2Ifyeŵo 6 - Amashiwi Aba Lesa

¹ Popele apo Solomoni walilaŵile ati: ŴaYawe ŵali ŵalaŵila ati ŋkalukwikala mumfinsi itikeme.

² Sombi namwiŵacileni iŋanda yakwikala-mo, pantu apa muŋgekala-mo insiku pee.

³ Popele imfumu nekwaluka napamenso, nekusyucisya iŵumba lyonse lyaŵaIsilaeli; nalyo iŵumba lyonse lyaŵaIsilaeli nekwima.

⁴ Nayo ati: Ŵalicindeme ŵaYawe, Lesa wakwe Isilaeli, aŵalaŵile kumulomo waŵo kuli ŵaDafidi ŵatata, nekufikonsya nakumaŵoko aŵo, ati:

⁵ Ukufuma kukasuŵa ako nafumisye aŵantu ŵanji aŵaIsilaeli mucalo caIjipiti, nsinasalulwile neli musi pafikoto fyonse fyaŵaIsilaeli mukwiŵacila-mo iŋanda, ati isina lyanji lilukwikalo'mo; kaŵili nsinasalulwile neli muntu ati ekale nimfumu yapaŵantu ŵanji aŵaIsilaeli;

⁶ sombi nalisalulwile Jelusalemi, ati isina lyanji lilukwikalo'mo; kaŵili nalimusalulwile Dafidi ati ekalike aŵantu ŵanji aŵaIsilaeli.

⁷ Lomba fyali mumutima waŵaDafidi ŵatata ukwiŵaka iŋanda pakuti pesina lyaŵaYawe, Lesa wakwe Isilaeli.

⁸ Sombi ŵaYawe ŵalilaŵile kuli ŵaDafidi ŵatata ati: Ifyo ifyali mumutima woŵe mukuliiŵacila isina lyanji iŋanda, walicitile bwino ati fyali mumutima woŵe;

⁹ naŋgawe'fyo teti ukaiŵake lnanda: sombi umwana woŵe umwalalume ukafuma muluŵunda loŵe, eukaliiŵacila isina lyanji iŋanda.

¹⁰ Lomba ŵaYawe ŵacita koti lisiwi lyaŵo ilyo ŵalaŵile; pakuti neŵo naimina pamupunda waŵaDafidi ŵatata, ndukwikala peteŵe lyakwe Isilaeli, koti nifyefyo ifi ŵalayene ŵaYawe; kaŵili naliiŵacila iŋanda isina lyaŵaYawe, Lesa wakwe Isilaeli.

¹¹ Napapo kaŵili naikalika ibokosi, umuli ukulayana kwaŵaYawe, uko ŵalayene neŵana ŵakwe Isilaeli.

¹² Peŋka aliimakene apasiŋkamene neconto caŵaYawe pamenso ewuŋgano lyonse lyaŵaIsilaeli, nekutambika nemaŵoko akwe;

¹³ (pakuti Solomoni walicitile icitupa caluŵemba, uŵutali bwaciko ubwamakubita asanu, nebwipi bwaciko ubwamakubita asanu, neŵukulu bwaciko ubwakwesya kwiulu ubwamakubita ata tu, nekuciikalika pakati pacaluŵansa; naye nekwimina-po pali co, nekufukama napamakufi akwe pamenso eŵumba lyonse lyaŵaIsilaeli, nekutambicila amaŵoko akwe kwi ulu;)

¹⁴ naye ati: MweŵaYawe, Lesa wakwe Isilaeli, tapali-po neli nilesa umbi upalene namweŵo, neli nimwiulu, neli nipacalo capansi; mwemulama ukulayana neŋkumbu neŵantu ŵenu aŵalukwenda pamenso enu nemitima yaŵo yonse;

¹⁵ mwemwamucitile umuntu wenu Dafidi ŵatata ifyo ifi mwalayene nakwe; icine mwalilaŵile kukanwa kenu, lomba nekuficita nakuminwe yenu, koti nifyefyo ifi fili nalelo.

