŵaIsilaeli aŵantu ŵaŵo.

¹¹ Fyopele'fyo Solomoni walisilile iŋanda yaŵaYawe nenanda yamfumu; kaŵili fyonse'fyo ifyainjile mumutima wakwe Solomoni, ifyo aŋgacita, muŋanda yaŵaYawe namuŋanda yakwe umwine, alificitile nekusyuka.

¹² Popele ŵaYawe ŵalibwenekele kuli Solomoni uŵusiku, nekulaŵila kuli ye ati: Naumfwa ukutembela koŵe, lomba nalisalulwila apa-pantu ati paŵe niŋanda yakwipaila-mo imilambu.

¹³ Kani njisale too iulu ati paŵule ukuloka, kani mfunde insye ati sisilisye icalo ukucilya, kani ntume umwalo pakati paŵantu ŵanji;

¹⁴ lomba kani aŵantu ŵanji, aŵailicilwe koti lisina lyanji, ŵakalicefye, ŵatembele, ŵafwaye napamenso panji, ŵaaluluke ukufuma kunsila syaŵo isiŵipile; elyo ŋkomfwa kwiulu, nekufitulucila kufyakuŵifya fyaŵo, nekuposya necalo caŵo.

¹⁵ Pano amenso anji akalukulola, nematwi anji nao nekulukukutika ukutembela uko ukukacitwa apa-pantu.

¹⁶ Pakuti pano nasalulula nekucindika ivi-nanda, ati isina lyanji likalukwikala-mo insiku syamuyayaya; lomba amenso anji nemutima wanji fikalukuli-mo insiku pee.

¹⁷ Lomba weŵo, kani ukalukwenda pamenso anji, koti nifyefyo ifi aendele Dafidi ŵawiso, nekucita koti nifyefyo ifi nakufunda, nekulukulama amafunde anji nekusololola kwanji;

¹⁸ telyo niŋgaliikalicisya iteŵe lyaŵufumu ŵoŵe, koti nifyefyo ifi nalayene nakwe Dafidi ŵawiso, ati: Tapakaŵula-po kuli weŵo neli muntu uwakwikalika muIsilaeli.

¹⁹ Sombi kani mukaaluka nekuleka ukufunda kwanji nemafunde anji ayo naŵicile pamenso enu, nekuya mukupyunjila ŵalesa ŵambi nekuŵacindika;

²⁰ telyo niŋgawasyulula ukuŵafumya mucalo canji ico naŵapela; naviyi-nanda kaŵili, iyi nacindika pakuti pesina lyanji, ŋkaiposa ukwifumya napamenso anji, nekuyalula iŵe cindaŵindaŵi nesina lyamipufyo pakati paŵantu ŵonse.

²¹ Naviyi-nanda kaŵili, itali iyakuŵe'fi, aŵantu ŵonse aŵakupita pali yo ŵakakaŋkamana, nekulaŵila ati: Mbanindo ŵacitile'fi ŵaYawe kucalo ici nakuli yiyi-ŋanda?

²² Lomba ŵakaasuka-po ati: Nipakuti ŵaliŵalekele ŵaYawe, Lesa waŵawisiŵo, aŵaŵafumisye mucalo caIjipiti, nekwikata-ko kuli ŵalesa ŵambi, nekuŵacindika, nekuŵapyunjila; pakuti pali fyefyo ŵaŵaletela ukuŵifya uku konse.