2Ifyeŵo 5 - Amashiwi Aba Lesa

¹ Fyopele'fyo imilimo yonse'yo Solomoni aicitile iŋanda yaŵaYawe yalisilile. Popele Solomoni waliinjisye ifintu ifyo aposele Dafidi ŵawisi ŵaLesa, esilifa, negolide, nefiŋkoloŋkolo fyonse, nekufiŵika pafyamaŵoni ifyamuŋanda yaŵaYawe.

² Peŋka Solomoni waliwuŋgenye aŵakulu ŵaŵaIsilaeli, nemfumu syonse syamisyoŵo, ifileme fyamananda aŵawisiŵo aŵana ŵakwe Isilaeli, kuJelusalemi, mukuninika ibokosi lyakulayana kwaŵaYawe ukulifumya kumusi wakwe Dafidi, ekuSayoni.

³ Lomba aŵalalume ŵakwe Isilaeli ŵonse ŵaliŵuŋgene kumfumu kucitenje, icali pamwensi waŵuisanu naiŵili.

⁴ Peŋka kaŵafika aŵakulu ŵakwe Isilaeli ŵonse, lomba neŵena-Lefai kaŵemya ibokosi.

⁵ Naŵo kaŵaleta ibokosi, nesema lvewuŋgano, nefiŋkoloŋkolo ifiswetelele fyonse ifyali mwisema; ifyo fyonse ŵalifininicile aŵapapatilisi aŵena-Lefai.

⁶ Lomba imfumu Solomoni neŵumba lyonse lyaŵaIsilaeli, awawuŋganine kuli yo, ŵali pamenso ebokosi, ili ŵepaya imilambu yambelele neŋombe, isyakuŵulo'kupendeka pakuti pabwinji.

⁷ Lomba aŵapapatilisi ŵaliinjisye ibokosi lyakulayana kwaŵaYawe mumupunda walilyo, umwakulaŵilila mwamuŋanda, umuswetelele swete, epa nsi pamapindo aŵakelubi.

⁸ Pakuti ŵakelubi ŵalitandaŵicile amapindo aŵo peulu pamupunda webokosi; kaŵili ŵakelubi ŵalifimbile peulu ibokosi nemitembo yakuko.

⁹ Lomba imitembo yalitalimpile, fyopele'fyo imilomo yamitembo yalibwenwe kwibokosi pamenso pamwakulaŵilila; sombi tayabwenwe posonde; lomba epo lili nakukasuŵa kano.

¹⁰ Mwibokosi tamwali kantu kambi, sombi amaseleti ebwe oŵilo aya aŵicile-mo'mo MOSE kuOlebi, ili ŵalayene ŵaYawe neŵaIsilaeli pakufuma ŵo kuIjipiti.

¹¹ Popele apo lomba, ili ŵafumine aŵapapatilisi mumupunda umuswetelele, (pakuti aŵapapatilisi ŵonse aŵali-po kale ŵaliswesya, taŵalukucite'milimo pamakoto;

¹² kaŵili aŵena-Lefai aŵembisi ŵonse eAsafi, naKemani, naYedutuni, pamo neŵana ŵaŵo aŵalalume neŵakwaŵo, ili ŵafwite insalu inacile, nemiseŵe netuŋkoto nemesela, ŵaliimakene kumutulesuŵa ukwakuconto, pamo naŵo kaŵili neŵapapatilisi umwanda umo nemakumi aŵili, ili ŵalisya impeŋga:)

¹³ ili ŵali koti muntu umo lukoso aŵakulisya impeŋga neŵembisi, mukulukucita isiwi limo ilyakumfwanika pakulukucindika nekulukutota ŵaYawe; kaŵili ili ŵaŵilicisye nempeŋga nemiseŵe nefyakulisya, nekuŵacindika ŵaYawe, ati: Nipakuti ŵaliweme, pakuti iŋkumbu syaŵo syamuyayaya; peŋka paliŵele ati iŋanda yaliiswile ikumbi, enanda yaŵaYawe,

¹⁴ fyopele'fyo aŵapapatilisi taŵaisiŵile ukwimakana mukupyuŋga pakuti pekumbi; pakuti uŵuleme bwaŵaYawe bwaliiswile iŋanda yaŵaLesa.