¹⁶ Pakuti pali fyefyo lomba, mweŵaYawe, Lesa wakwe Isilaeli, kamumucitila umuntu wenu Dafidi ŵatata ifyo ifi mwalayene nakwe, ati: Tapakakuŵulila neli muntu pamenso anji uwakwikala peteŵe lyakuIsilaeli, kani icine aŵana ŵoŵe ŵakacenjela pansila yaŵo, mukulukwenda mwifunde lyanji, koti nifyefyo ifi walukwenda weŵo pamenso anji.

¹⁷ Pakuti pali fyefyo, mweŵaYawe, Lesa wakwe Isilaeli, musumine ati isiwi lyenu liŵoneke ati lyacine, ilyo mwalaŵile kumuntu wenu Dafidi.

¹⁸ Sombi ŵaLesa kani ŵakalukwikala icinenene neŵantunsi pacalo capansi? Ŵoneni, iulu neulu lyamaulu tafikumene ukwikala-mo mweŵo; mbasyani lomba iŋgacite'fyo iyi-nanda iyi naiŵaka!

¹⁹ Naŋgawe'fyo ŋgamulaŋguluke ukutembela kwamuntu wenu nekukombetela kwakwe, mweŵaYawe Lesa wanji, mukutike ukulila nekutembela uko akutembela pamenso enu umuntu wenu;

²⁰ ati amenso enu aŋgalola kunanda iyi akasuŵa neŵusiku, ekuntu uku mwalaŵile ifyakuko ati, Ŋkaŵika-ko'ko isina lyanji; mukukutika ukutembela uko akatembela umuntu wenu ukwakuntu uku.

²¹ Lomba kamukutika ukukombetela kwamuntu wenu nekwaŵantu ŵenu aŵaIsilaeli, pakutembela ŵo kuntu uku; icine kamumfwa umo mwiulu umu mwikala mweŵo, emwiulu; lomba pakumfwa, kamufitulucila.

²² Kani umuntu aŵifye kumuŵyakwe, naŵo nekumuleŋgesya ukulapa icilapo, naye nekwisa nekulapa pamenso econto cenu muŋanda iyi;

²³ peŋka kamumfwa mwiulu, mucite, musololole neŵantu ŵenu, ukulukwibwesesyo'mulandu imbifi, mukwiletela insila yaiyo pamutwi waiyo; nekulukutuŵulwisya uluŋgeme mukumupela koti kuluŋgama kwakwe.

²⁴ Kaŵili kani aŵantu ŵenu aŵaIsilaeli ŵapamwe pansi pamenso atupondo, pakuti ŵaŵifya kuli mweŵo; kani ŵo nekwalulula nekusumina isina lyenu, nekutembela nekukombetela pamenso enu muŋanda iyi;

²⁵ peŋka kamumfwa mwiulu, mufitulucile ifyakuŵifya fyaŵantu ŵenu aŵaIsilaeli, muŵabwesesye kucalo ico mwaŵapele ŵo naŵawisiŵo.

²⁶ Pakwisalwa too iulu, pakuŵula lukoso imfula, pakuti ŵaŵifya kuli mweŵo; kani ŵo nekutembelela uku-kuntu, nekusumina isina lyenu, nekwaluka kukuŵifya kwaŵo, pakuŵapensya mweŵo;

²⁷ peŋka kamumfwa mwiulu, mufitulucile ifyakuŵifya fyaŵapyunjisi ŵenu nefyaŵantu ŵenu aŵaIsilaeli, pakuŵasambisya mweŵo insila iyo iweme iyo ŵaŋgenda-mo; muloke imfula pacalo cenu, ico mwaŵapele aŵantu ŵenu ati ŵupyani.

