2Ifyeŵo 4 - Amashiwi Aba Lesa

¹ Kaŵili alicitile iconto caluŵemba; uŵutali bwaciko bwalikumene amakubita amakumi aŵili, nebwipi bwaciko naŵo makubita amakumi aŵili, neŵutali bwaciko ubwakwesya peulu naŵo makubita ikumi.

² Nakaŵili alicitile isiŵa lyacela icisuŋgulucile, ilyakukumana amakubita ikumi ukulyaŵuka, iliwuluŋgene ukulisiŋguluka; lomba uŵutali bwaliko ubwakwesya peulu bwalikumene amakubita asanu; nemusinso wamakubita amakumi atatu nekulusiŋguluka.

³ Lomba pansi pali lyo pali icakupalana neŵasune ŵaŋombe aŵalisiŋgulucile, umusinso wamakubita ikumi, ukulukulisiŋguluka isiŵa ponse ponse. Pali Imiloŋge yaŵasune iŵili iyaŵumbilwe kumo nesiŵa.

⁴ Nalyo lyaliikele peulu paŵasune ikumi naŵaŵili; ŵatatu ŵalilolele kunofu, ŵatatu naŵo ŵalilolele kumbonsi, ŵatatu naŵo ŵalilolele kusaufu, ŵatatu naŵo ŵalilolele kumutulesuŵa; lomba isiŵa lyaliikalicilwe peulu pali ŵo, nematako aŵo ali munsi mukati.

⁵ Kaŵili umutika waliko walikumene icipanta uŵukulu; lomba umulomo waliko waliŵumbilwe koti mulomo waŋkomeci, koti liluŵa lyakwe lendya; lyalipokele nekukumana amabati amasausande atatu.

⁶ Kaŵili alicitile imisambilo ikumi, nekuŵika isanu kulwine, naimbi isanu kucipiko, mukusambila-mo'mo; ifintu ifyakumulambu wakoca ŵalukufisamfisya-mo'mo; sombi isiŵa lyo lyali lyakusambila-mo aŵapapatilisi.

⁷ Kaŵili alicitile ifyaku teka-po inyale ifyegolide, koti kusololola ukwakuli fyo, nekufiikalika mwitempuli, fisanu kulwine nafisanu kucipiko.

⁸ Alicitile kaŵili amatebulu ikumi, nekuekalika mwitempuli, asanu kulwine naasanu kucipiko; naye nekucita amabeseni egolide umwanda umo.

⁹ Nakaŵili aliiŵeke icaluŵansa caŵapapatilisi, necaluŵansa ico icikulu, nefiŵi ifyakucaluŵansa, nekuŵika-po pafiŵi fyakuko uluŵemba ponse ponse.

¹⁰ Popele aliikalicile isiŵa kulwine lwananda pali ntundwe.

¹¹ Peŋka Kulami walicitile lnoŋgo, nemafosyolo, nemabeseni. Fyopele'fyo Kulami walisilisisye ukucita imilimo iyo aicitile imfumu Solomoni muŋanda yaŵaYawe:

¹² impanda isyo syoŵilo, nefiwuluŋgene, nemitwi iyo yoŵilo iyali peulu pampanda, nefyakombe ifyo fyoŵilo ifyakumitwi iyali peulu pampanda;

¹³ naŵalimono imyanda ine aŵakufyakombe fyoŵilo; Imiloŋge iŵili yaŵalimono kufyakombe cimo cimo, mukufimba-po pafiwuluŋgene fyoŵilo ifyakumitwi iyali peulu pampanda.

¹⁴ Alicitile kaŵili nefyapansi, nekwicita nemisambilo iyapafyapansi,

¹⁵ nesiŵa limo, neŵasune aŵo ikumi naŵaŵili pansi pali lyo.

¹⁶ Nemitondo kaŵili, nemafosyolo, nendoŵo syafinani, nefiŋkoloŋkolo fyonse ifyakuko, eficitile Kulami wisi, ukwicitila imfumu Solomoni, ifyakunanda yaŵaYawe, fyali fyaluŵemba ulutubwilwe.

¹⁷ Imfumu yalifiŵumbile pacinika cajodeni, mumusili weŵumba pakati paSukoti naSyeledata.

¹⁸ Fyopele'fyo Solomoni walicitile ifiŋkoloŋkolo ifyo fyonse mpaŋgana mpaŋgana: pakuti ukulema kwaluŵemba tekuti kwisibwe.

¹⁹ Peŋka Solomoni walicitile ifiŋkoloŋkolo fyonse ifyali muŋanda yaŵaLesa, neconto cegolide, nematebulu ali-po siŋkwa waŵumboni,

²⁰ nefyakuteka-po inyale pamo nenyale syakuko, ati silukwaka koti kusololola, pamenso elaŵililo, ifyegolide iliswetele,

²¹ nemaluŵa, nenyale, nefimanto, ifyegolide, efyegolide iliwaminine,

²² nefyakusimisya-ko, nemabeseni, nemasupuni, nembale isyakocela-mo, fyonse fyegolide iliswetele; kaŵili ifyamwinjililo uwamuŋanda, ifiŵi ifyamukati lukoso ifyamuntu umuswetelele swete, nefiŵi ifyakunanda iine, ifyakwitempuli, fyali fyegolide.