²⁸ Kani pakese pacalo akawumbo, kani pakese umwalo, kani pakese ukuŵaŵula neli liŵunde, neli ninsye neli fisimu; kani utupondo twaŵo tukaŵasiŋguluka mucalo camisi yaŵo; naŋgawa mwalo, naŋgawa ŵulwasi ŵonse;

²⁹ lomba ukutembela konse nekukombetela konse kani kucitwe kuŵantu ŵonse lukoso neli nikuŵantu ŵenu aŵaIsilaeli ŵonse, aŵakwisiŵa ŵonse umo umo umwalo wakwe umwine nensoni yakwe umwine, nekutambicila amaŵoko aŵo umo umo kunanda iyi;

³⁰ peŋka kamumfwa umo mwiulu umu mwikala, mufitulucile, muŵabwesesye aŵantu ŵonse umo umo koti ninsila syakwe syonse, uyo mulukwisiŵa umutima wakwe; (pakuti mweŵo, emweŵo mweŋka, muliisi imitima yaŵana ŵaŵantu;)

³¹ ati ŵakamutondeni, ukulukwenda munsila syenu, impindi yonse iyo ŵakalukwikala mucalo ico mwaŵapele ŵawisifwe.

³² Kaŵili ifyakumwensu, utaali waŵantu ŵenu aŵaIsilaeli, sombi utulile kucalo cakutali pakuti pesina lyenu ilikulu, neminwe yenu ikosele, nekuŵoko kwenu ukutambicilwe; pakwisa ŵo nekutembela ili ŵalola kunanda iyi;

³³ peŋka kamumfwa mweŵo mwiulu, emoʼmo mwikala, mukacite koti nifyefyo fyonse ifi aŋgamulombeni umwensu; ati aŵantu ŵonse aŵapacalo capansi ŵakesiŵe isina lyenu, ŵamutondeni, koti nifyopele'fyo ifi ŵacita aŵantu ŵenu aŵaIsilaeli; nakaŵili ati wakesiŵe ati iyi-nanda, iyi naiŵaka, iliilicilwe isina lyenu.

³⁴ Kani aŵantu ŵenu ŵeme mukuya mukulwa netupondo twaŵo, pansila syonse isyo mukaŵatuma, naŵo kani ŵakalukutembela kuli mweŵo, ukulola kuli wuyu-musi uyu mwasalulula nakunanda iyi naliiŵacila isina lyenu;

³⁵ peŋka kamumfwa mwiulu ukutembela kwaŵo nekukombetela kwaŵo, muciikatisye iceŵo caŵo.

³⁶ Kani ŵakaŵifya kuli mweŵo, (pakuti tapali-po umuntu uwakuŵulo'kuŵifya,) lomba mweŵo nekuŵafitilwa, nekuŵapela kutupondo, nato nekuŵatwala, ŵali ŵakaili, kucalo neli kutali neli pepi;

³⁷ naŋgawe'fyo kani ŵakalaŋguluke mucalo ico ŵatapilwemo, nekwaluluka, nekumukombeteleni mucalo caŵukaili bwaŵo, nekulaŵila ati: Twaŵifya, nekufuluŋganya, nekucito'ŵuŵi;

³⁸ kani ŵakabwelele kuli mweŵo nemitima yaŵo yonse, nemyeo yaŵo yonse, mucalo caŵukaili bwaŵo, umo ŵaŵatapile, nekutembelela ukulukulola kucalo caŵo, ico mwaŵapele ŵawisiŵo, nakumusi uyo mwasalulwile, nakunanda iyi naliiŵacila isina lyenu;

³⁹ peŋka kamumfwa ukutembela kwaŵo nekukombetela kwaŵo mwiulu, emo'mo mwikala, muciikatisye iceŵo caŵo; muŵafitulucile aŵantu ŵenu aŵaŵifisye kuli mweŵo.

⁴⁰ Pano lomba, mweŵaLesa ŵanji, ndukumukombeteleni ati amenso enu alole, nematwi enu nao akutike kukutembela ukucitilwe muntu muno.

⁴¹ Pakuti pali fyefyo lomba, mweŵaYawe Lesa, imeni mwinjile muntu mwenu umwakutusisya-mo, mweŵo nebokosi lyamakosa enu. MweŵaYawe Lesa, musumine ati aŵapapatilisi ŵenu ŵafwale ukupuluka, newaluŋgeme ŵenu naŵo ŋgawasembele mukuwama.

⁴² MweŵaYawe Lesa, tekwalula amenso awoyo usufisiwe uwenu; kamulaŋguluka iŋkumbu isyakuli Dafidi umupyunjisi wenu.